ପୁରୀ:ବେଟିଂରୁ କୋଟିପତି ହୋଇଥିବା ଜଣେ ବ୍ୟକ୍ତିକୁ ଉଠାଇନେଇଛି ପୁଲିସ୍। ଏହାସହ ଅଭିଯୁକ୍ତ ନିକଟରୁ ୬୦ ଲକ୍ଷ ଟଙ୍କା ଠାବ ହୋଇଛି। ଅନ୍ଲାଇନ୍ ବେଟିଂରେ ବିପୁଳ ଅର୍ଥ ରୋଜଗାର ସନ୍ଦେହରେ ମଙ୍ଗଳବାର ରାତିରେ ସ୍ପେସାଲ୍ ସ୍କ୍ୱାଡ୍ ପୁରୀ ଟାଉନ ହଲ୍ ନିକଟରୁ ବିଶ୍ୱନାଥ ଲେଙ୍କାଙ୍କୁ ଉଠାଇ ନେଇଛି।ତଦନ୍ତ ପରେ ତାଙ୍କ ନିକଟରୁ ୬୦ ଲକ୍ଷ ଟଙ୍କା ଠାବ ହୋଇଛି। ନଗଦ ୩୦ ଲକ୍ଷ ଟଙ୍କା ସହ ବ୍ୟାଙ୍କ ଆକାଉଣ୍ଟରେ ୩୦ ଲକ୍ଷ ଟଙ୍କା ଥିବା ପୁଲିସ ଜାଣିବାକୁ ପାଇଛି। ବିଶ୍ୱନାଥଙ୍କର ପୁରୀ ମଶାଣିଚଣ୍ଡୀ ଛକରେ ଏକ ମୋବାଇଲ ମରାମତି ଦୋକାନ ରହିଛି। ବ୍ରହ୍ମପୁରର ମୁଖ୍ୟ ଅଭିଯୁକ୍ତ ସହିତ ବିଶ୍ୱନାଥଙ୍କ ସମ୍ପର୍କ ଥିବା ପୁଲିସ ସନ୍ଦେହ କରୁଛି।ବାସେଳିସାହି ଥାନାରେ ତାଙ୍କୁ ଅଟକ ରଖି ପୁଲିସ ପଚରାଉଚରା କରିବା ସହ ଆଉ ଦୁଇ ଜଣଙ୍କୁ ମଧ୍ୟ ଉଠାଇ ନେଇଛି। ଏହି ଯୁବକଙ୍କ ନିକଟରୁ ପୁଲିସ ଲକ୍ଷାଧିକ ଟଙ୍କା ଜବତ କରିବା ସହ ତାଙ୍କ ଘରୁ କାଗଜପତ୍ର ଜବତ କରିଛି। ତେବେ ଏହି ବେଟିଂରେ ଆଉ କେତେ ଜଣ ସମ୍ପୃକ୍ତ ଅଛନ୍ତି, ସେ ସଂପର୍କରେ ପୁଲିସ ତନାଘନା ଜାରି ରଖିଛି। ଜେରା ପରେ ବିଶ୍ୱନାଥଙ୍କଠାରୁ ଅନେକ ତଥ୍ୟ ହସ୍ତଗତ ହୋଇଛି। ସେ ଅନ୍ଲାଇନ୍ ଗେମ୍ ମାଧ୍ୟମରେ କୋଟି କୋଟି ଟଙ୍କା ଉପାର୍ଜନ କରିବା ସହ ସେହି ଟଙ୍କାରେ ଜମିବାଡ଼ି ଓ ଅଳଙ୍କାର କିଣିଥିବା ପୁଲିସ ସନ୍ଦେହ କରୁଛି। ପୁଲିସ ତାଙ୍କ ଘରେ ଚଢ଼ଉ କରି ଅନେକ କାଗଜପତ୍ର ଓ ନଗଦ ଟଙ୍କା ଜବତ କରିଛି। ତଦନ୍ତରେ ବାଧା ଆଶଙ୍କାରେ ପୁଲିସ ଏହି ମାମଲାରେ ଅଧିକ କିଛି ତଥ୍ୟ ଦେଇନାହିଁ।
About the Author
