କଳିଙ୍ଗନଗର: ଭୁବନେଶ୍ୱରରୁ ସାପୁଆ ବୁଲିବାକୁ ଆସିଥିବାବେଳେ ଏକ ଅଭାବନୀୟ ଘଟଣା ଘଟିଯାଇଛି। ସୂଚନା ଅନୁଯାୟୀ କଳିଙ୍ଗନଗର ଭୁବନେଶ୍ୱରରୁ ୪ ଜଣ ବ୍ୟକ୍ତି ହିନ୍ଦୋଳ ଉପଖଣ୍ଡ ରାସୋଳ ଥାନା ଦଣ୍ଡିରୀ ପଞ୍ଚାୟତ ଅନ୍ତର୍ଗତ ସାପୁଆ ଡ୍ୟାମକୁ ଭୋଜି କରିବାକୁ ଆଜି ଅପରାହ୍ନ ସମୟରେ ଆସିଥିବାବେଳେ ଗାଡ଼ିଟି ତାଙ୍କର ଭାରସାମ୍ୟ ହରାଇ ଡ୍ୟାମ୍ ଭିତରେ ଖସିପଡିଥିଲା। ସେଠାରେ ଉପସ୍ଥିତଥିବା ଲୋକମାନେ ସଙ୍ଗେସଙ୍ଗେ ରାସୋଳ ଦମକଳବାହିନୀକୁ ଜଣାଇବାରେ ଦମକଳବାହିନୀ ଘଟଣାସ୍ଥଳରେ ପହଞ୍ଚି ଉଦ୍ଧାର କରିଥିଲା। କିନ୍ତୁ ଉଦ୍ଧାର କରିବାବେଳକୁ ସେଥିମଧ୍ୟରୁ ପ୍ରସନ୍ନ କୁମାର ମହାରଣା (୭୨)ଙ୍କର ମୃତ୍ୟୁ ଘଟିସାରିଥିବାବେଳେ ଅନ୍ୟ ୩ ଜଣଙ୍କୁ ଗୁରୁତର ଅବସ୍ଥାରେ ମେଡିକାଲ୍ ନିଆଯାଇଥିଲା। ପୋଲିସ୍ ଘଟଣାସ୍ଥଳରେ ପହଞ୍ଚି ଶବକୁ ଜବତ କରି ବ୍ୟବଚ୍ଛେଦ ପାଇଁ ହିନ୍ଦୋଳ ଉପଖଣ୍ଡ ଡ଼ାକ୍ତରଖାନାକୁ ପଠାଇବା ସହ ତଦନ୍ତ ଜାରି ରଖିଛି। ତେବେ ଏପରି ଘଟଣା ଘଟିବା ସାପୁଆ ଡ୍ୟାମରେ ନୂଆ ନୁହେଁ। ପୂର୍ବରୁ ବହୁବାର ଏପରି ଅଘଟଣମାନ ଘଟି ଜୀବନ ହାନି ହୋଇଥିଲେ ମଧ୍ୟ ପ୍ରଶାସନ ପକ୍ଷରୁ କୌଣସି ନିରାପଦର ବ୍ୟବସ୍ଥା କରାଯାଇନାହିଁ। ସାପୁଆ ଡ୍ୟାମ୍ ରାଜ୍ୟର ଏକ ଚର୍ଚ୍ଚିତ ପର୍ଯ୍ୟଟନସ୍ଥଳୀ ହୋଇଥିବାବେଳେ ଲୋକମାନେ ରାଜ୍ୟ ଏବଂ ରାଜ୍ୟ ବାହାରୁ ଦୈନନ୍ଦିନ ବୁଲିବାକୁ ଆସୁଛନ୍ତି। କିନ୍ତୁ ଲୋକଙ୍କ ସୁରକ୍ଷାପାଇଁ କୌଣସିପ୍ରକାର ବ୍ୟବସ୍ଥା ନାହିଁ। ଯାହାକୁ ନେଇ ବୁଦ୍ଧିଜୀବୀମାନେ ପ୍ରଶ୍ନ ଉଠାଇବା ସହ ସୁରକ୍ଷାବ୍ୟବସ୍ଥା କଡ଼ାକଡ଼ି କରିବାକୁ ଦାବି କରିଛନ୍ତି।
About the Author
