ପୁରୀ: ଦର୍ଶନ ଦେବେ ପ୍ରଭୁ ଶ୍ରୀଲୋକନାଥ। ଫାଲଗୁନ ମାସ କୃଷ୍ଣପକ୍ଷ ଏକାଦଶୀରେ ଆତ୍ମା ଲିଙ୍ଗଙ୍କ ଦର୍ଶନ କରିବେ ଭକ୍ତ। ବର୍ଷକରେ ଏହି ଗୋଟିଏ ଦିନ ପ୍ରଭୁଙ୍କ ଗମ୍ଭୀରାରୁ ପଙ୍କ ଉଝାଳିବା ପରେ ଦର୍ଶନର ପୁଣ୍ୟ ଲଭିବେ ଭକ୍ତ। ସବୁଦିନ ପ୍ରଭୁ ଶ୍ରୀଲୋକନାଥ ଗମ୍ଭୀରା ମଧ୍ୟରେ ପାଣି ଭିତରେ ବୁଡ଼ି ରହୁଥିବାରୁ ଭକ୍ତ କେବଳ ଲିଙ୍ଗ ପ୍ରତିମା ଦର୍ଶନ କରନ୍ତି। ତେବେ ସ୍ୱୟଂ ମର୍ଯ୍ୟାଦାପୁରୁଷ ଶ୍ରୀରାମଚନ୍ଦ୍ର ଦର୍ଶନ କରିଥିବା ଆତ୍ମା ଲିଙ୍ଗକୁ କେବଳ ଫାଲଗୁନ କୃଷ୍ଣପକ୍ଷ ଏକାଦଶୀ ଦିନ ଦର୍ଶନ ପ୍ରାପ୍ତି ହୋଇଥାଏ। ପ୍ରଭୁ ଶ୍ରୀଲୋକନାଥଙ୍କୁ ଥରେ ଦର୍ଶନରେ ୧ ଲକ୍ଷ ଶିବ ଲିଙ୍ଗ ଦର୍ଶନ ପ୍ରାପ୍ତିର ବିଶ୍ୱାସ ଯୋଗୁଁ ଏହି ପ୍ରତୀକ୍ଷିତ ମୁହୂର୍ତ୍ୱକୁ ଚାହିଁ ବସିଛନ୍ତି ଲକ୍ଷଲକ୍ଷ ଭକ୍ତ। ଏକମାତ୍ର ଶୈବ ପୀଠ ଭାବେ ପ୍ରଭୁ ଶ୍ରୀଲୋକନାଥଙ୍କ ପୀଠରେ ପଙ୍କୋଦ୍ଧାର ଏକାଦଶୀ ପର୍ବ ପାଳନ ବିଧି ରହିଛି। ଅର୍ଥାତ୍ ଅନ୍ୟ ସମସ୍ତ ଶୈବ ପୀଠରେ ପ୍ରଭୁଙ୍କୁ ଲାଗି ହେଉଥିବା ବେଲପତ୍ର, ପାଣି, ପ୍ରସାଦ ଆଦି କିଛି ସମୟ ପରେ କାଢ଼ି ସଫା କରାଯାଏ। ଅଥଚ ପ୍ରଭୁ ଶ୍ରୀଲୋକନାଥଙ୍କ ପ୍ରତିମା ନିକଟରେ ଏହି ଲାଗି ସାମଗ୍ରୀ ବର୍ଷ ତମାମ ରହିଥାଏ। ଫାଲଗୁନ ଏକାଦଶୀରେ ଏହାକୁ କାଢ଼ି ସଫା କରାଯିବା ପରେ ଦର୍ଶନ ପାଇଁ ଭକ୍ତଙ୍କ ସୁଅ ଛୁଟେ। ଏ ନେଇ ଶ୍ରୀଲୋକନାଥଙ୍କ ମନ୍ଦିରରେ ସ୍ୱତନ୍ତ୍ର ନୀତିକାନ୍ତି ଚୂଡ଼ାନ୍ତ ହୋଇଛି। ରାତି ସାଢ଼େ ୧୨ଟାରେ ପହୁଡ଼ ଖୋଲିବା ପରେ ଅନ୍ୟ ନୀତିକାନ୍ତି ହୋଇ ଭୋର ୪ଟାରୁ ସକାଳ ୮ଟା ପର୍ଯ୍ୟନ୍ତ ପଙ୍କୋଦ୍ଧାର ହେବ। ଏହାପରେ ମାଘସ୍ନାନ କରାଯାଇ ଦିନ ୧୨ଟାରୁ ସର୍ବସାଧାରଣ ଦର୍ଶନ ଆରମ୍ଭ ହେବ।
ଲିଙ୍ଗରେ ଲାଉ ଢାଙ୍କିଥିଲେ ଶ୍ରୀରାମଚନ୍ଦ୍ର
କିମ୍ବଦନ୍ତୀ ରହିଛି ଯେ, ସ୍ୱୟଂମର୍ଯ୍ୟାଦା ପୁରୁଷୋତ୍ତମ ପ୍ରଭୁ ଶ୍ରୀରାମଚନ୍ଦ୍ର ଶ୍ରୀଲୋକନାଥଙ୍କୁ ପ୍ରଥମେ ଏହି ଫାଲଗୁନ କୃଷ୍ଣପକ୍ଷ ଏକାଦଶୀରେ ଦର୍ଶନ କରିଥିଲେ। ସେଥିପାଇଁ ଏହି ଦିନର ବିଶେଷ ମହତ୍ତ୍ୱ ରହିଛି। ଶ୍ରୀଲୋକନାଥ ମନ୍ଦିର ବୋର୍ଡର ସମ୍ପାଦକ ସନ୍ତୋଷ କୁମାର ପଣ୍ଡା କହିଛନ୍ତି, ପ୍ରଭୁ ଶ୍ରୀରାମଚନ୍ଦ୍ର ଅରଣ୍ୟରେ ବୁଲୁଥିବା ବେଳେ ଏକ ଜାଗାରେ ପଙ୍କରୁ ସୁଗନ୍ଧ ଓ ଜ୍ୟୋତି ବାହାରୁଥିବା ଦେଖି ଅଟକିଗଲେ। ସାଧାରଣତଃ ପଙ୍କରୁ ଦୁର୍ଗନ୍ଧ ବାହାରେ, କିନ୍ତୁ ଏଠାରେ ସୁଗନ୍ଧ ଓ ଜ୍ୟୋତି ଦେଖିବା ପରେ ରହସ୍ୟ ଉନ୍ମୋଚନ କରିବାରୁ ଧନୁରୁ ଏକ ତୀର ନିକ୍ଷେପ କଲେ। ତୀର ବାଜିବା ପରେ ଏହା ସୁବର୍ଣ୍ଣରେ ପରିଣତ ହେଲା। ଶିବ ଲିଙ୍ଗ ବୋଲି ଜାଣିବା ପରେ ଶ୍ରୀରାମଚନ୍ଦ୍ର କ୍ଷମା ମାଗିଥିଲେ। ଏକ ଲାଉ ଆଣି ଲିଙ୍ଗରେ ଢାଙ୍କି ଦେଇଥିଲେ। ସେଦିନ ପ୍ରଭୁ ଶ୍ରୀରାମଚନ୍ଦ୍ର ଆତ୍ମା ଲିଙ୍ଗଙ୍କୁ ଦର୍ଶନ କରିଥିବାରୁ ଏହିଦିନ ଭକ୍ତମାନେ ଦର୍ଶନ କରି ପୁଣ୍ୟ ଅର୍ଜନ କରିବାର ବିଶ୍ୱାସ ରହିଛି।
୪ହଜାର ଟିକେଟ, ଦାମ ୧୦୦ ଟଙ୍କା
ପଙ୍କୋଦ୍ଧାର ଏକାଦଶୀରେ ସର୍ବସାଧାରଣ ଦର୍ଶନ ବାଦ୍, ସୁବିଧା ଦର୍ଶନ ପାଇଁ ସ୍ୱତନ୍ତ୍ର ଟିକେଟ ବ୍ୟବସ୍ଥା କରାଯାଇଛି। ଏକାଦଶୀରେ ଦର୍ଶନ ପାଇଁ ମୋଟ ୪ ହଜାର ଟିକେଟ ବିକ୍ରି ହେବ। ଟିକେଟର ଦାମ ୧୦୦ ଟଙ୍କା ରଖାଯାଇଛି। ଟିକେଟ ଧାରୀମାନେ ରୋଷଘର ପଛପଟେ ପ୍ରବେଶ କରି ଗମ୍ଭୀରା ପାଖକୁ ଯାଇ ଦର୍ଶନ କରି ବଉଳ ଗଛ ଦ୍ୱାର ବାଟେ ପ୍ରସ୍ଥାନ କରିବେ। ସର୍ବସାଧାରଣ ଭକ୍ତ ସିଂହଦ୍ୱାର ବାଟେ ପ୍ରବେଶ କରି ଲକ୍ଷ୍ମୀ ଦ୍ୱାର ଦେଇ ଗମ୍ଭୀରାରେ ପ୍ରଭୁଙ୍କ ଦର୍ଶନ କରି ବଉଳଗଛ ପାଖ ଦ୍ୱାର ଦେଇ ପ୍ରସ୍ଥାନ କରିବେ।
About the Author
