ମୁମ୍ବାଇ: ଦିବଂଗତ ସେଲିବ୍ରିଟି ମ୍ୟାନେଜର ଦିଶା ସାଲିଆନ୍ଙ୍କ ପିତା ସତୀଶ ସାଲିଆନ୍ , ଶିବସେନା (ୟୁବିଟି) ନେତା ଆଦିତ୍ୟ ଠାକରେ ଏବଂ ଏନସିପି (ଏସପି) ନେତା ଅନିଲ ଦେଶମୁଖଙ୍କୁ ୫୦୦ କୋଟି ଟଙ୍କାର ମାନହାନି ନୋଟିସ୍ ପଠାଇଛନ୍ତି। ୨୦୨୦ ମସିହାରେ ଘଟିଥିବା ଦିଶା ସାଲିଆନ୍ଙ୍କ ମୃତ୍ୟୁ ଘଟଣାର ପୁନଃତଦନ୍ତ ପାଇଁ ସିବିଆଇ ଦ୍ୱାରା ହତ୍ୟା ଓ ଅପରାଧିକ ଷଡ଼ଯନ୍ତ୍ର ସମ୍ବନ୍ଧୀୟ ଧାରା ଅଧୀନରେ ଏକ ନୂତନ ଏଫଆଇଆର୍ ରୁଜୁ କରାଯିବା ପରେ ଏହି ଆଇନଗତ ନୋଟିସ୍ ଜାରି କରାଯାଇଛି। ସତୀଶ ଏହି ଆଇନଗତ ନୋଟିସ୍ ଜାରି କରିଛନ୍ତି। ସେ ଅଭିଯୋଗ କରିଛନ୍ତି ଯେ ପ୍ରମୁଖ ରାଜନୈତିକ ବ୍ୟକ୍ତିବିଶେଷଙ୍କ ଦ୍ୱାରା ଦିଆଯାଇଥିବା ସାର୍ବଜନୀନ ବୟାନ ତାଙ୍କର ସମ୍ମାନ ଓ ସଚ୍ଚୋଟତାକୁ କ୍ଷୁଣ୍ଣ କରିଛି। ରିପୋର୍ଟ ଅନୁଯାୟୀ ସିବିଆଇର ତଦନ୍ତ ପରିସରରେ ଅଭିନେତା ଡିନୋ ମୋରିଆ, ସୁରଜ ପଞ୍ଚୋଲି ଏବଂ ରିୟା ଚକ୍ରବର୍ତ୍ତୀଙ୍କ ସମେତ ପୋଷ୍ଟ-ମର୍ଟମ୍ ପ୍ରକ୍ରିୟା ସହ ଜଡ଼ିତ ଚିକିତ୍ସା କର୍ମଚାରୀମାନଙ୍କ ଭୂମିକାର ଯାଞ୍ଚ ଆବଶ୍ୟକ ବୋଲି ଦର୍ଶାଯାଇଛି। ଆଦିତ୍ୟ ଠାକରେଙ୍କ ବିରୁଦ୍ଧରେ ଅଭିଯୋଗ କରାଯାଇଛି ଯେ ସେ ସତୀଶ ସାଲିଆନ୍ଙ୍କ କୋର୍ଟ ଆବେଦନକୁ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ, ଦୁର୍ଭାବନାପୂର୍ଣ୍ଣ ଏବଂ ରାଜନୈତିକ ସମ୍ମାନ କ୍ଷୁଣ୍ଣ କରିବା ପାଇଁ ଏକ ଗୁପ୍ତ ଉଦ୍ଦେଶ୍ୟ ଦ୍ୱାରା ପରିଚାଳିତ ବୋଲି ବର୍ଣ୍ଣନା କରିଥିଲେ। ଏହି ଆଇନଗତ ଦସ୍ତାବିଜରେ ୨୩ ମାର୍ଚ୍ଚ ୨୦୨୫ରେ ଦେଶମୁଖ ଦେଇଥିବା ଏକ ବୟାନର ମଧ୍ୟ ଉଲ୍ଲେଖର ୮ ଜୁନ୍ ୨୦୨୦ରେ ମୁମ୍ବାଇର ମଲାଡ୍ ଅଞ୍ଚଳରେ ଥିବା ଏକ ଉଚ୍ଚ-ଅଟ୍ଟାଳିକାରୁ ତଳକୁ ଖସିପଡ଼ି ୨୮ ବର୍ଷୀୟା ଦିଶା ସାଲିଆନ୍ଙ୍କ ମୃତ୍ୟୁ ଘଟିଥିଲା। ଏହାକୁ ନେଇ ମୁମ୍ବାଇ ପୋଲିସ ପ୍ରାରମ୍ଭିକ ପର୍ଯ୍ୟାୟରେ ଏକ ଅଘଟଣଜନିତ ମୃତ୍ୟୁ ମାମଲା ରୁଜୁ କରିଥିଲା। ଏହାର ଛଅ ଦିନ ପରେ, ଅର୍ଥାତ୍ ୧୪ ଜୁନ୍ ୨୦୨୦ରେ ଅଭିନେତା ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁ ହୋଇଥିଲା, ଯାହାଙ୍କ ପାଇଁ ଦିଶା ସାଲିଆନ୍ ଜଣେ ସେଲିବ୍ରିଟି ମ୍ୟାନେଜର ଭାବରେ କାର୍ଯ୍ୟ କରୁଥିଲେ। ତାଙ୍କ ପିତା ସତୀଶ ସାଲିଆନ୍ ପ୍ରଥମେ କୌଣସି ଅପରାଧିକ ଷଡ଼ଯନ୍ତ୍ରର ସନ୍ଦେହ କରିନଥିଲେ, କିନ୍ତୁ ପରବର୍ତ୍ତୀ ସମୟରେ ସେ ବମ୍ବେ ହାଇକୋର୍ଟରେ ଆବେଦନ କରି ଗଣ-ଦୁଷ୍କର୍ମ ଓ ହତ୍ୟା ଭଳି ଅଭିଯୋଗର ତଦନ୍ତ ପାଇଁ ଏଫ୍ଆଇଆର୍ ଦାଏର କରିବାକୁ ଦାବି କରିଥିଲେ। ଆଦିତ୍ୟ ଠାକରେ ଦିଶା ସାଲିଆନ୍ଙ୍କ ସହ କୌଣସି ସମ୍ପର୍କ ଥିବା କିମ୍ବା ଏହି ଘଟଣାରେ ତାଙ୍କର କୌଣସି ସମ୍ପୃକ୍ତି ଥିବା କଥାକୁ ଅସ୍ୱୀକାର କରିଛନ୍ତି। “ଏକ୍ସ’ ରେ ପ୍ରକାଶିତ ଏକ ବିବୃତ୍ତିରେ ଠାକରେ କହିଛନ୍ତି ଯେ ସେ କେବେ ବି ଦିଶା ସାଲିଆନ୍ଙ୍କୁ ଭେଟି ନାହାନ୍ତି କିମ୍ବା ତାଙ୍କ ସହ ତାଙ୍କର କୌଣସି ପରିଚୟ ନାହିଁ। ଗତ ଛଅ ବର୍ଷ ଧରି ଏହି ମାମଲା ସହ ତାଙ୍କ ନାମକୁ ବାରମ୍ବାର ଯୋଡ଼ିବାକୁ ସେ ବ୍ୟକ୍ତିଗତ ଓ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ଏବଂ ତଥ୍ୟହୀନ “ଚରିତ୍ର ସଂହାର’ର ଏକ ଉଦ୍ଦେଶ୍ୟମୂଳକ ପ୍ରୟାସ ବୋଲି ବର୍ଣ୍ଣନା କରିଛନ୍ତି। ଠାକରେ ଦାବି କରିଛନ୍ତି ଯେ କୌଣସି ଦ୍ୱେଷପୂର୍ଣ୍ଣ ରାଜନୈତିକ ବାଧାବିଘ୍ନ ବିନା କେବଳ ତଥ୍ୟ ଆଧାରରେ ଏହି ମାମଲାର ସରକାରୀ ପୁନଃ-ତଦନ୍ତ କରାଯିବା ଉଚିତ।
About the Author
