ମାଲକାନଗିରି: ନକ୍ସଲ ମୁକ୍ତ ଭାରତ ଅଭିଯାନକୁ ବଡ଼ ସଫଳତା। ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ର ବସ୍ତର ଜିଲ୍ଲାର ଜଗଦଲପୁର ଠାରେ ଆଜି ଦଣ୍ଡକାରଣ୍ୟ ସ୍ପେଶାଲ ଜୋନାଲ କମିଟିର ୧୦୮ ଜଣ ହାର୍ଡକୋର ମାଓବାଦୀ ଏକାସାଙ୍ଗରେ କରିଛନ୍ତି ଆତ୍ମସମର୍ପଣ। ଏମାନଙ୍କ ମଧ୍ୟରେ ଉଭୟ ପୁରୁଷ ଓ ମହିଳା ମାଓବାଦୀ ରହିଛନ୍ତି। ଆତ୍ମସମର୍ପଣ କରିଥିବା ମାଓବାଦୀଙ୍କ ମୁଣ୍ଡ ଉପରେ ମିଳିତ ଭାବେ ରହିଥିଲା ୩.୯୫ କୋଟି ଟଙ୍କାର ପୁରସ୍କାର। ସେମାନଙ୍କୁ ସୁରକ୍ଷାକର୍ମୀ ଧରିବାକୁ ଚେଷ୍ଟା କରୁଥିବା ବେଳେ ସେମାନେ ଆଜି ଅସ୍ତ୍ର ଛାଡ଼ି ସମାଜରେ ମୁଖସ୍ରୋତରେ ସାମିଲ ହୋଇଛନ୍ତି। ସେହିପରି ନକ୍ସଲଙ୍କ ଆଡ୍ଡାରୁ ସୁରକ୍ଷାକର୍ମୀମାନେ ବିପୁଳର ପରିମାଣର ନଗଦ ଟଙ୍କା, ସୁନା ଓ ଅସ୍ତ୍ରଶସ୍ତ୍ର ମଧ୍ୟ ଜବତ କରିଛନ୍ତି। ଆତ୍ମସମର୍ପଣ କରିଥିବା ନକ୍ସଲଙ୍କ ସୂଚନା ଆଧାରରେ ସୁରକ୍ଷାକର୍ମୀମାନେ କରିଥିବା ରେଡ ବେଳେ ଏହି ସବୁ ଜିନିଷ ମିଳିଛି। ବସ୍ତର ରେଞ୍ଜ ପୁଲିସ୍ ଆଇଜି ସୁନ୍ଦରାଜ ପଟ୍ଟିଲିଙ୍ଗାମ କହିଛନ୍ତି ଯେ ନକ୍ସଲଙ୍କ ଆଡ୍ଡାରୁ ନଗଦ ୩.୬୧ କୋଟି ଟଙ୍କା ଓ ପ୍ରାୟ ୧ କେଜି ସୁନା ମିଳିଛି। ଜବତ ସୁନାର ମୂଲ୍ୟ ପ୍ରାୟ ୧.୬୪ କୋଟି ଟଙ୍କା ହେବ। ଏହାପୂର୍ବରୁ ନକ୍ସଲ ବିରୋଧୀ ଅଭିଯାନ ବେଳେ କେବେ ବି ଏତେ ପରିମାଣର ନଗଦ ଟଙ୍କା କିମ୍ବା ସୁନା କୌଣସି ସ୍ଥାନରୁ ମିଳି ନଥିଲା। ହେଲେ ଆଜି ଆତ୍ମସମର୍ପଣ କରିଥିବା ନକ୍ସଲଙ୍କ ସୂଚନା ଆଧାରରେ ହୋଇଥିବା ରେଡ ବେଳେ ବଡ଼ ସଫଳତା ମିଳିଛି। ଜଗଦଲପୁର ଠାରେ ଆତ୍ମସର୍ପଣ କରିଥିବା ମାଓବାଦୀମାନେ ବ୍ୟାନ ହୋଇଥିବା ସିପିଆଇ(ମାଓବାଦୀ) ସଂଗଠନର ଦଣ୍ଡକରାଣ୍ୟ ସ୍ପେଶାଲ ଜୋନାଲ କମିଟି ସଦସ୍ୟ। ଗତବର୍ଷ ଦକ୍ଷିଣ ବସ୍ତରର ବିଭିନ୍ନ ସ୍ଥାନରେ ହୋଇଥିବା ଏକାଧିକ ହିଂସାରେ ଏମାନେ ସାମିଲ ଥିଲେ।ଆଜି ଅସ୍ତ୍ର ଛାଡ଼ିଥିବା ମାଓବାଦୀଙ୍କ ମଧ୍ୟରେ ୬ ଜଣ ଡିଭିଜନାଲ କମିଟି ସଦସ୍ୟ ରହିଛନ୍ତି। ଏମାନଙ୍କୁ ଧରିବା ପାଇଁ ୮ ଲକ୍ଷ ଟଙ୍କା ଲେଖାଏ ପୁରସ୍କାର ଘୋଷଣା କରାଯାଇଥିଲା। ପଶ୍ଚିମ ବସ୍ତରର ରାହୁଲ ତେଲାମ, ପାଣ୍ଡ୍ରୁ କୋଭାସି ଓ ଝିତ୍ରୁ ଓୟାମ, ପୂର୍ବ ବସ୍ତରର ରାମଧର ଓରଫ ବୀରୁ, ଉତ୍ତର ବସ୍ତରର ମାଲେଶ ଭଳି ବରିଷ୍ଠ ମାଓବାଦୀ ଆଜି ସମାଜର ମୁଖ୍ୟସ୍ରୋତରେ ସାମିଲ ହୋଇଛନ୍ତି। ଆତ୍ମସମର୍ପଣ କରିଥିବା ଅନ୍ୟ ଗୁରୁତ୍ୱପୂର୍ଣ୍ଣ ସଦସ୍ୟମାନେ ହେଲେ ପିପୁଲ୍ସ ଲିବେରେସନ ଗରିଲା ଆର୍ମି ବାଟାଲିୟନର ମୁଚାକି ଓ ଆନ୍ଧ୍ର-ଓଡ଼ିଶାର ସୀମାର ଡିଭିଜନାଲ କମିଟି ସଦସ୍ୟ କୋସା ମାଣ୍ଡଭୀ। ସୁରକ୍ଷାକର୍ମୀମାନେ ନକ୍ସଲଙ୍କ ଠାରୁ ସୂଚନା ପାଇବା ପରେ ଏମିତି ଏକ ସ୍ଥାନରେ ରେଡ କରିଥିଲେ ସେଠାରୁ ସେମାନଙ୍କୁ ଏକେ ୪୭ ରାଇଫଲ, ଇନସାସ ରାଇଫଲ, ଏସଏଲଆର ରାଇଫଲ, ଲାଇଟ ମେସିନ ଗନ, .୩୦୩ ରାଇଫଲ ଓ ଗ୍ରେନେଡ ଲଞ୍ଚର ଭଳି ଶତାଧିକ ଅସ୍ତ୍ରଶସ୍ତ୍ର ମିଳିଛି।
About the Author
