ବାରିପଦା / କରଞ୍ଜିଆ: ମୟୁରଭଞ୍ଜ ଜିଲ୍ଲା, କରଞ୍ଜିଆ ଥାନା, ପାଟବିଲ ପଞ୍ଚାୟତ ବିଶିପୁର ଗ୍ରାମରେ ସ୍ତ୍ରୀକୁ ମଦ ଓ ରସି ନଦେବା କାରଣରୁ ପୁଅ ଅତି ଅମାନୁଷିକ ଭାବେ ମାଆକୁ ହତ୍ୟା କରିଥିବା ଭଳି ଏକ ଅଭାବନୀୟ ଘଟଣା ଅଞ୍ଚଳରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି। ଗତ ୧୯ ତାରିଖରେ ଅଭିଯୁକ୍ତର ମାଆ ବୁଧୁନି ହୋ(୭୦) ନିକଟସ୍ଥ ହାଟକୁ ଯାଇ ଫେରିବା ବେଳକୁ କିଛି ମଦ ଓ ରସି ସାଙ୍ଗରେ ଆଣିଥିଲା। ଘରେ ପହଞ୍ଚି ମଦ ଓ ରସିକୁ ପୁଅ ଚାଲା ହୋ ଏବଂ ଅନ୍ୟମାନଙ୍କୁ ଦେଇଥିବା ବେଳେ ଚାଲାର ସ୍ତ୍ରୀକୁ ଦେଇନଥିଲା । ଏତିକିରେ ଚାଲା ତା ମାଆ ସହ ଝଗଡା ପରେ ମାରିବାକୁ ଉଦ୍ୟତ ବେଳେ ବୁଧୁନି ସେଠାରୁ ଦୌଡ଼ି ପଳାଉଥିଲା । ଚାଲା ଏକ ବାଟୁଳି ଦ୍ୱାରା ତାର ମାଆକୁ ମାରିବାରୁ ବାଟୁଳିର ଗୋଲି ତାର ମୁଣ୍ଡରେ ବାଜିବାରୁ ସେ ତଳେ ପଡିଯାଇଥିଲା । ଏହି ସମୟରେ ଚାଲା ଏକ ଲାଠି ଦ୍ୱାରା ବୁଧୁନିକୁ ନିସ୍ତୁକ ମାଡ଼ ମାରି ଦେହହାତ ଫୁଲାଇ ଦେଇଥିଲା। ଏତିକିରେ ତାର ମନ ନବୁଝିବାରୁ ଘରେ ଥିବା ଏକ ଶାବଳ ଦ୍ୱାରା ମାଆର ଗୋଡ଼ରେ ଭୂଷି ଦେଇଥିଲା । କ୍ଷତାକ୍ତ ବୁଧୁନିର ଚିକିତ୍ସା ନକରି ଘରେ ଏକ ଖଟରେ ଶୁଆଇଦେଇଥିଲା। ଯନ୍ତ୍ରଣାରେ ଛଟପଟ ହୋଇ ବୁଧୁନି ୨୭ ତାରିଖ ସକାଳେ ମୃତ୍ୟୁବରଣ କରିଥିଲା । ଖବରପାଇ ପୋଲିସ ଅଭିଯୁକ୍ତର ଘରକୁ ଯାଇ ଶବକୁ ବ୍ୟବଚ୍ଛେଦ ପାଇଁ ପଠାଇ ଅଭିଯୁକ୍ତକୁ ଗିରଫ କରିଥିଲେ। ଚାଲା ର ୭ ଜଣ ସ୍ତ୍ରୀ ଥିବା ଏବଂ ୨୦୦୯ ମସିହାରେ ଗୋଟେ ସ୍ତ୍ରୀକୁ ହତ୍ୟା ଅଭିଯୋଗରେ ଜେଲଦଣ୍ଡ ଭୋଗି ୨୦୧୦ ରେ ମୁକୁଳିଥିବାର ଜଣାଯାଇଛି। ଏହି ଘଟଣାରେ ଅଭିଯୁକ୍ତକୁ ଗିରଫ ପରେ ଥାନାରେ କେଶ ନଂ ୧୬୫/୨୬ ମୂଳେ ଏକ ମାମଲା ରୁଜୁ କରାଯାଇ ଅଧିକ ତଦନ୍ତ ଜାରି ଥିବାର ସୂଚନା ମିଳିଛି।
About the Author
