ମୁମ୍ବାଇ: ମହାରାଷ୍ଟ୍ର ଆଣ୍ଟି-ଟେରରିଜିମ୍ ସ୍କ୍ୱାଡ୍ ମୁମ୍ବାଇର ମାହିମ୍ ଅଞ୍ଚଳରୁ ଜଣେ ୩୩ ବର୍ଷୀୟ ବ୍ୟକ୍ତିଙ୍କୁ ଗିରଫ କରିଛି। ତାଙ୍କ ଉପରେ ନିଷିଦ୍ଧ ଆତଙ୍କବାଦୀ ସଂଗଠନ ଜୈଶ-ଏ-ମହମ୍ମଦ ସହ ସମ୍ପୃକ୍ତି ଥିବା ସନ୍ଦେହ କରାଯାଉଛି। ଏକ ଗୁପ୍ତ ସୂଚନା ଆଧାରରେ, ଏଟିଏସ୍ର କାଲାଚୌକି ୟୁନିଟ୍ ମାହିମ୍ ମେଟ୍ରୋ ଷ୍ଟେସନ୍ ନିକଟରୁ ମହମ୍ମଦ ହସନ ଅବୁ ସରମଦ ଅଖତର ନାମକ ଏହି ବ୍ୟକ୍ତିଙ୍କୁ କାବୁ କରିଛି। ତଦନ୍ତକାରୀ ସଂସ୍ଥା ଅନୁଯାୟୀ, ଅଭିଯୁକ୍ତ ଜଣକ ରାପିଡୋ ରାଇଡର ଏବଂ ଅତର ବିକ୍ରେତା ଭାବରେ କାମ କରିବା ଆଢୁଆଳରେ ଅନଲାଇନରେ କଟ୍ଟରପନ୍ଥୀ ବିଚାରଧାରାର ପ୍ରଚାର କରୁଥିଲେ। ତଦନ୍ତକାରୀ ଅଧିକାରୀମାନେ ତାଙ୍କ ସୋସିଆଲ ମିଡିଆ ଆକାଉଣ୍ଟରୁ ଏଭଳି ଅନେକ ମନ୍ତବ୍ୟ ଚିହ୍ନଟ କରିଛନ୍ତି, ଯେଉଁଥିରେ ଜିହାଦ ପାଇଁ ଆହ୍ୱାନ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିଷୟରେ ବିବାଦୀୟ ମନ୍ତବ୍ୟ ଏବଂ ମୁସଲମାନମାନଙ୍କୁ ଅସ୍ତ୍ରଶସ୍ତ୍ର ରଖିବାକୁ ଉତ୍ସାହିତ କରୁଥିବା କଥା ରହିଛି। ଏଟିଏସ୍ ଅଭିଯୋଗ କରିଛି ଯେ, ଅଖତର ବିଭିନ୍ନ ସୋସିଆଲ ମିଡିଆ ଆକାଉଣ୍ଟ ବ୍ୟବହାର କରି ସାମ୍ପ୍ରଦାୟିକ ବିଦ୍ୱେଷ ସୃଷ୍ଟି କରିବା ସହ ଦେଶବିରୋଧୀ ଭାବନାକୁ ଉସୁକାଉଥିଲେ। ତଦନ୍ତକାରୀ ଦଳ ତାଙ୍କ ମୋବାଇଲ୍ ଫୋନରୁ ଏଭଳି କିଛି ସାମଗ୍ରୀ ଜବତ କରିଛନ୍ତି ଯାହାକୁ ଦେଶବିରୋଧୀ ବୋଲି କୁହାଯାଉଛି। ତଦନ୍ତରୁ ଜଣାପଡିଛି ଯେ, ଅଭିଯୁକ୍ତଙ୍କ ସହ ଜଡିତ ଏକ ସୋସିଆଲ ମିଡିଆ ଆକାଉଣ୍ଟରୁ ‘ଅବ୍ ଜିହାଦ କା ଜମାନା ଆ ଗୟା ହୈ’ ଏବଂ ‘ହର ମୁସଲିମ୍ କୋ ଭି ହତିୟାର ରଖନା ଚାହିୟେ, ଉଠାନା ଚାହିୟେ’ ଭଳି ମନ୍ତବ୍ୟ ଦିଆଯାଇଥିଲା। ତଦନ୍ତ ସମୟରେ ମିଳିଥିବା ତଥ୍ୟ ଅନୁଯାୟୀ, ଧାର୍ମିକ ବିବାଦ ଏବଂ ଅସ୍ତ୍ରଶସ୍ତ୍ର ପ୍ରଶିକ୍ଷଣ ସମ୍ବନ୍ଧୀୟ ଖବର ଉପରେ ପ୍ରତିକ୍ରିୟା ଦେବାକୁ ଯାଇ ଏଜେନ୍ସି ତାଙ୍କର କଥିତ ଅନଲାଇନ୍ କାର୍ଯ୍ୟକଳାପ ଏବଂ ନିଷିଦ୍ଧ ସଂଗଠନ ସହ ଥିବା ସମ୍ପର୍କର ଯାଞ୍ଚ କରୁଛି।
About the Author
