ନୂଆଦିଲ୍ଲୀ: ଭାରତୀୟ କ୍ରିକେଟ୍ର ଅନ୍ୟତମ ଶ୍ରେଷ୍ଠ ଅଲ୍ରାଉଣ୍ଡର ଯୁବରାଜ ସିଂହଙ୍କ ସଂପର୍କରେ ଏକ ରୋଚକ ତଥା ପ୍ରେରଣାଦାୟୀ କଥା ଜଣାପଡ଼ିଛି। ୨୦୧୧ରେ ତାଙ୍କ କର୍କଟ ରୋଗ ଏତେ ଗୁରୁତର ହୋଇଯାଇଥିଲା ଯେ ସେ ଆଉ ମାତ୍ର ୩ରୁ ୬ ମାସ ବଞ୍ଚିବେ ବୋଲି ଡାକ୍ତର କହିସାରିଥିଲେ। ଏହା ସତ୍ତ୍ୱେ ସେ କର୍କଟ ସହ ଲଢ଼େଇ କରି ବିଜୟୀ ହେବା ସହ କ୍ରିକେଟ୍ ପଡ଼ିଆକୁ ଫେରିଥିଲେ। ମାଇକେଲ୍ ଭନ୍ଙ୍କ ସହ ଏକ ପଡ୍କାଷ୍ଟରେ ଯୁବରାଜ ନିଜେ ଏ ସମ୍ପର୍କରେ ପ୍ରକାଶ କରିଛନ୍ତି। ସେ କହିଛନ୍ତି ଯେ ୨୦୧୧ ବିଶ୍ୱକପ୍ରେ ସେ ଯନ୍ତ୍ରଣା ସତ୍ତ୍ୱେ ଖେଳିଥିଲେ। ବିଶ୍ୱକପ୍ ପରେ ଭାରତୀୟଦଳ ୱେଷ୍ଟ୍ଇଣ୍ଡିଜ୍ ଗସ୍ତ ଲାଗି ପ୍ରସ୍ତୁତ ହେଉଥିବା ବେଳେ ଦିଲ୍ଲୀରେ ଡାକ୍ତର ନିତେଶ ରୋହତଗୀ କହିଥିଲେ ଯେ ତାଙ୍କ ହୃତ୍ପିଣ୍ଡ ଓ ଫୁସଫୁସ୍ ମଝିରେ ଟ୍ୟୁମରରହିଛି। ଯଦି ସେ ଖେଳିବାକୁ ଯାଆନ୍ତି ତେବେ ହୃଦ୍ଘାତ ହୋଇପାରେ। ଯଥାଶୀଘ୍ର କେମୋଥେରାପି କରାନଗଲେ ଆଉ ମାତ୍ର ୩ରୁ ୬ ମାସ ବଞ୍ଚିବାର ଆଶଙ୍କା ରହିଛି। ଡାକ୍ତରଙ୍କ ସତର୍କବାଣୀ ପରେ ହିଁ ଯୁବରାଜ ଆମେରିକା ଯାଇ ଚିକିତ୍ସା ଆରମ୍ଭ କଲେ। ସେ କହିଛନ୍ତି, ଆମେରିକାରେ ଚିକିତ୍ସିତ ହେବା ସମୟରେ ସେ ନିଜର ମନୋବଳ କାଏମ ରଖିବାକୁ କ୍ରିକେଟ୍ ଭିଡିଓ ଦେଖୁଥିଲେ। ଏହି ସମୟରେ ଦଳୀୟ ସାଥୀ ସଚିନ ତେନ୍ଦୁଲକର ଓ ଅନୀଲ କୁମ୍ବଲେ ତାଙ୍କୁ ଦେଖିବାକୁ ଯାଇଥିଲେ। ତେବେ କ୍ରିକେଟ୍ ଦେଖି ନିଜର ମନକୁ ଚାପଗ୍ରସ୍ତ ନ କରିବାକୁ କୁମ୍ବଲେ ପରାମର୍ଶ ଦେଇଥିଲେ ବୋଲି ସେ କହିଛନ୍ତି।
About the Author
