କିଭ୍: ରୁଷର କ୍ଷେପଣାସ୍ତ୍ର ଏବଂ ଡ୍ରୋନ୍ଗୁଡ଼ିକ ମଙ୍ଗଳବାର ରାତିରୁ ବୁଧବାର ମଧ୍ୟରେ କିଭ୍ ଏବଂ ଅନ୍ୟାନ୍ୟ ୟୁକ୍ରେନୀୟ ଅଞ୍ଚଳ ଉପରେ ଭୀଷଣ ଆକ୍ରମଣ କରିଛି। ମସ୍କୋର ଏହି ସର୍ବଶେଷ ବିନାଶକାରୀ ଆକ୍ରମଣରେ ଚାରି ଜଣ ଶିଶୁଙ୍କ ସମେତ ଅତିକମରେ ୨୪ ଜଣ ସାଧାରଣ ନାଗରିକ ପ୍ରାଣ ହରାଇଥିବା ବେଳେ ପ୍ରାୟ ୬୦ ଜଣ ଆହତ ହୋଇଛନ୍ତି ବୋଲି ୟୁକ୍ରେନର ଅଧିକାରୀମାନେ କହିଛନ୍ତି। ୟୁକ୍ରେନର ରାଷ୍ଟ୍ରପତି ଭୋଲୋଡିମିର ଜେଲେନସ୍କି କହିଛନ୍ତି ଯେ, ଏକ ଆପାର୍ଟମେଣ୍ଟ ବିଲ୍ଡିଂ ଉପରେ ରୁଷର କ୍ଷେପଣାସ୍ତ୍ର ମାଡ଼ ହେବା ଫଳରେ ପ୍ରାଣ ହରାଇଥିବା ଶିଶୁମାନଙ୍କ ମଧ୍ୟରୁ ତିନି ଜଣଙ୍କ ବୟସ ୧ ବର୍ଷ ଏବଂ ଅନ୍ୟ ଜଣଙ୍କ ବୟସ ୮ ବର୍ଷ ଥିଲା। ୟୁକ୍ରେନ୍ ଏହି ଆକ୍ରମଣର ଆଶଙ୍କା କରିଥିଲା; ଜେଲେନସ୍କି ଗୋଟିଏ ଦିନ ପୂର୍ବରୁ ଚେତାବନୀ ଦେଇଥିଲେ ଯେ ଗୁଇନ୍ଦା ସଂସ୍ଥାଗୁଡ଼ିକର ରିପୋର୍ଟ ଅନୁଯାୟୀ ରୁଷ ଏକ ବୃହତ ଆକ୍ରମଣ ପାଇଁ ପ୍ରସ୍ତୁତି ଚଳାଇଛି। ଯଦିଓ ୟୁକ୍ରେନ୍ ଏହି ଆସନ୍ତା ଆକ୍ରମଣ ବିଷୟରେ ଜାଣିଥିଲା- ଯାହା ଋଷର ରାଷ୍ଟ୍ରପତି ଭ୍ଲାଦିମିର ପୁଟିନ୍ଙ୍କ ୭୪ତମ ଜନ୍ମଦିନ ସହିତ ମେଳ ଖାଉଥିଲା – ତଥାପି ଏହାକୁ ସମ୍ପୂର୍ଣ୍ଣ ରୂପେ ପ୍ରତିହତ କରିପାରି ନଥିଲା। ଏହି ମୃତ୍ୟୁ ଏବଂ କ୍ଷୟକ୍ଷତି ଦର୍ଶାଉଛି ଯେ ମସ୍କୋର ବର୍ଦ୍ଧିତ ବୋମାବର୍ଷଣରେ ବ୍ୟବହୃତ ବାଲିଷ୍ଟିକ୍ କ୍ଷେପଣାସ୍ତ୍ର ଏବଂ ନୂତନ ଜେଟ୍-ଚାଳିତ ଡ୍ରୋନ୍?ର ମୁକାବିଲା କରିବାରେ ୟୁକ୍ରେନ୍ କେତେ କଠିନ ପରିସ୍ଥିତିର ସମ୍ମୁଖୀନ ହେଉଛି। ଆମେରିକା-ନିର୍ମିତ “ପାଟ୍ରିୟଟ୍’ ବାୟୁ ପ୍ରତିରକ୍ଷା ବ୍ୟବସ୍ଥା ପାଇଁ ଆବଶ୍ୟକ ଗୁଳିଗୋଳା ଅଭାବରୁ ୟୁକ୍ରେନ୍ ଋଷର ବାଲିଷ୍ଟିକ୍ ଅସ୍ତ୍ରଶସ୍ତ୍ରକୁ ଅଟକାଇ ପାରୁନାହିଁ। ମସ୍କୋର ଉଚ୍ଚ ଉଚ୍ଚତାରେ ଉଡ଼ୁଥିବା ଜେଟ୍-ଚାଳିତ ଡ୍ରୋନ୍?ଗୁଡ଼ିକୁ ଧରିବା ପାଇଁ ଯଥେଷ୍ଟ ଦ୍ରୁତଗାମୀ ନୂତନ ପିଢ଼ିର ଇଣ୍ଟରସେପ୍ଟର ବିକାଶ କରିବାକୁ ଏହା ପ୍ରୟାସ କରୁଛି। ରୁଷ ଏବଂ ୟୁକ୍ରେନର ଉତ୍ତର ଚେର୍ନିହିଭ୍ ଅଞ୍ଚଳର ପ୍ରିଲୁକି ଠାରେ ଏକ ଆପାର୍ଟମେଣ୍ଟ ବ୍ଲକ୍ ଉପରେ ହୋଇଥିବା ରୁଷୀୟ ଆକ୍ରମଣରେ ୧୮ ଜଣ ଲୋକଙ୍କ ମୃତ୍ୟୁ ଘଟିଛି।
About the Author
