ପୁରୀ: ଜୁଲାଇ ୧୬ ତାରିଖ ବିଶ୍ୱପ୍ରସିଦ୍ଧ ଶ୍ରୀଗୁଣ୍ଡିଚା ଯାତ୍ରା । ଚତୁର୍ଦ୍ଧାମୂର୍ତ୍ତି ଶ୍ରୀମନ୍ଦିର ରତ୍ନ ସିଂହାସନ ଛାଡି ସିଂହଦ୍ୱାର ନିକଟରୁ ତିନିରଥରେ ଚଢି ଶ୍ରୀଗୁଣ୍ଡିଚା ମନ୍ଦିର ଜନ୍ମବେଦୀକୁ ଯାତ୍ରା କରିବେ । ଅକ୍ଷୟ ତୃତୀୟା ଠାରୁ ନେତ୍ର ଉତ୍ସବ ପର୍ଯ୍ୟନ୍ତ ରଥ ନିର୍ମାଣ କାର୍ଯ୍ୟ ଜାରି ରହିବ । ରଥ ନିର୍ମାଣରେ ଭୋଇ ସେବକମାନଙ୍କ ଭୂମିକା ଗୁରୁତ୍ୱପୂର୍ଣ୍ଣ । ରଥଖଳାକୁ ବଡ ବଡ ଗଣ୍ଡି କାଠ ଆଣି ମହାରଣାଙ୍କ ନିକଟରେ ରଖିବା । ଯନ୍ତା ଗାଡରେ ତୁମ୍ବରେ ଅର ବାଡିଆ ଓ ପହି ସଂଯୋଗ କରିବା ଭୋଇ ସେବକ ମାନଙ୍କ ପ୍ରମୁଖ କାର୍ଯ୍ୟ । ରଥ ଉପରେ କାଠ ନେଇ ଯୋଗାଇବା କାର୍ଯ୍ୟ ମଧ୍ଯ କରିଥାନ୍ତି । ଭୋଇ ସେବକ ମାନଙ୍କ ପରିଚାଳନା ପାଇଁ ଭୋଇ ସର୍ଦ୍ଦାର ରହିଥାନ୍ତି । ରଥର ଗୋଟିଏ ପ୍ରର୍ଯ୍ଯାୟ ପରେ ହରିବୋଲ ପକାଇଥାନ୍ତି । ୪୨ ଟି ଚକ ନିର୍ମାଣ ପରେ ପ୍ରଥମ ହରିବୋଲ ପକାଇ ଥାନ୍ତି । ଏହିପରି ୯ ଥର ଭୋଇ ସେବକ ମାନେ ହରିବୋଲ ପକାଇଥାନ୍ତି । ରଥ ଗଡିବା ସମୟରେ ମଧ୍ଯ ଭୋଇ ସେବକ ମାନଙ୍କ ଗୁରୁତ୍ୱପୂର୍ଣ୍ଣ ଭୂମିକା ରହିଛି । ଅକ୍ଷୟ ତୃତୀୟା ପୂର୍ବରୁ ରଥଖଳାର ଚାଳି ନିର୍ମାଣ, ଦୋଳବେଦି କୋଣ କମାର ଶାଳରେ ଚାଳି ନିର୍ମାଣ ,ରଥ ନିର୍ମାଣ ଅନୁକୂଳ ପାଇଁ ୩ ଟି ଧଉରା କାଠ ରଖିବା ସହ ନିଳାଦ୍ରୀ ବିଜେ ପର୍ଯ୍ୟନ୍ତ କାର୍ଯ୍ୟ କରିଥାନ୍ତି ।
ତିନିରଥରେ ୭୭ ଜଣ ଭୋଇ ସେବକ କାର୍ଯ୍ଯ କରୁଛନ୍ତି । ତାଳଧ୍ୱଜ ରଥରେ ୨୬ ଜଣ,ନନ୍ଦିଘୋଷ ରଥରେ ୨୬ ଜଣ ଓ ଦେବଦଳନ ରଥରେ ୨୫ ଜଣ ସେବକ କାର୍ଯ୍ଯ କରନ୍ତି । ଭୋଇ ସର୍ଦ୍ଦାର ଭାବେ ରବି ଭୋଇ କାର୍ଯ୍ଯ କରୁଛନ୍ତି । ନନ୍ଦିଘୋଷ ରଥର ମୁଖ୍ଯ ଭୋଇ କାର୍ତ୍ତିକ ଭୋଇ ଓ ବିଷ୍ଣୁ ଭୋଇ । ତାଳଧ୍ୱଜ ରଥର ଦ୍ରୁବ ଭୋଇ ଓ ତିନି ଭୋଇ । ଦେବଦଳନ ରଥର ଆଲୋକ ଭୋଇ ଓ ରବି ଭୋଇ ଦାୟିତ୍ୱ ତୁଲାଉଛନ୍ତି । ଶ୍ରୀଗୁଣ୍ଡିଚା ଦିନ ଶ୍ରୀଜୀଉଙ୍କ ପହଣ୍ଡି ପାଇଁ ତିନିରଥରେ ଚାରମାଳ ବାନ୍ଧି ଥାଆନ୍ତି । ରଥ ଉପରକୁ ୧୨ଟି ଘୋଢା, ୬ଟି ସାରଥୀ ଭୋଇ ସେବକ ମାନେ ଉଠାଇଥାଆନ୍ତି । ଗଜପତିଙ୍କ ଛେରାପହଁରା ପରେ ରଥର ଚାରମାଳ ଖୋଲିଥାଆନ୍ତି । ରଥ ଚାଲିବା ସମୟରେ ଫାଳି ଓ ମୋଡ ଦଉଡି ପକାଇ ରଥ ନିୟନ୍ତ୍ରଣ କରିଥାଆନ୍ତି । ରଥ ଭାଙ୍ଗିବା ସମୟରେ ମଧ୍ଯ ଭୋଇ ସେବକ ସେବା ଯୋଗାଇ ଥାଆନ୍ତି । ନିଷ୍ଠା ଭକ୍ତିର ସହ ମହାପ୍ରଭୁଙ୍କ ସେବା କରି ନିଜକୁ ଧନ୍ଯ ମନେ କରନ୍ତି ବୋଲି ଭୋଇ ସର୍ଦ୍ଦାର ରବି ଭୋଇ ଓ ନନ୍ଦିଘୋଷ ରଥର ମୁଖ୍ଯ ଭୋଇ ସେବକ କାର୍ତ୍ତିକ ଭୋଇ କୁହନ୍ତି ।
About the Author
