ପୁରୀ: କେନ୍ଦ୍ରୀୟ ସଂସ୍କୃତ ବିଶ୍ୱବିଦ୍ୟାଳୟ, ଶ୍ରୀ ସଦାଶିବ ପରିସର, ପୁରୀ ପକ୍ଷରୁ ସମର୍ଥ ନାରୀ ସମୃଦ୍ଧ ଭାରତ’ ଯୋଜନା ଅନ୍ତର୍ଗତ ଆୟୋଜିତ ପାଞ୍ଚଦିନିଆ ଚାରୁକଳା ( ଫାଇନ ଆର୍ଟସ ) କର୍ମଶାଳା ସଫଳତାର ସହ ସମ୍ପନ୍ନ ହୋଇଯାଇଛି। ବିଶ୍ୱବିଦ୍ୟାଳୟର କୁଳପତି ପ୍ରଫେସର ଶ୍ରୀନିବାସ ବରଖେଡ଼ିଙ୍କ ସଂରକ୍ଷଣରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ପରିସରର ନିର୍ଦ୍ଦେଶକ ପ୍ରଫେସର ପ୍ରଭାତ କୁମାର ମହାପାତ୍ର ଅଧ୍ୟକ୍ଷତା କରିଥିଲେ।ଜୟଦେବ ସଭାଗାରଠାରେ ଅନୁଷ୍ଠିତ ଏହି ଉଦଯାପନୀ ଉତ୍ସବରେ ମୁଖ୍ୟ ବକ୍ତା ଭାବେ ପୁରୀ ଜିଲ୍ଲା ସମାଜ କଲ୍ୟାଣ ଅଧିକାରୀ ଶ୍ରୀମତୀ ତନୁପ୍ରଭା ବେହେରା ଯୋଗଦେଇଥିଲେ। ସେହିପରି ସହଯୋଗୀ ଆଚାର୍ଯ୍ୟା ଡକ୍ଟର ନିବେଦିତା କର ବିଶିଷ୍ଟ ଅତିଥି ଭାବେ ଉପସ୍ଥିତ ରହି ଛାତ୍ରଛାତ୍ରୀଙ୍କୁ ଉତ୍ସାହିତ କରିଥିଲେ। ଅଧ୍ୟକ୍ଷ ପ୍ରଫେସର ମହାପାତ୍ର ନିଜ ଅଭିଭାଷଣରେ ସଂସ୍କୃତ ଶିକ୍ଷା ସହିତ ଚାରୁକଳାର ସମନ୍ୱୟ ଉପରେ ଗୁରୁତ୍ୱାରୋପ କରିଥିଲେ।ଡକ୍ଟର ବିକାସିନି ଗୁମାନସିଂହ ସ୍ୱାଗତ ଭାଷଣ ଦେଇଥିବା ବେଳେ ସହଯୋଗୀ ଆଚାର୍ଯ୍ୟା ଡକ୍ଟର ସାଗରିକା ନନ୍ଦ ଏକ ଭିଡିଓ ପ୍ରେଜେଣ୍ଟେସନ ମାଧ୍ୟମରେ କର୍ମଶାଳାର ବିବରଣୀ ଉପସ୍ଥାପନ କରିଥିଲେ। ଏହି ଅବସରରେ କୃତୀ ପ୍ରଶିକ୍ଷାର୍ଥୀଙ୍କୁ ପ୍ରମାଣପତ୍ର ବିତରଣ କରାଯାଇଥିଲା।ଡକ୍ଟର ଶର୍ମିଷ୍ଠା ରାଉତ କାର୍ଯ୍ୟକ୍ରମ ସଂଚାଳନ କରିଥିବା ବେଳେ ଡକ୍ଟର ରଶ୍ମି ମିଶ୍ର ଓ ଡକ୍ଟର ରାଜଶ୍ରୀ ପାଢ଼ୀ ବିଭିନ୍ନ ପର୍ଯ୍ୟାୟରେ ସହଯୋଗ କରିଥିଲେ।ଶେଷରେ ଡକ୍ଟର ମୌ ଗୋସ୍ୱାମୀ ଧନ୍ୟବାଦ ଅର୍ପଣ କରିଥିଲେ। କାର୍ଯ୍ୟକ୍ରମଟି ଅଧ୍ୟାୟୀମାନଙ୍କ ଦ୍ୱାରା କୁଳଗୀତ ଓ ମଙ୍ଗଳାଚରଣରୁ ଆରମ୍ଭ ହୋଇ ରାଷ୍ଟ୍ରଗାନ ସହ ସମ୍ପନ୍ନ ହୋଇଥିଲା।
About the Author
