ପୁରୀ: କେନ୍ଦ୍ରୀୟ ସଂସ୍କୃତ ବିଶ୍ୱବିଦ୍ୟାଳୟ, ଶ୍ରୀ ସଦାଶିବ ପରିସରର ବାର୍ଷିକୋତ୍ସବ ଏବଂ ସୁଭଦ୍ରା ମହିଳା ଛାତ୍ରାବାସ ଓ ମହର୍ଷି ବାଲ୍ମୀକି ପୁରୁଷ ଛାତ୍ରାବାସର ଯୁଗ୍ମ ‘ଛାତ୍ରାବାସ ଦିବସ’ ସ୍ଥାନୀୟ ଜୟଦେବ ଭବନ ପରିସରରେ ମହାସମାରୋହରେ ଅନୁଷ୍ଠିତ ହୋଇଯାଇଛି।?ଏହି ସାରସ୍ୱତ ସମାରୋହରେ ପରିସର ନିର୍ଦ୍ଦେଶକ ପ୍ରଫେସର ପ୍ରଭାତ କୁମାର ମହାପାତ୍ର ଅଧ୍ୟକ୍ଷତା କରିଥିଲେ। ସେ ନିଜ ଅଭିଭାଷଣରେ କହିଥିଲେ ଯେ, “ଶିକ୍ଷା କେବଳ ପୁସ୍ତକଗତ ଜ୍ଞାନ ନୁହେଁ, ବରଂ ଏହା ବ୍ୟକ୍ତିତ୍ୱର ସାମଗ୍ରିକ ବିକାଶର ଏକ ମାଧ୍ୟମ। ଆମର ଏହି ପରିସର ସଂସ୍କୃତ ଶିକ୍ଷା ସହିତ ସଂସ୍କାର ଓ ସଂସ୍କୃତିର ପ୍ରଚାର ପ୍ରସାର ପାଇଁ ସଦାସର୍ବଦା ଚେଷ୍ଟିତ। କାର୍ଯ୍ୟକ୍ରମରେ ସ୍ୱାମୀ ଜୀବନମୁକ୍ତାନନ୍ଦ ପୁରୀ ଜୀ ମୁଖ୍ୟ ଅତିଥି ଭାବେ ଯୋଗଦେଇ ଶ୍ରୀଜଗନ୍ନାଥ ସଂସ୍କୃତି ଓ ସଂସ୍କୃତ ଭାଷାର ମହତ୍ତ୍ୱ ଉପରେ ଆଲୋକପାତ କରିଥିଲେ। ସେ କହିଥିଲେ ଯେ, “ଜଗନ୍ନାଥ ସଂସ୍କୃତି ହେଉଛି ବିଶ୍ୱଜନୀନ ଭାତୃଭାବର ପ୍ରତୀକ ଏବଂ ସଂସ୍କୃତ ହେଉଛି ସେହି ମହାନ ଜ୍ଞାନର ବାହକ। ଛାତ୍ରଛାତ୍ରୀମାନେ ନିଜ ଜୀବନରେ ଏହି ଆଧ୍ୟାତ୍ମିକ ଓ ଶାସ୍ତ୍ରୀୟ ମୂଲ୍ୟବୋଧକୁ ଗ୍ରହଣ କରିବା ଉଚିତ।?ଶ୍ରୀ ଜଗନ୍ନାଥ ସଂସ୍କୃତ ବିଶ୍ୱବିଦ୍ୟାଳୟର କୁଳପତି ପ୍ରଫେସର ଜି.ଏସ୍.ଭି. ଦତ୍ତାତ୍ରେୟ ମୂର୍ତ୍ତି ସାରସ୍ୱତ ଅତିଥି ଭାବେ ଯୋଗଦେଇ ଛାତ୍ରଛାତ୍ରୀମାନଙ୍କୁ ମାର୍ଗଦର୍ଶନ କରିଥିଲେ। ସେ ଉଲ୍ଲେଖ କରିଥିଲେ ଯେ, “ଆଧୁନିକ ଜ୍ଞାନକୌଶଳ ସହ ପ୍ରାଚୀନ ଶାସ୍ତ୍ରର ସମନ୍ୱୟ ରକ୍ଷା କରିପାରିଲେ ହିଁ ସମାଜର ପ୍ରକୃତ ପ୍ରଗତି ସମ୍ଭବ ହେବ। ?କାର୍ଯ୍ୟକ୍ରମ ପ୍ରାରମ୍ଭରେ ଡ. ବେଣୁଧର ଦାଶ ବେଦପାଠ କରିଥିବା ବେଳେ ଡ. ସୁଶାନ୍ତ ରାୟ ସ୍ୱାଗତ ଭାଷଣ ପ୍ରଦାନ କରିଥିଲେ। ଏହି ସମଗ୍ର କାର୍ଯ୍ୟକ୍ରମର ସଂଯୋଜକ ପ୍ରଫେସର ଗଣପତି ଶୁକ୍ଳ ଥିବାବେଳେ ସହ-ସଂଯୋଜକ ଅଧ୍ୟାପିକା ଡ. ବିଜୟଲକ୍ଷ୍ମୀ ମହାପାତ୍ର କାର୍ଯ୍ୟ ନିର୍ବାହ କରିଥିଲେ।ପରିସରର ସହଯୋଗୀ ନିର୍ଦ୍ଦେଶକ ପ୍ରଫେସର ବିଜୟପାଲ କଛୱା ମଞ୍ଚରେ ଉପସ୍ଥିତ ରହି ଅଧ୍ୟାୟୀ ମାନଙ୍କୁ ଆଶୀର୍ବଚନ ପ୍ରଦାନ କରିଥିଲେ ।ଏହି ଅବସରରେ ବିଭିନ୍ନ ପ୍ରତିଯୋଗିତାରେ କୃତୀ ଛାତ୍ରଛାତ୍ରୀମାନଙ୍କୁ ଡ. ଆଶିଷ ଜୋଶୀଙ୍କ ସଂଯୋଜନାରେ ପୁରସ୍କାର ବିତରଣ କରାଯାଇଥିଲା। ସମଗ୍ର କାର୍ଯ୍ୟକ୍ରମକୁ ଡ. ସୁବ୍ରତ ଷଡ଼ଙ୍ଗୀ ସୁଚାରୁରୂପେ ସଂଯୋଜନା କରିଥିଲେ। ଶେଷରେ ଡ. ଜ୍ୟୋତିପ୍ରସାଦ ଦାଶ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ। ଏହି ଉତ୍ସବରେ ପରିସରର ସମସ୍ତ ଅଧ୍ୟାପକ, କର୍ମଚାରୀ ଓ ଛାତ୍ରଛାତ୍ରୀ ଉପସ୍ଥିତ ରହି ସାଂସ୍କୃତିକ କାର୍ଯ୍ୟକ୍ରମର ଆନନ୍ଦ ନେଇଥିଲେ।
About the Author
