ବାରିପଦା /ଉଦଳା: ୟେ ହେଉଛି କପ୍ତିପଦା ବ୍ଲକର ମଝିଗଡ଼ିଆ ପଂଚାୟତ ଅନ୍ତର୍ଗତ ବାଲିଡ଼ାହି ଗ୍ରାମର ଦୃଶ୍ୟ । ଏହି ଗ୍ରାମର ବାସିନ୍ଦା ରାମେଶ୍ୱର ସିଂଙ୍କର ୧୩ବର୍ଷ ବୟସର କନ୍ୟା ଚାନ୍ଦୁ ସିଂ ଆଜକୁ ୪ ବର୍ଷ ଧରି ପାଠପଢ଼ାରେ ଡ଼ୋରି ବାନ୍ଧିଦେବାକୁ ବାଧ୍ୟ ହୋଇଥିବାର କଥା ପରିବାରର ଲୋକେ କହିଛନ୍ତି । ଖବର ନେବାରୁ ଚାନ୍ଦୁ ସିଂ ପଦ୍ମପୋଖରି ସ୍ଥିତ ସରକାରୀ ପ୍ରାଥମିକ ବିଦ୍ୟାଳୟରୁ ୫ମ ଶ୍ରେଣୀ ପାସ କରିଛନ୍ତି । ପରେ ଶାଳଚୁଆସ୍ଥିତ ଉଚ୍ଚ ବିଦ୍ୟାଳୟକୁ ୬ଷ୍ଠ ଶ୍ରେଣୀରେ ନାମ ଲେଖାଇବା ପାଇଁ ଯିବାରୁ ଏଠାରେ କାର୍ଯ୍ୟରତ ଶିକ୍ଷକ ଆଧାର କାର୍ଡ଼ ମାଗିଲେ । ଆଧାର କାର୍ଡ଼ ଦେଖାଇ ନପାରିବାରୁ ନାମ ଲେଖାଯାଇପାରିବ ନାହିଁ ବୋଲି ରୋକ୍ ଠୋକ୍ ମନା କରି ଶିକ୍ଷକ ଜଣକ ବିଦା କରିଦେଇଥିବାର କଥା ରାମେଶ୍ୱର ଗଣମାଧ୍ୟମକୁ ଜଣାଇଛନ୍ତି । ପାଠପଢ଼ା ଛାଡ଼ିଥିବା ସମସ୍ତ ପିଲାଙ୍କୁ ପୁଣିଥରେ ବିଦ୍ୟାଳୟକୁ ନେବା ପାଇଁ ସରକାର ‘ଆସ ସ୍କୁଲଯିବା ଅଭିଯାନ’ ଚଳାଇଛନ୍ତି । ନାମ ଲେଖା କ୍ଷେତ୍ରରେ ଆଧାର ବାଧ୍ୟତା ମୂଳକ ନୁହେଁ ବୋଲି ସରକାରୀ ବାବୁ ମାନେ ନିୟମିତ ଢ଼ୋଲ ପିଟୁଛନ୍ତି । କିନ୍ତୁ ‘ଚାନ୍ଦୁ’ଙ୍କ ପରି ଏବେ ମଧ୍ୟ ଆଧାର କାର୍ଡ଼ ପାଇଁ ବହୁ ସଂଖ୍ୟାରେ ପିଲା ବିଦ୍ୟାଳୟ ବାହାରେ ଅଛନ୍ତି । ଆଧାର କାର୍ଡ଼ ପାଇଁ ‘ଚାନ୍ଦୁ’ ବାରମ୍ବାର ଫଟୋ ଉଠାଇଥିଲେ ମଧ୍ୟ ତାଙ୍କର ଆଧାର କାର୍ଡ଼ କାହିଁକି ଆସୁନାହିଁ ତାହା ପରିବାର ଲୋକଙ୍କୁ ଜଣାନଥିବାର କଥା କହିଛନ୍ତି । ସେହିପରି ପରିବାରକୁ ମିଳିଥିବା ରାସନ କାର୍ଡ଼ରେ ଚାନ୍ଦୁଙ୍କ ନାମ ଯୋଡ଼ାଯାଇ ପାରୁନଥିବାରୁ ମୁଣ୍ଡପିଛା ମିଳୁଥିବା ୫କିଗ୍ରା ଚାଉଳ ପାଇବାରୁ ସେ ବଂଚିତ ଅଛନ୍ତି । ତାଛଡ଼ା ଆଦିବାସୀ ଭାଇ ଭଉଣୀ ମାନଙ୍କର ସବୁ ପ୍ରକାର ସୁଖ ଦୁଃଖ ବୁଝିବା ପାଇଁ ଏଠାରେ ସମନ୍ୱିତ ଆଦିବାସୀ ଉନ୍ନୟନ ପ୍ରକଳ୍ପ କାର୍ଯ୍ୟ କରୁଛି । ଯାହାର କାର୍ଯ୍ୟାଳୟ ଉଦଳା ଠାରେ ରହିଛି । ଚାନ୍ଦୁ ସିଂ ଜଣେ ଆଦିବାସୀ ଛାତ୍ରୀ ହୋଇଥିବା ବେଳେ ତାଙ୍କୁ ଉକ୍ତ ପ୍ରକଳ୍ପ କୌଣସି ସହଯୋଗ ନକରି କାହିଁକି ଚୁପ ମାରି ବସିଛି ବୋଲି ଅନେକ ପ୍ରଶ୍ନ ଉଠାଇଛନ୍ତି । ବିଭାଗୀୟ କତୃପକ୍ଷ ଏଥିପ୍ରତି ତୁରନ୍ତ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି ।
About the Author
