ନୂଆଦିଲ୍ଲୀ: ଭାରତୀୟ ନାଗରିକତ୍ୱ ପାଇବାର ତିନି ବର୍ଷ ପୂର୍ବେ (୧୯୮୦ ମସିହାରେ) କଥିତ ଭାବେ ଜାଲ୍ କାଗଜପତ୍ର ବ୍ୟବହାର କରି ଭୋଟର ତାଲିକାରେ ନିଜ ନାମ ସାମିଲ କରିବା ଅଭିଯୋଗରେ କଂଗ୍ରେସ ନେତ୍ରୀ ସୋନିଆ ଗାନ୍ଧୀଙ୍କ ବିରୁଦ୍ଧରେ ଏଫଆଇଆର ପଞ୍ଜୀକରଣ କରିବାକୁ ମନା କରିଥିବା ମାଜିଷ୍ଟ୍ରେଟ୍ କୋର୍ଟଙ୍କ ନିର୍ଦ୍ଦେଶକୁ ଦିଲ୍ଲୀର ଏକ କୋର୍ଟ ସୋମବାର ଦିନ ରଦ୍ଦ କରିଦେଇଛନ୍ତି। ଦ୍ୱାରକା କୋର୍ଟର ସ୍ୱତନ୍ତ୍ର ବିଚାରପତି ବିଶାଲ ଗୋଗ୍ନେ କହିଛନ୍ତି ଯେ ଉକ୍ତ ନିର୍ଦ୍ଦେଶରେ ଯଥାର୍ଥ କାରଣର ଅଭାବ ଥିଲା ଏବଂ ଏହା ଏକ “ନନ୍-ସ୍ପିକିଂ ଅର୍ଡର’ ଅର୍ଥାତ୍ କାରଣ ଦର୍ଶାଯାଇନଥିବା ନିର୍ଦ୍ଦେଶ ଥିଲା। କୋର୍ଟ ଏହି ମାମଲାକୁ କୋର୍ଟକୁ ଫେରାଇ ଦେଇଛନ୍ତି ଏବଂ ନିର୍ଦ୍ଦେଶ ଦେଇଛନ୍ତି ଯେ ସମ୍ପୃକ୍ତ ପକ୍ଷମାନଙ୍କ ଯୁକ୍ତି ଶୁଣିବା, ତଦନ୍ତ କରିବା ଏବଂ ସମ୍ପୃକ୍ତ ପୋଲିସ୍ ଅଧିକାରୀଙ୍କ ମତାମତ ନେବା ପରେ ଏକ ଯୁକ୍ତିଯୁକ୍ତ ନିର୍ଦ୍ଦେଶ ଜାରି କରାଯାଉ। ବିଚାରପତି କହିଛନ୍ତି, “ଚ୍ୟାଲେଞ୍ଜ କରାଯାଇଥିବା ନିର୍ଦ୍ଦେଶରେ ଆଇନଗତ ତ୍ରୁଟି ରହିଛି କାରଣ ଏଥିରେ ଭାରତୀୟ ନାଗରିକ ସୁରକ୍ଷା ସଂହିତାର ଧାରା ୧୭୫(୩)ର ପାଳନ କରାଯାଇନାହିଁ; ବିଶେଷକରି ସମ୍ପୃକ୍ତ ପୋଲିସ୍ ଅଧିକାରୀଙ୍କ ଯୁକ୍ତି ଶୁଣାଯାଇନାହିଁ କିମ୍ବା ସମ୍ପୃକ୍ତ ଥାନାରୁ ଷ୍ଟାଟସ୍ ରିପୋର୍ଟ (ସ୍ଥିତି ରିପୋର୍ଟ) ମଗାଯାଇନାହିଁ।’ ସେ କହିଛନ୍ତି ଯେ ନିର୍ଦ୍ଦେଶରେ କାରଣ ଦର୍ଶାଯାଇନଥିବା (ନନ୍-ସ୍ପିକିଂ) କଥା ସ୍ପଷ୍ଟ ଥିଲା କାରଣ ମାଜିଷ୍ଟ୍ରେଟ୍ ଆଇନ ଅନୁଯାୟୀ ଥିବା ଦୁଇଟି ବିକଳ୍ପ ଉପରେ ବିଚାର କରିନଥିଲେ। ସେ କହିଛନ୍ତି ଯେ ମାଜିଷ୍ଟ୍ରେଟ୍ ଆଇନଗତ ଦୁଇଟି ବିକଳ୍ପ – ଯଥା ଏଫ୍ଆଇଆର୍ ପଞ୍ଜୀକରଣ ପାଇଁ ନିର୍ଦ୍ଦେଶ ଦେବା କିମ୍ବା ବିଏନ୍ଏସ୍ଏସ୍ ଅଧୀନରେ କାର୍ଯ୍ୟାନୁଷ୍ଠାନ ଗ୍ରହଣ କରିବା – ଉପରେ ବିଚାର କରିନଥିବାରୁ ଉକ୍ତ ଆଦେଶଟି “କାରଣ-ବିହୀନ’ ବୋଲି ସ୍ପଷ୍ଟ ହୋଇଛି। ବିଚାରପତି କହିଛନ୍ତି ଯେ ଅଭିଯୋଗରେ କୌଣସି “କଗ୍ନିଜେବଲ୍ ଅଫେନ୍ସ’ (ପୋଲିସ ବିନା ୱାରେଣ୍ଟରେ ଗିରଫ କରିପାରୁଥିବା ଅପରାଧ) ଘଟିଥିବାର ସୂଚନା ମିଳୁଛି କି ନାହିଁ, ସେହି ମୁଖ୍ୟ ବିଷୟ ଉପରେ ବିଚାର କରିବା ପରିବର୍ତ୍ତେ ମାଜିଷ୍ଟ୍ରେଟ୍ ନାଗରିକତ୍ୱ ପ୍ରସଙ୍ଗ ଆଡ଼କୁ ଧ୍ୟାନ ଦେଇଥିଲେ। ନୂତନ ଯୁକ୍ତି ଶୁଣିବା ପରେ ଏକ ଯୁକ୍ତିଯୁକ୍ତ ଆଦେଶ ପ୍ରଦାନ କରିବା ପାଇଁ କୋର୍ଟ ଏହି ମାମଲାକୁ ପୁନର୍ବାର ମାଜିଷ୍ଟ୍ରେଟ୍ଙ୍କ ନିକଟକୁ ପଠାଇଛନ୍ତି। ଏହି ମାମଲା ସେପ୍ଟେମ୍ବର ୨୯ ତାରିଖରେ ଏସିଜେଏମ୍ଙ୍କ ନିକଟରେ ତାଲିକାଭୁକ୍ତ ହେବ। ବିକାଶ ତ୍ରିପାଠୀ ଏହି “ରିଭିଜନ୍ ପିଟିସନ୍’ ଦାଖଲ କରିଥିଲେ; ସେ ଅଭିଯୋଗ କରିଛନ୍ତି ଯେ ଭାରତୀୟ ନାଗରିକତ୍ୱ ଗ୍ରହଣ କରିବା ପୂର୍ବରୁ ସୋନିଆ ଗାନ୍ଧୀଙ୍କ ନାମ ଭୋଟର ତାଲିକାରେ ଅନ୍ତର୍ଭୁକ୍ତ କରାଯାଇଥିଲା। ସେ ଏହି ଘଟଣାରେ ଏଫ୍ଆଇଆର୍ ପଞ୍ଜୀକରଣ କରିବାକୁ ଦାବି କରୁଛନ୍ତି।
About the Author
