ନୂଆଦିଲ୍ଲୀ: ଭାରତୀୟ-ଆମେରିକୀୟ ନିତ୍ୟା ରମଣ ଲସ୍ ଆଞ୍ଜେଲସ୍ ମେୟର ନିର୍ବାଚନରେ ବର୍ତ୍ତମାନର ମେୟର କାରେନ୍ ବାସ୍ଙ୍କୁ ପରାସ୍ତ କରି ବିଜୟୀ ହୋଇଛନ୍ତି। ଲସ୍ ଆଞ୍ଜେଲସ୍ର ନେତୃତ୍ୱ ନେବାରେ ନିତ୍ୟା ରମଣ ପ୍ରଥମ ଭାରତୀୟ-ଆମେରିକୀୟ ହୋଇଛନ୍ତି। ତାଙ୍କର ଏହି ବିଜୟ ସହିତ, ଆମେରିକାର ଦୁଇଟି ବୃହତ୍ ସହରରେ ବର୍ତ୍ତମାନ ଭାରତୀୟ ବଂଶୋଦ୍ଭବ ବ୍ୟକ୍ତି ମେୟର ଭାବେ ଦାୟିତ୍ୱରେ ଅଛନ୍ତି; ଅନ୍ୟ ଜଣେ ହେଲେ ନ୍ୟୁୟର୍କର ଜୋହରାନ ମାମଦାନୀ। ଲଗାତାର ଦ୍ୱିତୀୟ କାର୍ଯ୍ୟକାଳ ପାଇଁ ପ୍ରୟାସ କରୁଥିବା ଅଭିଜ୍ଞ ନେତ୍ରୀ କାରେନ୍ ବାସ୍ଙ୍କ ବିପକ୍ଷରେ ଲଢ଼ିବା ବେଳେ, ରମଣ ଯୁକ୍ତି ବାଢ଼ିଥିଲେ ଯେ ଲସ୍ ଆଞ୍ଜେଲସ୍କୁ ଏକ ନୂତନ ଏବଂ କାର୍ଯ୍ୟ-ଆଧାରିତ ନେତୃତ୍ୱର ଆବଶ୍ୟକତା ରହିଛି। ଅଧିକ ଭୋଟରଙ୍କ ନିକଟତର ହେବା ପାଇଁ ସେ ପୋଲିସ ବ୍ୟବସ୍ଥା ଏବଂ ବାସହୀନ ସମସ୍ୟା ଭଳି କିଛି ପ୍ରସଙ୍ଗରେ ନିଜର ପୂର୍ବ ଆଭିମୁଖ୍ୟରେ ପରିବର୍ତ୍ତନ ଆଣିଥିଲେ। “ଏକ୍ସ’ ରେ ଏକ ବିବୃତ୍ତି ଜାରି କରି ରମଣ କହିଛନ୍ତି ଯେ, ଲସ୍ ଆଞ୍ଜେଲସ୍ର ମେୟର ଭାବେ ସେବା କରିବାର ସୁଯୋଗ ପାଇ ସେ ନିଜକୁ ଅତ୍ୟନ୍ତ ସମ୍ମାନିତ ମନେ କରୁଛନ୍ତି। ରମଣ କହିଛନ୍ତି, ମୁଁ ଏହି ସହରକୁ ଭଲପାଏ। ମୁଁ ଏଠାକାର ଲୋକଙ୍କ ଉପରେ ବିଶ୍ୱାସ ରଖେ। ଆଗକୁ ଥିବା କାମ କଷ୍ଟକର ହେବ ଏବଂ ପରିବର୍ତ୍ତନ ଆସିବାକୁ ସମୟ ଲାଗିବ। କିନ୍ତୁ ଆମେ ସମସ୍ତେ ମିଶି ଏପରି ଏକ ଭବିଷ୍ୟତ ଗଢ଼ିବାକୁ ଯାଉଛୁ, ଯାହା ଆମର ଏହି ସହର ପରି ଅତ୍ୟନ୍ତ ଚମତ୍କାର ହେବ। ଧନ୍ୟବାଦ, ଲସ୍ ଆଞ୍ଜେଲସ୍। ଚାଲନ୍ତୁ, କାମ ଆରମ୍ଭ କରିବା। ଯେତେବେଳେ ରମନ୍ ଏକ ପିଢ଼ିଗତ ପରିବର୍ତ୍ତନ ଆଣିବା ଉପରେ ଧ୍ୟାନ କେନ୍ଦ୍ରିତ କରୁଥିଲେ, ସେତେବେଳେ ବାସ୍ ନିଜର ରାଜନୈତିକ ଅସ୍ତିତ୍ୱ ବଞ୍ଚାଇବା ପାଇଁ ସଂଘର୍ଷ କରୁଥିଲେ। ନିକଟସ୍ଥ ନିର୍ବାଚନରେ ସେ କିଛି ମାତ୍ରାରେ ସମର୍ଥନ ହାସଲ କରିଥିଲେ ମଧ୍ୟ, ୨୦୨୫ ମସିହାର ଦାବାନଳ (ଜଙ୍ଗଲ ନିଆଁ) ଆରମ୍ଭ ସମୟରେ ତାଙ୍କର ଅନୁପସ୍ଥିତି ତାଙ୍କ ପାଇଁ ଏକ ବଡ଼ ସମସ୍ୟା ହୋଇ ରହିଲା; ଏହି ଘଟଣା ଯୋଗୁଁ ତାଙ୍କୁ ତୀବ୍ର ସମାଲୋଚନାର ସାମ୍ନା କରିବାକୁ ପଡ଼ିଥିଲା। ରାମନ୍ ଜଣେ ଡେମୋକ୍ରାଟିକ୍ ସୋସିଆଲିଷ୍ଟ ଏବଂ ବର୍ତ୍ତମାନ ସିଟି କାଉନସିଲ୍ର ସଦସ୍ୟ ଅଛନ୍ତି। ପ୍ରାରମ୍ଭରେ ସେ ନିଜ ଦଳର ସହଯୋଗୀ ବାସ୍ଙ୍କୁ ସମର୍ଥନ କରିଥିଲେ, କିନ୍ତୁ ପରେ ନିଜେ ନିର୍ବାଚନ ଲଢ଼ିବାକୁ ନିଷ୍ପତ୍ତି ନେଲେ। ସହରର ନିର୍ବାଚନ ନିୟମ ଅନୁଯାୟୀ, ଗୋଟିଏ ଦଳରୁ ଏକାଧିକ ପ୍ରାର୍ଥୀ ନିର୍ବାଚନ ଲଢ଼ିପାରିବେ। ଭାରତର କେରଳରେ ଜନ୍ମିତ ରମନ୍ ଛଅ ବର୍ଷ ବୟସରେ ଯୁକ୍ତରାଷ୍ଟ୍ର ଆମେରିକାକୁ ଚାଲିଯାଇଥିଲେ। ୨୦୧୯ ମସିହାରେ, ସେ ଲସ୍ ଆଞ୍ଜେଲସ୍ ସିଟି କାଉନସିଲ୍ର ଡେଭିଡ୍ ରିୟୁଙ୍କୁ ପରାସ୍ତ କରି ନିଜର ରାଜନୈତିକ ଜୀବନ ଆରମ୍ଭ କରିଥିଲେ। ଡେଭିଡ୍ ରିୟୁ ସେତେବେଳେ ପଦବୀରେ ଥିଲେ, ତାଙ୍କ ପାଖରେ ପ୍ରଚୁର ଆର୍ôଥକ ସମ୍ବଳ ଥିଲା ଏବଂ ଡେମୋକ୍ରାଟିକ୍ ଦଳର ନେତୃତ୍ୱ ସ୍ତରରେ ତାଙ୍କର ଘନିଷ୍ଠ ସମ୍ପର୍କ ରହିଥିଲା। ୧୭ ବର୍ଷ ମଧ୍ୟରେ ରାମନ୍ ହିଁ ପ୍ରଥମ ବ୍ୟକ୍ତି ଥିଲେ ଯିଏ କୌଣସି କାର୍ଯ୍ୟରତ କାଉନସିଲରଙ୍କୁ ପରାସ୍ତ କରି ପଦରୁ ହଟାଇଥିଲେ। ପରିସ୍ଥିତି କେବେବି ରମନ୍ଙ୍କ ସପକ୍ଷରେ ନଥିଲା; ସେ ଜଣେ ପ୍ରଗତିଶୀଳ ଚିନ୍ତାଧାରାର ବ୍ୟକ୍ତି ଥିଲେ, ଅନ୍ୟପକ୍ଷରେ ତାଙ୍କ ପ୍ରତିଦ୍ୱନ୍ଦ୍ୱୀ ବାସ୍ ଥିଲେ ଜଣେ ଅଭିଜ୍ଞ ନେତ୍ରୀ, ଯାହାଙ୍କୁ ଡେମୋକ୍ରାଟିକ୍ ଦଳର ପ୍ରଭାବଶାଳୀ ନେତୃତ୍ୱଙ୍କ ସମର୍ଥନ ଥିଲା। କିନ୍ତୁ ରମନ୍ ଏହି ପାର୍ଥକ୍ୟକୁ ହିଁ ନିଜ ପ୍ରଚାରର ମୁଖ୍ୟ ଆଧାର କରିଦେଲେ। “ଦ ଲସ୍ ଆଞ୍ଜେଲସ୍ ଟାଇମ୍ସ’ର ରିପୋର୍ଟ ଅନୁଯାୟୀ, ରମନ୍ ଯୁକ୍ତି ବାଢ଼ିଲେ ଯେ ବାସ୍ ପୁରୁଣା ବ୍ୟବସ୍ଥାକୁ ହିଁ ବଜାୟ ରଖିବାକୁ ଚାହାଁନ୍ତି ଏବଂ ସେ ଏପରି ରାଜନୀତି କରନ୍ତି ଯେଉଁଠାରେ ଆର୍ôଥକ ଲାଭ ବଦଳରେ ସୁବିଧା ସୁଯୋଗ ମିଳିଥାଏ। ସେ ସହରର ସାଧାରଣ ବାସିନ୍ଦାଙ୍କ ଅପେକ୍ଷା ପୋଲିସ୍ ୟୁନିଅନ୍ ଏବଂ ବ୍ୟବସାୟିକ ଗୋଷ୍ଠୀ ଭଳି ସ୍ୱତନ୍ତ୍ର ସ୍ୱାର୍ଥ ଥିବା ସଂଗଠନଗୁଡ଼ିକ ସହ ଅଧିକ ଘନିଷ୍ଠ ଭାବେ କାମ କରନ୍ତି। ରାମନ୍ ଏକାଧିକ ବିଫଳତା ପାଇଁ ବାସ୍ଙ୍କୁ ମଧ୍ୟ ଦାୟୀ କରିଥିଲେ: ସାର୍ବଜନୀନ ଭିତ୍ତିଭୂମିର ଖରାପ ଅବସ୍ଥା ତଥା ରାସ୍ତାଘାଟ ଓ ଚାଲିବା ରାସ୍ତାର ଜରାଜୀର୍ଣ୍ଣ ଅବସ୍ଥା, ସୁଲଭ ମୂଲ୍ୟର ଆବାସଗୃହର ଅଭାବ, ଚଳଚ୍ଚିତ୍ର ଶିଳ୍ପରେ ନିଯୁକ୍ତି ହ୍ରାସ ଏବଂ ଜଙ୍ଗଲ ନିଆଁ ପରିଚାଳନାରେ ଅବ୍ୟବସ୍ଥା। ସର୍ବଶେଷ ଗଣନା ଅନୁଯାୟୀ, ରମନ୍ ବାସ୍ଙ୍କ ଠାରୁ ୫.୪୦ ପ୍ରତିଶତ ପଏଣ୍ଟ ଆଗରେ ଥିଲେ।
About the Author
