ଭଞ୍ଜନଗର: ଗଂଜାମରେ ପୁଣି ମୁଣ୍ଡଟେକିଲା, ଗୁଣି ସନ୍ଦେହ । ଜଣେ ବୟସ୍କ ବ୍ୟକ୍ତିଙ୍କୁ ଗାଁରେ ବାନ୍ଧି ନିସ୍ତୁକ ମାଡ଼ ମାରିଲେ କିଛି ଲୋକ । ଅଭିଯୋଗ ପରେ, ବନ୍ଧା ହେଲେ ୧୦ ଅଭିଯୁକ୍ତ । ବେଲଗୁଣ୍ଠା ଥାନା ଅନ୍ତର୍ଗତ ମଙ୍ଗଳପୁର ପଞ୍ଚାୟତର ବେଲପୁଞ୍ଜି ଗାଁରେ ଘଟିଛି ଏଭଳି ନାରକୀୟ ଘଟଣା । ଅନ୍ୟପକ୍ଷରେ ଗୁରୁତର ବ୍ୟକ୍ତିଙ୍କୁ ଘଟଣା ସ୍ଥଳରୁ ଉଧାର କରି, ବ୍ରହ୍ମପୁର ମେଡ଼ିକାଲକୁ ଚିକିତ୍ସା ପାଇଁ ପଠାଇଛି ପୋଲିସ । ଆହତ ବ୍ୟକ୍ତି ଜଣକ, ଏହି ଥାନା ଅନ୍ତର୍ଗତ ଚଢିଆପାଲି ଗ୍ରାମ ଢେପସାହିର ଗୋପାଳକୃଷ୍ଣ ସେଠୀ । ରବିବାର ବିଳମ୍ବିତ ରାତିରେ ଘଟିଛି ଏହି ଘଟଣା । ଥାନାଧିକାରୀ ରେବତୀ ଶବର ଦେଇଥିବା ସୂଚନା ପ୍ରକାରେ, ଆହତ ବ୍ୟକ୍ତିଙ୍କ ପୁଅ ଜ୍ୟୋତିର୍ମୟ ସେଠୀ, ବେଲଗୁଣ୍ଠା ଥାନାରେ ପ୍ରଥମେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପ୍ରକାରେ, ତାଙ୍କ ବାପା ଗୋପାଳକୃଷ୍ଣ ଜଣେ ଅବସରପ୍ରାପ୍ତ ଶିକ୍ଷକ । ସେ ମାନସିକ ବିକୃତ ଅବସ୍ଥାରେ ଚାରିଆଡ଼େ ବୁଲୁଥିଲେ । ସେହି କ୍ରମରେ ଘଟଣା ଦିନ, ସେ ବେଲ ପୁଞ୍ଜି ଗାଁ ନିକଟରେ ଥିବା ଏକ ମନ୍ଦିରରେ ରାତି ରହିଥିଲେ । ରାତିରେ ତାଙ୍କର ଚାଲିଚଳନ ଏବଂ ବେଶଭୂଷା ଦେଖି ଗାଁର କିଛି ଲୋକ, ତାଙ୍କୁ ଗୁଣିଆ ସନ୍ଦେହ କରିଥିଲେ । ଏହାପରେ ତାଙ୍କର ହାତ ବାନ୍ଧି ନିସ୍ତୁକ ମାଡ଼ ମାରିଥିଲେ । ପରେ ସେ ଧରିଥିବା ଫୋନ୍ ଜରିଆରେ, ତାଙ୍କ ଘର ଲୋକଙ୍କୁ ଖବର ଦେଇଥିଲେ । ଏନେଇ ଆହତଙ୍କ ପୁଅ ଜ୍ୟୋତିର୍ମୟ ସେଠୀ, ବେଲଗୁଣ୍ଠା ଥାନାକୁ ଖବର ଦେବା ସହ ଲିଖିତ ଅଭିଯୋଗ କରିଥିଲେ । ଏଥିରେ ବେଲପୁଞ୍ଜି ଗ୍ରାମର ପ୍ରାୟ ୨୦ ରୁ ଉର୍ଦ୍ଧ୍ୱ ପୁରୁଷ ସଂପୃକ୍ତ ଥିବା ଜାଣିବା ପରେ, ଘଟଣା ସ୍ଥଳରେ ପୋଲିସ ପହଞ୍ଚି ପ୍ରଥମେ ଆହତଙ୍କୁ ଉଧାର କରି, ମେଡିକାଲ କୁ ପଠାଇଥିଲେ । ଏବଂ କିଛି ଲୋକଙ୍କୁ ଥାନାକୁ ଆଣି ଜେରା କରିବା ସହ ସୋମବାର ସନ୍ଧ୍ୟାରେ ସେମାନଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ଏନେଇ ଥାନା କେଶ ନମ୍ବର ୮୯/୨୬ ରେ ଏକ ମାମଲା ରୁଜୁ କରି ତଦନ୍ତ ଚଳାଇଛି ବେଲଗୁଣ୍ଠା ଥାନା ପୋଲିସ । ତେବେ ଗୁଣିଗାରେଡ଼ିକୁ ନେଇ ବ୍ୟାପକ ସଚେତନ ସତ୍ୱେ, ଲୋକଙ୍କ ଭିତରେ ଏଭଳି ମାନସିକତା ସୃଷ୍ଟି ହେବା ଏବଂ ଆଇନ୍ କୁ ହାତକୁ ନେବା ଭଳି ଘଟଣା, ଏବେ ସାଧାରଣ ମହଲରେ ଚର୍ଚ୍ଚା ଧରିଛି ।
About the Author
