ନୂଆଦିଲ୍ଳୀ: ସୁପ୍ରିମକୋର୍ଟ ଏବଂ ବିଭିନ୍ନ ହାଇକୋର୍ଟର ପୂର୍ବତନ ବିଚାରପତି ଓ ମୁଖ୍ୟ ବିଚାରପତିଙ୍କୁ ନେଇ ଗଠିତ ୪୨ ଜଣ ଅବସରପ୍ରାପ୍ତ ବିଚାରପତିଙ୍କ ଏକ ଗୋଷ୍ଠୀ ନିର୍ବାଚନ ଆୟୋଗଙ୍କ ବିରୋଧରେ ହେଉଥିବା ସମାଲୋଚନାର ଜବାବ ଦେଇଛନ୍ତି। ସେମାନେ ଭୋଟର ତାଲିକାର ସ୍ୱତନ୍ତ୍ର ଘନିଷ୍ଠ ସଂଶୋଧନ (ଏସଆଇଆର) ପ୍ରକ୍ରିୟାକୁ ଏକ ଆଇନଗତ ପଦକ୍ଷେପ ବୋଲି କହି ସମର୍ଥନ କରିଛନ୍ତି। ଭାରତର ଜନସାଧାରଣଙ୍କ ଉଦ୍ଦେଶ୍ୟରେ ଲେଖାଯାଇଥିବା ଏକ ଖୋଲା ଚିଠିରେ ଏହି ପୂର୍ବତନ ବିଚାରପତିମାନେ କହିଛନ୍ତି ଯେ ସେମାନେ କୌଣସି ରାଜନୈତିକ ଦଳର ପ୍ରତିନିଧିତ୍ୱ କରୁନାହାନ୍ତି, କିନ୍ତୁ ମତ ରଖିବାକୁ ବାଧ୍ୟ ହୋଇଛନ୍ତି କାରଣ ନୀରବ ରହିବା ଆଉ ନିରପେକ୍ଷ ପଦକ୍ଷେପ ହୋଇ ରହିନାହିଁ। ସେମାନେ ଅଭିଯୋଗ କରିଛନ୍ତି ଯେ ସାମ୍ବିଧାନିକ ସଂସ୍ଥାଗୁଡ଼ିକ ଉପରେ ନିରନ୍ତର ଆକ୍ରମଣ କରାଯାଉଛି ଏବଂ ଏହି ସମାଲୋଚନାର କେନ୍ଦ୍ରବିନ୍ଦୁରେ ନିର୍ବାଚନ ଆୟୋଗ ରହିଛନ୍ତି। ସଂସ୍ଥାଗୁଡ଼ିକର ସମାଲୋଚନା କରିବା ଏକ ଗଣତାନ୍ତ୍ରିକ ଅଧିକାର, କିନ୍ତୁ ଅପମାନିତ କରିବା ତାହା ନୁହେଁ ବୋଲି ପୂର୍ବତନ ବିଚାରପତିମାନେ କହିଛନ୍ତି। ସାମ୍ବିଧାନିକ କର୍ତ୍ତୃପକ୍ଷଙ୍କୁ ସର୍ବସାଧାରଣରେ “ଚୋର’, “କଣ୍ଢେଇ’ ଏବଂ “ଆପୋସ ବୁଝାମଣା କରିଥିବା ବ୍ୟକ୍ତି’ ବୋଲି ଆଖ୍ୟା ଦିଆଯିବାକୁ ସେମାନେ ବିରୋଧ କରିଛନ୍ତି। ସେମାନେ ନିର୍ବାଚନ ଆୟୋଗ ଓ ଅନ୍ୟାନ୍ୟ ସଂସ୍ଥା ବିରୋଧରେ ହେଉଥିବା ସମାଲୋଚନାକୁ ରାଜନୈତିକ ସ୍ୱାର୍ଥ ପ୍ରଣୋଦିତ ଏକ ସୁଚିନ୍ତିତ ଅଭିଯାନ ବୋଲି ବର୍ଣ୍ଣନା କରିଛନ୍ତି ଏବଂ ବିଶ୍ୱର ସବୁଠାରୁ ବଡ଼ ଗଣତନ୍ତ୍ରକୁ ଅସ୍ଥିର କରିବା ଉଦ୍ୟମ ବିରୁଦ୍ଧରେ ଚେତାବନୀ ଦେଇଛନ୍ତି। ଏସଆଇଆର ପ୍ରକ୍ରିୟାକୁ ସମର୍ଥନ କରି ପୂର୍ବତନ ବିଚାରପତିମାନେ କହିଛନ୍ତି ଯେ ନିର୍ବାଚନ ଆଇନ ଅନୁଯାୟୀ ନିର୍ବାଚନ ଆୟୋଗ ଯେକୌଣସି ସମୟରେ ଭୋଟର ତାଲିକା ସଂଶୋଧନ କରିପାରିବେ। ସେମାନେ ଉଲ୍ଲେଖ କରିଛନ୍ତି ଯେ ପ୍ରଥମ ସାଧାରଣ ନିର୍ବାଚନ ପରଠାରୁ ବାରମ୍ବାର ଘନିଷ୍ଠ ସଂଶୋଧନ କରାଯାଇଆସୁଛି ଏବଂ ପୂର୍ବରୁ ଏଭଳି ପ୍ରକ୍ରିୟା ପ୍ରାୟ ଦୁଇ ଦଶନ୍ଧି କେହି ସେହି ସଂଶୋଧନଗୁଡ଼ିକୁ ଷଡ଼ଯନ୍ତ୍ର ବୋଲି କହି ନାହାଁନ୍ତି। ଏସଆଇଆର ଅଭ୍ୟାସକୁ ନେଇ ବିରୋଧୀ ଇଣ୍ଡିଆ ବ୍ଲକ ଏବଂ ଇସି ମଧ୍ୟରେ ଚାଲିଥିବା ମୁକାବିଲା ମଧ୍ୟରେ ଏହି ବିବୃତ୍ତି ଆସିଛି। ବିରୋଧୀ ନେତାମାନେ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ବିଜେପିକୁ ଲାଭ ପହଞ୍ଚାଇବା ପାଇଁ ଭୋଟର ତାଲିକାରେ ହେରଫେର କରିଥିବା ଅଭିଯୋଗ କରିଛନ୍ତି ଏବଂ ତାଙ୍କ ଇସ୍ତଫା ଦାବି କରିଛନ୍ତି। ବିଜେପି ଏବଂ ଇସି ଅଭିଯୋଗକୁ ପ୍ରତ୍ୟାଖ୍ୟାନ କରିଛନ୍ତି। ବିରୋଧୀ ଦଳ ଲଗାତାର ତିନି ଦିନ ଧରି ଦିଲ୍ଲୀରେ ପ୍ରତିବାଦ ପ୍ରଦର୍ଶନ କରିଛନ୍ତି। ମଙ୍ଗଳବାର ଇଣ୍ଡିଆ ବ୍ଲକ ସାଂସଦମାନେ ସଂସଦରୁ ଶୋଭାଯାତ୍ରା କରିଥିଲେ, ତା’ପରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ନେତୃତ୍ୱରେ ଆକାଶବାଣୀ ଭବନରେ ୮ ଘଣ୍ଟା ଧରି ଧାରଣା ଦିଆଯାଇଥିଲା। ବୁଧବାର ଗାନ୍ଧୀ ଏବଂ ଅନ୍ୟ ବିରୋଧୀ ନେତାମାନେ ଜନ୍ତର ମନ୍ତରରେ ଏକ ରାସ୍ତା ପ୍ରତିବାଦ କରିଥିଲେ ଏବଂ ପରେ ପୋଲିସ ସେମାନଙ୍କୁ ଅଟକ ରଖିଥିଲା।
About the Author
