ନୂଆଦିଲ୍ଲୀ: ଗୁରୁବାର ଦିନ ବିଭିନ୍ନ ରାଜନୈତିକ ଦଳର ନେତାମାନେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ତାଙ୍କର ୭୬ତମ ଜନ୍ମଦିନରେ ଶୁଭେଚ୍ଛା ଜଣାଇବା ସହ ତାଙ୍କର ୨୫ ବର୍ଷର ସାର୍ବଜନୀନ କାର୍ଯ୍ୟକାଳକୁ ଉଲ୍ଲେଖ କରିଥିଲେ। ରାଷ୍ଟ୍ରପତି ଦ୍ରୌପଦୀ ମୁର୍ମୁ ତାଙ୍କର ଶାସନ ଦକ୍ଷତାକୁ ପ୍ରଶଂସା କରିଥିବାବେଳେ, ଗୃହମନ୍ତ୍ରୀ ଅମିତ ଶାହ ଜଣେ ସାଧାରଣ ବିଜେପି କର୍ମୀରୁ ଦେଶର ସର୍ବୋଚ୍ଚ ରାଜନୈତିକ ପଦବୀ ପର୍ଯ୍ୟନ୍ତ ମୋଦୀଙ୍କ ଯାତ୍ରାକୁ ସ୍ମରଣ କରିଥିଲେ। ଉପ-ରାଷ୍ଟ୍ରପତି ସି.ପି. ରାଧାକୃଷ୍ଣନ୍ ଭାରତକୁ ବିଶ୍ୱର ଅନ୍ୟତମ ଦ୍ରୁତ ଅଭିବୃଦ୍ଧିଶୀଳ ପ୍ରମୁଖ ଅର୍ଥନୀତି ଭାବରେ ଗଢ଼ି ତୋଳିବାରେ ମୋଦୀଙ୍କ ଭୂମିକାକୁ ଗୁରୁତ୍ୱ ଦେଇଥିଲେ। ଅନ୍ୟପକ୍ଷରେ, ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରବାବୁ ନାଇଡୁ କହିଥିଲେ ଯେ ଗୁଜୁରାଟର ମୁଖ୍ୟମନ୍ତ୍ରୀ ପଦରୁ ପ୍ରଧାନମନ୍ତ୍ରୀ ହେବା ପର୍ଯ୍ୟନ୍ତ ତାଙ୍କ ଯାତ୍ରା “ଭାରତର ବିକାଶ ଯାତ୍ରାକୁ ଏକ ନୂତନ ଗତି ପ୍ରଦାନ କରିଛି’। କଂଗ୍ରେସ ସଭାପତି ମଲ୍ଲିକାର୍ଜୁନ ଖାଡ଼ଗେ ଏବଂ ଲୋକସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀ ମଧ୍ୟ ମୋଦୀଙ୍କ ଦୀର୍ଘ ଓ ନିରାମୟ ଜୀବନ କାମନା କରିଥିଲେ। ୧୯୫୦ ମସିହା ସେପ୍ଟେମ୍ବର ୧୭ ତାରିଖରେ ଗୁଜରାଟର ଭଡନଗରରେ ଜନ୍ମଗ୍ରହଣ କରିଥିବା ମୋଦୀ ଗୁରୁବାର ଦିନ ୭୬ ବର୍ଷ ବୟସରେ ପଦାର୍ପଣ କରିଛନ୍ତି। ୨୦୦୧ରେ ପ୍ରଥମେ ଗୁଜରାଟର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିବା ଏବଂ ପରେ ୨୦୧୪ରେ ପ୍ରଧାନମନ୍ତ୍ରୀ ହେବା ପରେ, ସେ ଅକ୍ଟୋବର ୭ ତାରିଖ ସୁଦ୍ଧା ସାର୍ବଜନୀନ ପଦବୀରେ ୨୫ ବର୍ଷର ନିରବଚ୍ଛିନ୍ନ କାର୍ଯ୍ୟକାଳ ପୂରଣ କରିବେ। ଜନ୍ମଦିନର ବାର୍ତ୍ତାରେ ରାଷ୍ଟ୍ରପତି ମୁର୍ମୁ କହିଛନ୍ତି ଯେ ମୁଖ୍ୟମନ୍ତ୍ରୀ ଏବଂ ପ୍ରଧାନମନ୍ତ୍ରୀ ଭାବରେ ନିଜ କାର୍ଯ୍ୟକାଳ ମଧ୍ୟରେ ମୋଦୀ ସୁଶାସନ ପାଇଁ ଅନେକ ନୂତନ ମାନଦଣ୍ଡ ସ୍ଥାପନ କରିଛନ୍ତି ଏବଂ “ଅନ୍ତର୍ଭୁକ୍ତମୂଳକ ବିକାଶକୁ ଅଭୂତପୂର୍ବ ଗତି ଓ ଏକ ନୂତନ ଦିଗ’ ପ୍ରଦାନ କରିଛନ୍ତି। ରାଧାକୃଷ୍ଣନ୍ କହିଛନ୍ତି ଯେ ମୋଦୀଙ୍କ ଦ୍ୱାରା ପଛୁଆ ଜିଲ୍ଲାଗୁଡ଼ିକୁ ଆକାଂକ୍ଷାୀ ଜିଲ୍ଲା, ସୀମାବର୍ତ୍ତୀ ଗ୍ରାମଗୁଡ଼ିକୁ ସକ୍ରିୟ ଓ ପ୍ରଥମ ଗ୍ରାମ ଏବଂ ଉତ୍ତର-ପୂର୍ବ ଭାରତକୁ ଅଷ୍ଟଲକ୍ଷ୍ମୀ ଭାବରେ ସମ୍ବୋଧିତ କରିବା, ଭୌଗୋଳିକ ଅବହେଳାକୁ ସଶକ୍ତିକରଣରେ ପରିଣତ କରିବାର ଏକ ଦୃଷ୍ଟିକୋଣକୁ ପ୍ରତିଫଳିତ କରେ। ସେ କହିଲେ, ଗତ ବର୍ଷ ମଧ୍ୟରେ, ବିଭିନ୍ନ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳ ଗସ୍ତ କରିବା ସମୟରେ, ମୁଁ ନିଜେ ଦେଖିବାକୁ ପାଇଲି ଯେ କିପରି ଏହି ପରିବର୍ତ୍ତନଶୀଳ ପଦକ୍ଷେପଗୁଡ଼ିକ ଆମ ଦେଶର ସବୁଠାରୁ ଦୂର-ଦୂରାନ୍ତ ଅଞ୍ଚଳରେ ମଧ୍ୟ ପହଞ୍ଚୁଛି। ଶାହ ମୋଦୀଙ୍କୁ ଅକ୍ଳାନ୍ତ ପରିଶ୍ରମ, ତ୍ୟାଗ ଏବଂ ଦୂରଦୃଷ୍ଟିର ପ୍ରତୀକ ବୋଲି ବର୍ଣ୍ଣନା କରି କହିଲେ ଯେ ତାଙ୍କ ଜୀବନ ଦେଶ ସେବାରେ ଉତ୍ସର୍ଗୀକୃତ। ସେ କହିଲେ, ମୋଦୀଜୀଙ୍କ ଜୀବନ – ଯିଏ କର୍ମକୁ ନିଜର ସାଧନା ଏବଂ ଦେଶ ସେବାକୁ ନିଜ ଜୀବନର ଲକ୍ଷ୍ୟ ଭାବରେ ଗ୍ରହଣ କରିଛନ୍ତି – ତାହା ତପସ୍ୟା, ତ୍ୟାଗ ଏବଂ ଅଟଳ ସଂକଳ୍ପର ଏକ ମହାନ କାହାଣୀ। ଶାହ କହିଲେ, ସେବା ଏବଂ ଉତ୍ସର୍ଗୀକୃତ ଭାବନାରେ ପରିପୂର୍ଣ୍ଣ ତାଙ୍କର ଏହି ଯାତ୍ରା କୋଟି କୋଟି ଦେଶବାସୀଙ୍କ ପାଇଁ ପ୍ରେରଣାର ଉତ୍ସ ଅଟେ। ବିଜେପି ଏବଂ ସରକାରରେ ମୋଦୀଙ୍କ ଅଗ୍ରଗତି ବିଷୟରେ ଉଲ୍ଲେଖ କରି ଶାହ କହିଲେ ଯେ ଜଣେ ସାଧାରଣ ସ୍ୱେଚ୍ଛାସେବୀରୁ ମୁଖ୍ୟମନ୍ତ୍ରୀ ଏବଂ ପରେ ପ୍ରଧାନମନ୍ତ୍ରୀ ହେବା ପର୍ଯ୍ୟନ୍ତ ତାଙ୍କ ଯାତ୍ରା ଦର୍ଶାଏ ଯେ ଯେତେବେଳେ ଦେଶ ସେବା ଜୀବନର ଲକ୍ଷ୍ୟ ହୁଏ, ସେତେବେଳେ ସବୁଠାରୁ କଠିନ ସଂକଳ୍ପ ମଧ୍ୟ ପୂରଣ ହୋଇପାରିବ। ସେ କହିଲେ, ମୁଁ ଭଗବାନଙ୍କ ନିକଟରେ ପ୍ରାର୍ଥନା କରୁଛି ଯେ ସେ ଦୀର୍ଘାୟୁ ଓ ସୁସ୍ଥ ରୁହନ୍ତୁ ଏବଂ ତାଙ୍କ ନେତୃତ୍ୱରେ ଦେଶ ବିକାଶର ନୂତନ ଶିଖର ଛୁଇଁବା ସହ ୨୦୪୭ ସୁଦ୍ଧା ଏକ ବିକଶିତ ଭାରତର ଲକ୍ଷ୍ୟ ହାସଲ ଦିଗରେ ଆଗକୁ ବଢୁ। ଲୋକସଭା ବାଚସ୍ପତି ଓମ୍ ବିର୍ଲା କହିଲେ ଯେ ମୋଦୀଙ୍କ ନେତୃତ୍ୱରେ ଭାରତ ବିଶ୍ୱସ୍ତରରେ ଏକ ନୂତନ ପରିଚୟ ସୃଷ୍ଟି କରୁଛି ଏବଂ ବିକାଶ, ଆତ୍ମନିର୍ଭରଶୀଳତା, ନବସୃଜନ, ସେବା, ସଂକଳ୍ପ ଏବଂ ସୁଶାସନ ସମ୍ପର୍କିତ ଆପଣଙ୍କ ଦୃଷ୍ଟିକୋଣ ସାରା ଦେଶର ୧୪୦ କୋଟି ନାଗରିକଙ୍କୁ ଅନୁପ୍ରାଣିତ କରିବାରେ ଲାଗିଛି ବୋଲି ନାଇଡୁ କହିବା ସହ ମୋଦୀଙ୍କ ଦୀର୍ଘ ଓ ନିରାମୟ ଜୀବନ କାମନା କରି ଭଗବାନ ଭେଙ୍କଟେଶ୍ୱରଙ୍କ ନିକଟରେ ପ୍ରାର୍ଥନା କରିଥିଲେ। ଖାର୍ଗେ ମଧ୍ୟ ମୋଦୀଙ୍କୁ ତାଙ୍କ ଜନ୍ମଦିନ ଅବସରରେ ଶୁଭେଚ୍ଛା ଜଣାଇଥିଲେ। ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଜୀଙ୍କୁ ତାଙ୍କ ଜନ୍ମଦିନରେ ଶୁଭେଚ୍ଛା। ସେ ଉତ୍ତମ ସ୍ୱାସ୍ଥ୍ୟ ଓ ଦୀର୍ଘାୟୁର ଅଧିକାରୀ ହୁଅନ୍ତୁ ବୋଲି କଂଗ୍ରେସ ସଭାପତି କହିଥିଲେ। ଗାନ୍ଧୀ ମଧ୍ୟ ଏକ୍ସ (ଢ) ମାଧ୍ୟମରେ ପ୍ରଧାନମନ୍ତ୍ରୀଙ୍କୁ ଶୁଭେଚ୍ଛା ଜଣାଇଥିଲେ। ସେ କହିଥିଲେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜୀଙ୍କୁ ଜନ୍ମଦିନର ଶୁଭେଚ୍ଛା। ଆପଣଙ୍କ ଉତ୍ତମ ସ୍ୱାସ୍ଥ୍ୟ ଓ ଦୀର୍ଘ ଜୀବନ କାମନା କରୁଛି। ଜେଡି(ୟୁ) ମୁଖ୍ୟ ତଥା ବିହାରର ପୂର୍ବତନ ମୁଖ୍ୟମନ୍ତ୍ରୀ ନୀତୀଶ କୁମାର ମଧ୍ୟ ମୋଦୀଙ୍କୁ ଶୁଭେଚ୍ଛା ଜଣାଇ ତାଙ୍କର ସୁସ୍ଥ ଓ ଦୀର୍ଘ ଜୀବନ କାମନା କରିଥିଲେ। ବିଜେପି ନେତା ନିତିନ୍ ନବୀନ୍ ମୋଦୀଙ୍କୁ ଦେଶ ପ୍ରତି ଉତ୍ସର୍ଗୀକୃତ ଭାବନା ଓ ସେବାର ପ୍ରତୀକ ବୋଲି ବର୍ଣ୍ଣନା କରିଥିଲେ। ସାର୍ବଜନୀନ ଜୀବନରେ ମୋଦୀଙ୍କ ୨୫ ବର୍ଷ ପୂର୍ତ୍ତି ଅବସରରେ ବିଜେପି କାଶୀ ଅଞ୍ଚଳରେ ସେପ୍ଟେମ୍ବର ୧୭ରୁ ଅକ୍ଟୋବର ୧୭ ପର୍ଯ୍ୟନ୍ତ ଏକ ମାସ ବ୍ୟାପୀ ‘ସେବା ସଂକଳ୍ପ ଅଭିଯାନ’ ଆରମ୍ଭ କରିବାକୁ ଯାଉଛି। ଏହି ଅଭିଯାନ ସେବା, ସୁଶାସନ, କଲ୍ୟାଣ ଏବଂ ଏକ ବିକଶିତ ଭାରତର ଦୃଷ୍ଟିକୋଣ ଉପରେ ଧ୍ୟାନ କେନ୍ଦ୍ରିତ କରିବ। ଏହି ଅଭିଯାନର ଏକ ମୁଖ୍ୟ ଆକର୍ଷଣ ହେବ କାଶୀରୁ ଭଡନଗର ପର୍ଯ୍ୟନ୍ତ ଏକ ବାଇକ୍ ଯାତ୍ରା, ଯାହା ସେପ୍ଟେମ୍ବର ୧୭ରେ ଆରମ୍ଭ ହୋଇ ଅକ୍ଟୋବର ୭ ତାରିଖ ଆଖପାଖରେ ମୋଦୀଙ୍କ ଜନ୍ମସ୍ଥାନରେ ଶେଷ ହେବ।
About the Author
