କୋଲକାତା: ଉତ୍ତର କୋଲକାତାର ଚୋରବାଗାନ ସ୍ଥିତ ଦୁର୍ଗା ପୂଜା ପେଣ୍ଡାଲରେ ଘଟିଥିବା ଦଳାଚକଟା ଘଟଣାରେ ୧୯ ଜଣଙ୍କ ମୃତ୍ୟୁ ହେବାର ଗୋଟିଏ ଦିନ ପରେ, ପଶ୍ଚିମବଙ୍ଗ ପୋଲିସ ସେଠାକାର ଆୟୋଜକଙ୍କ ସମେତ ମୋଟ ୭ ଜଣଙ୍କୁ ଗିରଫ କରିଛି ବୋଲି ରବିବାର ଦିନ ଅଧିକାରୀମାନେ ସୂଚନା ଦେଇଛନ୍ତି। ପୋଲିସ ଗିରିଶ ପାର୍କ ଥାନାରେ ଭାରତୀୟ ନ୍ୟାୟ ସଂହିତା ୨୦୨୩ର ଧାରା ୧୦୫, ୧୧୦ ଏବଂ ୩(୫) ଅଧୀନରେ ନିଜ ଆଡ଼ୁ ଏକ ମାମଲା ରୁଜୁ କରିଛି ଏବଂ ଆଗାମୀ ଦିନରେ ଆହୁରି ଗିରଫଦାରୀ ହୋଇପାରେ ବୋଲି କହିଛି। ପୋଲିସର ସୂଚନା ଅନୁଯାୟୀ, ଗିରଫ ହୋଇଥିବା ବ୍ୟକ୍ତିମାନଙ୍କ ମଧ୍ୟରେ ଅଛନ୍ତି – ୪୮ ବର୍ଷୀୟ ରାଜ କୁମାର ସେୱଡା ଓରଫ ରାଜା (ସମ୍ପାଦକ), ୫୫ ବର୍ଷୀୟ ଶାନ୍ତନୁ ଦୁବେ (ଉପ-ସଭାପତି) ଏବଂ ୪୮ ବର୍ଷୀୟ ବିପ୍ଳବ ମୁଖାର୍ଜୀ ଓରଫ ଜୟ, ଯିଏ ବାଉଁଶ ଢାଞ୍ଚା ନିର୍ମାଣ କାର୍ଯ୍ୟରେ ଜଡ଼ିତ ଥିଲେ। ଅନ୍ୟମାନଙ୍କ ମଧ୍ୟରେ ଅଛନ୍ତି ୫୩ ବର୍ଷୀୟ କୌଶିକ ସାହା ଏବଂ ୫୧ ବର୍ଷୀୟ ପିଣ୍ଟୁ ଦେ, ଯେଉଁମାନେ ଭିଡ଼ ନିୟନ୍ତ୍ରଣ ଏବଂ ଭିଆଇପି ପାସ୍ ଯାଞ୍ଚ ଦାୟିତ୍ୱରେ ଥିଲେ। ଏହା ବ୍ୟତୀତ, ଘରୋଇ ସୁରକ୍ଷା ବ୍ୟବସ୍ଥାର ଦାୟିତ୍ୱରେ ଥିବା ସୁମନ ଚକ୍ରବର୍ତ୍ତୀ (୩୦) ଏବଂ ରାଜେଶ ପାଲ (୨୯)ଙ୍କୁ ମଧ୍ୟ ପୋଲିସ ଗିରଫ କରିଛି। ଏହା ବ୍ୟତୀତ, ଅନ୍ୟ ୧୪ ଜଣଙ୍କୁ ଅଟକ ରଖାଯାଇଛି ଏବଂ ଶନିବାର ଘଟିଥିବା ଏହି ଦୁଃଖଦ ଘଟଣାର କାରଣ ଜାଣିବା ପାଇଁ ସେମାନଙ୍କୁ ପଚରାଉଚରା କରାଯାଉଛି। ଜଣେ ବରିଷ୍ଠ ପୋଲିସ ଅଧିକାରୀ “ପିଟିଆଇ’କୁ କହିଛନ୍ତି, “ଆମେ ୭ ଜଣଙ୍କୁ ଗିରଫ କରିଛୁ। ଗତ ରାତିରେ ଯେଉଁ ୧୪ ଜଣଙ୍କୁ ଅଟକ ରଖାଯାଇଥିଲା, ସେମାନଙ୍କ ମଧ୍ୟରୁ ଏହି ୭ ଜଣ ଅଛନ୍ତି। ଆଗକୁ ଆହୁରି ଗିରଫଦାରୀ ହୋଇପାରେ।’ ସେ ଆହୁରି କହିଛନ୍ତି ଯେ, ମୃତଦେହଗୁଡ଼ିକର ପରିଚୟ ଚିହ୍ନଟ ପ୍ରକ୍ରିୟା ଜାରି ରହିଛି।
About the Author
