ଦଶରଥପୁର: ଯାଜପୁର ଜିଲ୍ଲା ଦଶରଥପୁର ବ୍ଲକର ୪ ପଂଚାୟତ ଯଥା ଜୟନ୍ତରା, ଦଶରଥପୁର, ଚମ୍ପେଇପାଳ ଓ ଇଜାପୁର ଆଦି ପଞ୍ଚାୟତ ଅଧିନସ୍ଥ ବିଭିନ୍ନ ଗ୍ରାମରେ ଦହିବରା ଖାଇ ଶତାଧିକ ଲୋକ ଝାଡାବାନ୍ତି ଓ ଜ୍ୱରରେ ଆକ୍ରାନ୍ତ ହୋଇଥିଲେ। ଆକ୍ରାନ୍ତଙ୍କୁ ଦଶରଥପୁର ଓ ମଙ୍ଗଳପୁର ସିଏଚସି ସମେତ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ କରାଯାଉଥିବା ବେଳେ ବ୍ଲକ ଅଧିନ ଦଶରଥପୁର ପଞ୍ଚାୟତ ନିଆରୀ ସାହିର ୭୨ ବର୍ଷୀୟା ସୁନ୍ଦରୀ ଯେନାଙ୍କ ମୃତ୍ୟୁ ହୋଇଥିଲା । ଏହି ଘଟଣାରେ ଦଶରଥପୁର ଥାନା ପୁଲିସ ଦହିବରା ବ୍ୟବସାୟୀ ସର୍ବେଶ୍ୱର ସାହୁ ଓରଫ ଘୁରୁଡ଼ାକୁ ୨ଦିନ ଧରି ଥାନାରେ ଅଟକ ରଖି ପଚରାଉଚରା କରୁଥିଲା। ଏ ନେଇ ଜନସ୍ୱାସ୍ଥ୍ୟ ବିଭାଗ ପକ୍ଷରୁ ଦଶରଥପୁର ଥାନାରେ ଅଭିଯୋଗ ହେବା ପରେ ପୁଲିସ ସର୍ବେଶ୍ୱର ପତ୍ନୀକୁ ଥାନାକୁ ଡକାଇ ପଚରାଉଚରା କରିଥିଲା। ପରେ ସର୍ବେଶ୍ୱର ଖାଦ୍ୟ ସୁରକ୍ଷା ଆଇନ ଅମାନ୍ୟ କରିଥିବା ଅଭିଯୋଗ ଆଧାରରେ କେଶ ନଂ ୧୧୪/୨୬ ଓ ଭାରତୀୟ ନ୍ୟାୟ ସଂହିତା ୨୭୫, ୧୦୬, ୫୨/୬୩ ଧାରାରେ ତାକୁ ସୋମବାର କୋର୍ଟ ଚାଲାଣ କରାଯାଇଥିବା ଦଶରଥପୁର ଥାନା ସୂତ୍ରରୁ ଜଣାଯାଇଛି।
About the Author
