ଦେଓରିଆ (ଉତ୍ତର ପ୍ରଦେଶ): ଓମାନର ପୂର୍ବ ଉପକୂଳ ନିକଟସ୍ଥ ହରମୁଜ୍ ପ୍ରଣାଳୀ ନିକଟରେ ଏକ ବାଣିଜ୍ୟିକ ଜାହାଜ ଉପରେ ହୋଇଥିବା ମିସାଇଲ୍ ଆକ୍ରମଣରେ ଉତ୍ତର ପ୍ରଦେଶର ଦେଓରିଆ ଜିଲ୍ଲାର ଜଣେ ୨୩ ବର୍ଷୀୟ ନାବିକଙ୍କ ମୃତ୍ୟୁ ଘଟିଛି। ଏହି ଘଟଣା ପରେ ଗୁରୁବାର ଦିନ ତାଙ୍କ ପରିବାର ଓ ଗ୍ରାମରେ ଶୋକର ଛାୟା ଖେଳିଯାଇଛି। ଗୌରୀ ବଜାର ଥାନା ଅନ୍ତର୍ଗତ କରମଞ୍ଜିପୁର ଅହିରୱାତୀ ଟୋଲା ଗ୍ରାମର ବାସିନ୍ଦା ତଥା ଓମ୍ ପ୍ରକାଶ ଯାଦବଙ୍କ ପୁଅ ସୁରଜ ଯାଦବ, ଏକ ବାଣିଜ୍ୟିକ ଜାହାଜରେ କାମ କରିବା ପାଇଁ ମୁମ୍ବାଇସ୍ଥିତ ଏକ କମ୍ପାନୀ ମାଧ୍ୟମରେ ଅଗଷ୍ଟ ୧୯ ତାରିଖରେ ଓମାନ ଯାଇଥିଲେ ବୋଲି ତାଙ୍କ କକା ଅବଧେଶ ଯାଦବ କହିଛନ୍ତି। ଜାହାଜଟି ଓମାନରୁ ବାହାରି ବାହାରିନ୍ ଅଭିମୁଖେ ଯାଉଥିବା ସମୟରେ ସୁରଜ ଶେଷ ଥର ପାଇଁ ନିଜ ପରିବାର ସହ କଥା ହୋଇଥିଲେ। ମାଲ୍ ବୋଝେଇ କରିବା ପରେ ଜାହାଜଟି ପୁଣି ଓମାନ ଫେରିବ ବୋଲି ସେ ସେମାନଙ୍କୁ କହିଥିଲେ। ଓମାନସ୍ଥିତ ଭାରତୀୟ ଦୂତାବାସ “ଏକ୍ସ’ ରେ ସୂଚନା ଦେଇଛି ଯେ ବୁଧବାର ଦିନ ଭାରତ ଅଭିମୁଖେ ଯାଉଥିବା ସମୟରେ “ଏମ୍ଭି କେପ୍ ଡାଓ’ ନାମକ ବାଣିଜ୍ୟିକ ଜାହାଜ ଉପରେ ଆକ୍ରମଣ ହୋଇଥିଲା। କେନ୍ଦ୍ର ବନ୍ଦର, ଜାହାଜ ଚଳାଚଳ ଓ ଜଳପଥ ମନ୍ତ୍ରୀ ସର୍ବାନନ୍ଦ ସୋନୋୱାଲ କହିଛନ୍ତି ଯେ ୧୯ ଜଣ ଭାରତୀୟ ନାଗରିକଙ୍କ ସମେତ ଜୀବିତ ଥିବା ସମସ୍ତ କର୍ମଚାରୀଙ୍କୁ ଓମାନର ରୟାଲ୍ ନୌସେନା ଦ୍ୱାରା ସୁରକ୍ଷିତ ଭାବେ ଉଦ୍ଧାର କରାଯାଇଛି ଏବଂ ସେମାନେ ବର୍ତ୍ତମାନ ସ୍ଥଳଭାଗରେ ଅଛନ୍ତି। ସୋନୋୱାଲ “ଏକ୍ସ’ରେ କହିଛନ୍ତି, “ସୁରଜ ଯାଦବଙ୍କ ମୃତଦେହ ଯେପରି ସମ୍ମାନର ସହ ଘରକୁ ଅଣାଯିବ ଏବଂ ତାଙ୍କ ପରିବାରକୁ ସମସ୍ତ ସମ୍ଭାବ୍ୟ ସହାୟତା ଯୋଗାଇ ଦିଆଯିବ, ସେଥିପାଇଁ ସରକାର ନିଶ୍ଚିତ ପଦକ୍ଷେପ ନେବେ।’ ତାଙ୍କ କକାଙ୍କ କହିବାନୁସାରେ, ଖବର ପାଇବା ଦିନଠାରୁ ସୁରଜଙ୍କ ମା’ ପୁଷ୍ପା ଦେବୀ ଅତ୍ୟନ୍ତ ମର୍ମାହତ ହୋଇପଡ଼ିଛନ୍ତି ଏବଂ ଆଘାତଜନିତ ସ୍ଥିତି ଯୋଗୁଁ ସେ ସଠିକ୍ କୁୱେତରେ କାମ କରୁଥିବା ତାଙ୍କ ବାପା, ଯିଏ ପ୍ରାୟ ତିନି ମାସ ପୂର୍ବେ ସେଠାକୁ ଯାଇଥିଲେ, ସେ ଘରକୁ ବାହାରି ସାରିଛନ୍ତି। ସୁରଜ ଚାରି ଭାଇଙ୍କ ମଧ୍ୟରେ ସବୁଠାରୁ ବଡ଼ ଥିଲେ ଏବଂ ଅବିବାହିତ ଥିଲେ। ତାଙ୍କର ତିନି ସାନ ଭାଇ – ଦଶମ ଶ୍ରେଣୀର ଛାତ୍ର ସନ୍ନି, ନବମ ଶ୍ରେଣୀର ଛାତ୍ର ସାହିଲ୍ ଏବଂ ଷଷ୍ଠ ଶ୍ରେଣୀର ଛାତ୍ର ସମୀର – ଗାଁରେ ନିଜ ମା’ ଓ ଜେଜେବାପାଙ୍କ ସହ ରୁହନ୍ତି। ଗୁରୁବାର ଦିନ ସୁରଜଙ୍କ ମୃତ୍ୟୁରେ ଶୋକ ପ୍ରକାଶ କରିବା ପାଇଁ ସମ୍ପର୍କୀୟ, ପଡ଼ୋଶୀ ଏବଂ ଗ୍ରାମବାସୀମାନେ ତାଙ୍କ ଘରେ ଏକାଠି ହୋଇଥିଲେ। ଜଣେ ପଡ଼ୋଶୀ ରମେଶ ଚନ୍ଦ୍ର ଯାଦବ କହିଛନ୍ତି ଯେ ସୁରଜ ଜଣେ ମେଧାବୀ ଛାତ୍ର ଥିଲେ; ସେ ମର୍ଚାଣ୍ଟ ନେଭି ଚାକିରି ପାଇଁ ଲିଖିତ ପରୀକ୍ଷା ଓ ସାକ୍ଷାତକାରରେ ଉତ୍ତୀର୍ଣ୍ଣ ହୋଇଥିଲେ ଏବଂ ଗତ ଅଗଷ୍ଟ ୧୯ ତାରିଖରେ ହିଁ କାର୍ଯ୍ୟରେ ଯୋଗ ଦେଇଥିଲେ। ଜୁଲାଇ ମାସରେ ହରମୁଜ୍ ପ୍ରଣାଳୀ ରେ ବାଣିଜ୍ୟିକ ଜାହାଜଗୁଡ଼ିକ ଉପରେ ଆକ୍ରମଣ ପରେ, କେନ୍ଦ୍ର ସରକାର ସଂଘର୍ଷପୂର୍ଣ୍ଣ ଅଞ୍ଚଳରେ କାର୍ଯ୍ୟ କରୁଥିବା ଭାରତୀୟ ନାବିକମାନଙ୍କ ସୁରକ୍ଷା ସମ୍ପର୍କରେ ସମୀକ୍ଷା କରିଥିଲେ। ସୋନୋୱାଲଙ୍କ ଅଧ୍ୟକ୍ଷତାରେ ହୋଇଥିବା ଏକ ଉଚ୍ଚସ୍ତରୀୟ ସମୀକ୍ଷା ବୈଠକରେ ହରମୁଜ୍ ପ୍ରଣାଳୀ ଭଳି ସଂଘର୍ଷପୂର୍ଣ୍ଣ ଅଞ୍ଚଳରେ ଭାରତୀୟ ନାବିକମାନଙ୍କୁ ସୁରକ୍ଷା ଦେବା ପାଇଁ “ସିଫେର-ର୍ଫାଷ୍ଟ’ ପଦକ୍ଷେପ ଆରମ୍ଭ କରାଯାଇଥିଲା।
About the Author
