କଳାହାଣ୍ଡି: ବିଦ୍ୟୁତ୍ ତାର ଲାଗି ମା’ ଓ ଝିଅଙ୍କ ମୃତ୍ୟୁକୁ ନେଇ କଳାହାଣ୍ଡିରେ ଚାଞ୍ଚଲ୍ୟ ସୃଷ୍ଟି ହୋଇଛି। ଭବାନୀପାଟଣା ସଦର ଥାନା ଅନ୍ତର୍ଗତ କର୍ଲାଶୋଡା ଗାଁରେ ଘଟିଥିବା ଏହି ଅଭାବନୀୟ ଘଟଣାରେ ମୃତକ ଦୁଇଜଣ ହେଲେ ଲଳିତା ନାଏକ ଓ ତାଙ୍କ ଝିଅ ଶୀତଳ ନାଏକ। ପରିବାରବର୍ଗଙ୍କ କହିବା ଅନୁଯାୟୀ, ବିଦ୍ୟୁତ୍ ତାର ସଂସ୍ପର୍ଶରେ ମା’ ଲଳିତା ନାଏକ ଆସିଥିବା ବେଳେ ତାଙ୍କୁ ବଞ୍ଚାଇବାକୁ ଯାଇ ଝିଅ ଶୀତଳ ମଧ୍ୟ ବିଦ୍ୟୁତ୍ ଆଘାତର ଶିକାର ହୋଇଥିଲେ। ଉଭୟଙ୍କୁ ଗୁରୁତର ଅବସ୍ଥାରେ ଚିକିତ୍ସା ପାଇଁ ନେବାକୁ ଆମ୍ବୁଲାନ୍ସ ଡକାଯାଇଥିଲା। ତେବେ ଆମ୍ବୁଲାନ୍ସ ବିଳମ୍ବରେ ପହଞ୍ଚିବାରୁ ପରିବାରଲୋକେ ଶେଷରେ ଏକ ଅଟୋ ଯୋଗେ ମା’ ଓ ଝିଅଙ୍କୁ ମେଡିକାଲକୁ ନେଇଥିବା ଅଭିଯୋଗ ହୋଇଛି। ମେଡିକାଲରେ ପହଞ୍ଚିବା ପରେ ମଧ୍ୟ ଉଭୟଙ୍କୁ ଆବଶ୍ୟକ ଚିକିତ୍ସା ମିଳିନଥିବା ପରିବାରବର୍ଗ ଅଭିଯୋଗ କରିଛନ୍ତି। ଚିକିତ୍ସାରେ ଅବହେଳା ଓ ବିଳମ୍ବ ଯୋଗୁଁ ମା’ ଓ ଝିଅଙ୍କ ମୃତ୍ୟୁ ଘଟିଥିବା ନେଇ ପରିବାର ପକ୍ଷରୁ ଅଭିଯୋଗ କରାଯାଇଛି। ତେବେ ମୃତ୍ୟୁର ପ୍ରକୃତ କାରଣ ଏବଂ ଚିକିତ୍ସାରେ କୌଣସି ଅବହେଳା ହୋଇଥିଲା କି ନାହିଁ, ତାହା ତଦନ୍ତ ପରେ ସ୍ପଷ୍ଟ ହେବ। ଘଟଣାକୁ ନେଇ ପରିବାର ଓ ସମ୍ପର୍କୀୟଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ଦୁଇ ମୃତଦେହକୁ ଧରି ପରିବାରଲୋକେ କଳାହାଣ୍ଡି ଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚି ଘେରାଉ କରିଥିଲେ। ଆମ୍ବୁଲାନ୍ସ ବିଳମ୍ବର କାରଣ ଓ ମେଡିକାଲରେ କଥିତ ଚିକିତ୍ସା ଅବହେଳାର ତଦନ୍ତ କରି ଦାୟୀ ବ୍ୟକ୍ତିଙ୍କ ବିରୋଧରେ ତୁରନ୍ତ ପଦକ୍ଷେପ ନେବା ସହ ପରିବାରକୁ ନ୍ୟାୟ ଦେବାକୁ ସେମାନେ ଦାବି କରିଥିବା ଜଣାପଡ଼ିଛି। ଖବର ପାଇ ଘଟଣାସ୍ଥଳରେ ଭବାନୀପାଟଣା ଟାଉନ ଥାନା ପୋଲିସ ଓ ତହସିଲଦାର ପହଞ୍ଚି ପରିବାରବର୍ଗଙ୍କ ସହ ଆଲୋଚନା କରି ସ୍ଥିତି ନିୟନ୍ତ୍ରଣ କରିବାକୁ ଉଦ୍ୟମ କରିଥିଲେ। ଘଟଣାର ପ୍ରକୃତ କାରଣ, ଆମ୍ବୁଲାନ୍ସ ସେବାରେ ବିଳମ୍ବ ହୋଇଥିଲା କି ନାହିଁ ଏବଂ ଚିକିତ୍ସାରେ କୌଣସି ଅବହେଳା ହୋଇଥିଲା କି ନାହିଁ—ଏସବୁ ଦିଗରେ ନିରପେକ୍ଷ ତଦନ୍ତ ହେଲେ ଘଟଣାର ସତ୍ୟାସତ୍ୟ ସାମ୍ନାକୁ ଆସିପାରିବ। ମା’ ଓ ଝିଅଙ୍କ ମୃତ୍ୟୁକୁ ନେଇ କର୍ଲାଶୋଡା ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଥିବା ବେଳେ ଜିଲ୍ଲାପାଳ କାର୍ଯ୍ୟାଳୟ ପରିସରରେ ମଧ୍ୟ କିଛି ସମୟ ପାଇଁ ଉତ୍ତେଜନା ପ୍ରକାଶ ପାଇଥିଲା।
About the Author
