ଢାକା: ଏକ ଏୟାର ଆମ୍ବୁଲାନ୍ସରେ ଯାତ୍ରା କରୁଥିବା ଜଣେ ଭାରତୀୟ ମହିଳାଙ୍କ ମୃତ୍ୟୁ ଘଟିଛି। ସେ ଏୟାର ଆମ୍ବୁଲାନ୍ସରେ ଯାତ୍ରା କରୁଥିବା ବେଳେ ଏଥିରେ ଯାନ୍ତ୍ରିକ ତ୍ରୁଟି ଦେଖାଦେଇଥିଲା, ଯାହା ଫଳରେ ବିମାନର କବାଟ ଆକାଶମାର୍ଗରେ ଥିବା ସମୟରେ ଆଂଶିକ ଭାବେ ଖୋଲିଯାଇଥିଲା ଏବଂ ବିମାନଟିକୁ ବାଂଲାଦେଶରେ ଜରୁରୀକାଳୀନ ଅବତରଣ କରିବାକୁ ପଡ଼ିଥିଲା ବୋଲି ସ୍ଥାନୀୟ ଗଣମାଧ୍ୟମ ରିପୋର୍ଟ କରିଛି।ଏହି ବିମାନଟି ଆଗରତଲାରୁ କୋଲକାତା ଅଭିମୁଖେ ଯାଉଥିଲା। ୧୨,୦୦୦ ଫୁଟ ଉଚ୍ଚତାକୁ ଉଠିବା ସମୟରେ ଏଥିରେ ତ୍ରୁଟି ଦେଖାଦେଇଥିଲା। ବିମାନଟି ସ୍ଥାନୀୟ ସମୟ ଅପରାହ୍ନ ପ୍ରାୟ ୧:୪୦ ସମୟରେ ଢାକାର ହଜରତ ଶାହଜଲାଲ ଆନ୍ତର୍ଜାତୀୟ ବିମାନବନ୍ଦରରେ ସୁରକ୍ଷିତ ଭାବେ ଅବତରଣ କରିଥିଲା। ଏଥିରେ ଦୁଇଜଣ ପାଇଲଟ୍, ଜଣେ ରୋଗୀ, ଜଣେ ଡାକ୍ତର, ଜଣେ ପାରାମେଡିକାଲ୍ କର୍ମଚାରୀ ଏବଂ ଦୁଇଜଣ ସହଯାୟୀଙ୍କ ସମେତ ମୋଟ ସାତଜଣ ବ୍ୟକ୍ତି ଥିଲେ। ରିପୋର୍ଟ ଅନୁଯାୟୀ, ରୋଗୀ ଜଣକ ହେଉଛନ୍ତି ୫୬ ବର୍ଷୀୟା ଅଞ୍ଜନା ଭୌମିକ। ତାଙ୍କୁ କୁର୍ମିଟୋଲା ମଲ୍ଟି କେୟାର ସ୍ପେଶାଲାଇଜଡ୍ ହସ୍ପିଟାଲକୁ ନିଆଯାଇଥିଲା, ଯେଉଁଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ। ବିମାନରେ ଥିବା ଅନ୍ୟ ସମସ୍ତ ବ୍ୟକ୍ତି ସୁରକ୍ଷିତ ଅଛନ୍ତି। ରୋଗୀଙ୍କ ମୃତ୍ୟୁର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ; ବିମାନର ଯାନ୍ତ୍ରିକ ତ୍ରୁଟି ଯୋଗୁଁ ତାଙ୍କର ମୃତ୍ୟୁ ହେଲା କିମ୍ବା ଅନ୍ୟ କୌଣସି ସ୍ୱାସ୍ଥ୍ୟଗତ ଜଟିଳତା ଯୋଗୁଁ ହେଲା, ତାହା ଜଣାପଡ଼ିନାହିଁ। ହଜରତ ଶାହଜଲାଲ ଆନ୍ତର୍ଜାତୀୟ ବିମାନବନ୍ଦରର କାର୍ଯ୍ୟନିର୍ବାହୀ ନିର୍ଦ୍ଦେଶକଙ୍କ ମୁଖପାତ୍ର ମହମ୍ମଦ ରିଆଜ ଉଦ୍ଦିନ କହିଛନ୍ତି ଯେ, ଉଡ଼ାଣ ସମୟରେ ବିମାନରେ ଏକ ଯାନ୍ତ୍ରିକ ସମସ୍ୟା ଦେଖାଦେଇଥିଲା। ବିମାନବନ୍ଦର ଥାନାର ଭାରପ୍ରାପ୍ତ ଅଧିକାରୀ କମରୁଲ ହାସନ ତାଲୁକଦାର ଜଣାଇଛନ୍ତି ଯେ, ରବିବାର ସ୍ଥାନୀୟ ସମୟ ଅପରାହ୍ନ ୪:୪୦ରେ ଡାକ୍ତରଖାନାରେ ଭୌମିକଙ୍କ ମୃତ୍ୟୁ ଘଟିଛି। ବିଏସ୍ଏସ୍ ରିପୋର୍ଟ ଅନୁଯାୟୀ, ଅନ୍ତର୍ଜାତୀୟ ସ୍ତରରେ ଅବତରଣ ପାଇଁ ଆବଶ୍ୟକ ଅନୁମତି ନଥିବା ସତ୍ତ୍ୱେ, ବାଂଲାଦେଶ କର୍ତ୍ତୃପକ୍ଷ ମାନବିକ ଦୃଷ୍ଟିକୋଣରୁ ଏହି ଏୟାର ଆମ୍ବୁଲାନ୍ସକୁ ସହାୟତା ପ୍ରଦାନ କରିଥିଲେ। ଢାକାସ୍ଥିତ ଭାରତୀୟ ହାଇକମିଶନ, ଆବଶ୍ୟକ କୂଟନୈତିକ ପ୍ରକ୍ରିୟା ସମ୍ପାଦନ କରିବାରେ ବାଂଲାଦେଶୀ ଅଧିକାରୀଙ୍କ ସହ ସମନ୍ୱୟ ରକ୍ଷା କରିଥିଲେ। ଏହି ବିମାନଟି ଭାରତର ଏସ୍କେବି ଇନଫ୍ରାକନ୍ ପ୍ରାଇଭେଟ୍ ଲିମିଟେଡ୍ ଦ୍ୱାରା ପରିଚାଳିତ ହେଉଥିଲା ଏବଂ ଅନୁମତି ସମ୍ବନ୍ଧୀୟ ସମସ୍ୟାର ସମାଧାନ ପାଇଁ କର୍ତ୍ତୃପକ୍ଷ କାର୍ଯ୍ୟ କରୁଥିବା ବେଳେ ବିମାନଟି ଢାକା ବିମାନବନ୍ଦରରେ ରହିଥିଲା।
About the Author
