ନୂଆଦିଲ୍ଲୀ: ପ୍ରଥମଥର ପାଇଁ ଚଳିତ ବର୍ଷ କେନ୍ଦ୍ରୀୟ ବଜେଟ୍ ରବିବାର ଦିିନ ଉପସ୍ଥାପନ ହେବ। କିଛି ବର୍ଷ ହେଲା ଫେବ୍ରୁଆରୀ ୧ ତାରିଖରେ ସଂସଦରେ ସାଧାରଣ ବଜେଟ୍ ଆଗତ ହେବା ପରମ୍ପରା ଚାଲିଆସୁଛି। ନୂଆ ଆର୍ଥିକ ବର୍ଷ ଏପ୍ରିଲ ୧ ତାରିଖରୁ ଆରମ୍ଭ ହେଉଥିବାରୁ ବଜେଟ୍ର ନିଷ୍ପତ୍ତି କାର୍ଯ୍ୟକାରିତା ପାଇଁ ଢେର ସମୟ ମିଳିଥାଏ। ତେବେ ଚଳିତ ଥର ଏ ସଂକ୍ରାନ୍ତରେ ଏକ ନୂଆ ଅଧ୍ୟାୟ ସୃଷ୍ଟି ହେବାକୁ ଯାଉଛି। କାରଣ ରବିବାର ଦିନ ସଂସଦ ବନ୍ଦ ରହୁଥିବା ହେତୁ ଏଥର ଫେବ୍ରୁଆରୀ ୧ ତାରିଖ ରବିବାରରେ ପଡ଼ୁଥିବାରୁ ବଜେଟ୍ ଉପସ୍ଥାପନ ନେଇ ଦ୍ୱନ୍ଦ୍ୱ ସୃଷ୍ଟି ହୋଇଥିଲା। ତେବେ ଏହି ଦ୍ୱନ୍ଦ୍ୱର ସମାଧାନ କରିଛନ୍ତି ଲୋକସଭା ବାଚସ୍ପତି ଓମ୍ ବିରଲା। ସେ କହିଛନ୍ତି ଫେବ୍ରୁଆରୀ ୧ ତାରିଖ ରବିବାର ଦିନ ପୂର୍ବାହ୍ଣ ୧୧ଟା ସମୟରେ ଅର୍ଥମନ୍ତ୍ରୀ କେନ୍ଦ୍ରୀୟ ବଜେଟ୍ ଆଗତ କରିବେ। ଚଳିତ ମାସରେ ଭାରତ ଆୟୋଜନ କରୁଥିବା ବାଚସ୍ପତି ଓ ପ୍ରିଜାଇଡିଂ ଅଫିସରମାନଙ୍କ ରାଜ୍ୟଗୋଷ୍ଠୀ ସମ୍ମିଳନୀ (ସିଏସ୍ପିଓସି)ର ଅବ୍ୟବହିତ ପୂର୍ବରୁ ସାମ୍ବାଦିକମାନଙ୍କୁ ସୂଚନା ଦେବା ଅବସରରେ ଓମ୍ ବିରଲା ଏହା ସ୍ପଷ୍ଟ କରିଛନ୍ତି। ସେ କହିଛନ୍ତି ନିର୍ବାଚିତ ପ୍ରତିନିଧିମାନେ ଜଣେ ଜଣେ ଜନସେବକ ଭାବେ ବିବେଚିତ ହୁୁଅନ୍ତି। ସେହିହେତୁ ସେମାନେ କୌଣସି ବିରତି ନ ନେଇ ସବୁୁଦିନ କାର୍ଯ୍ୟ କରିବା ଆଶା କରାଯାଏ।
ଏଥର ରବିବାର ଦିନ ସାଧାରଣ ବଜେଟ୍
Leave a Reply