କୋଲକାତା: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)- ୨୦୨୬ର ଷଷ୍ଠ ମ୍ୟାଚ୍ରେ କୋଲକାତା ନାଇଟ୍ ରାଇଡର୍ସକୁ ସନ୍ରାଇଜର୍ସ ହାଇଦ୍ରାବାଦ୍ ୬୫ ରନ୍ରେ ପରାସ୍ତ କରିଛି। ଇଡେନ୍ ଗାର୍ଡେନ୍ସରେ ଗୁରୁବାର ହୋଇଥିବା ଏହି ମୁକାବିଲାରେ କୋଲକାତା ଟିମ୍ ୧୬ ଓଭରରେ ସମସ୍ତ ୱିକେଟ୍ ହରାଇ ୧୬୧ ରନ୍ କରିଛି। ଈଶାନ କିଶନଙ୍କ ନେତୃତ୍ୱରେ ହାଇଦ୍ରାବାଦ୍ ନିର୍ଦ୍ଧାରିତ ୨୦ ଓଭରରେ ୮ଟି ୱିକେଟ୍ ହରାଇ ୨୨୬ ରନ୍ ସଂଗ୍ରହ କରିଥିଲା। ଫଳରେ କୋଲକାତାକୁ ଏହି ମ୍ୟାଚ୍ ବିଜୟ ପାଇଁ ୨୨୭ ରନ୍ର ଲକ୍ଷ୍ୟ ମିଳିଥିଲା। ହାଇଦ୍ରାବାଦ୍ ପାଇଁ ହେନ୍ରିକ୍ କ୍ଲାସେନ୍ ଅର୍ଦ୍ଧଶତକ ହାସଲ କରିଛନ୍ତି। ହାଇଦ୍ରାବାଦ ପାଇଁ ହେନ୍ରିକ୍ କ୍ଲାସେନ୍ ସର୍ବାଧିକ ବ୍ୟକ୍ତିଗତ ସ୍କୋର କରିଥିଲେ। ସେ ୩୫ଟି ବଲ୍ ଖେଳି ୫୨ ରନ୍ ସଂଗ୍ରହ କରିଥିଲେ, ଯେଉଁଥିରେ ୩ଟି ଚୌକା ଏବଂ ଗୋଟିଏ ଛକା ସାମିଲ ଥିଲା। ହାଇଦ୍ରାବାଦ୍ ପାଇଁ ପ୍ରାରମ୍ଭିକ ବ୍ୟାଟର ଟ୍ରାଭିସ୍ ହେଡ୍ ଏବଂ ଅଭିଷେକ ଶର୍ମା ପ୍ରଥମ ୱିକେଟ୍ରେ ୮୨ ରନ୍ ଭାଗିଦାରୀ କରିଥିଲେ। ଟ୍ରାଭିସ୍ ହେଡ୍ ଆଉଟ୍ ହୋଇ ପାଭିଲିଅନ୍ ଫେରିଯିବା ପୂର୍ବରୁ ବ୍ୟକ୍ତିଗତ ଭାବେ ୪୬ ରନ୍ ସଂଗ୍ରହ କରିଥିଲେ। ସେ ୨୧ଟି ବଲ୍ ଖେଳି ୬ଟି ଚୌକା ଏବଂ ୩ଟି ଛକା ମଧ୍ୟ ମାରିଥିଲେ। ଅଭିଷେକ ଶର୍ମା ଦଳ ପାଇଁ ୪୮ ରନ୍ ସଂଗ୍ରହ କରିଥିଲେ। ସେ କୋଲକାତାର ତୃତୀୟ ୱିକେଟ୍ର ଶିକାର ହୋଇଥିଲେ। ୨୧ଟି ବଲ୍ ଖେଳି ୪ଟି ଚୌକା ଏବଂ ୪ଟି ଛକା ମାରିଥିଲେ। ଯୁବ ବ୍ୟାଟର ନିତିଶ କୁମାର ରେଡ୍ଡୀ ବ୍ୟକ୍ତିଗତ ଭାବେ ୩୯ ରନ୍ ସଂଗ୍ରହ କରିଥିଲେ। ସେ ୨୪ଟି ବଲ୍ ଖେଳି ୪ଟି ଚୌକା ଏବଂ ଗୋଟିଏ ଛକା ମାରିଥିଲେ। ଅଧିନାୟକ ଈଶାନ କିଶନ ୯ଟି ବଲ୍ ଖେଳି ୩ଟି ଚୌକା ସହାୟତାରେ ୧୪ ରନ୍ ସଂଗ୍ରହ କରିଥିଲେ। କୋଲକାତା ପାଇଁ ବ୍ଲେସିଂ ମୁଜରୱାନି ସର୍ବାଧିକ ୪ଟି ୱିକେଟ୍ ନେଇଥିଲା ବେଳେ ବୈଭବ ଅରୋରାଙ୍କୁ ୨ଟି ୱିକେଟ୍ ମିଳିଥିଲା। କାର୍ତ୍ତିକ ତ୍ୟାଗୀ ଏବଂ ଅନୁକୂଳ ରୟ ଗୋଟିଏ ଲେଖାଏଁ ୱିକେଟ୍ ଅକ୍ତିଆର କରିଥିଲେ।
About the Author
