ଅହମଦାବାଦ: ଗୁଜରାଟର ଭରୁଚ ଜିଲ୍ଲା ଅନ୍ତର୍ଗତ ସାୟଖା ଜିଆଇଡିସିରେ ଥିବା ଏକ ଔଷଧ କାରଖାନାରେ ଶୁକ୍ରବାର ବିଳମ୍ବିତ ରାତିରେ ଏକ ବିସ୍ଫୋରଣ ଘଟିଛି। ଏଥିରେ ୫ ଜଣ ଶ୍ରମିକଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ୫ ଜଣ ଗୁରୁତର ଆହତ ହୋଇଛନ୍ତି। ଭାଗ୍ରା ତାଲୁକାରେ ଥିବା ଏହି କାରଖାନାରେ ରାତି ୧୧ଟା ସମୟରେ ହାଇଡ୍ରୋଜେନେସନ୍ ପ୍ରକ୍ରିୟା ଚାଲିଥିବା ବେଳେ ଏହି ବିସ୍ଫୋରଣ ଘଟିଥିଲା। ଏହାର ପ୍ରଭାବ ଏତେ ଅଧିକ ଥିଲା ଯେ ୧୦ କିଲୋମିଟର ଦୂର ପର୍ଯ୍ୟନ୍ତ ଶବ୍ଦ ଶୁଣାଯାଇଥିଲା ଏବଂ ନିକଟସ୍ଥ ଶିଳ୍ପ ୟୁନିଟ୍ଗୁଡ଼ିକ ମଧ୍ୟ ଥରି ଉଠିଥିଲା। କାରଖାନା ପରିସରରେ ଯନ୍ତ୍ରପାତିର ଅଂଶବିଶେଷ ବିକ୍ଷିପ୍ତ ହୋଇ ପଡ଼ିରହିଥିଲା। ଏହା ସହିତ ଗ୍ୟାସ୍ ନିର୍ଗତ ହେବା ଯୋଗୁଁ ସେଠାରେ ଉପସ୍ଥିତ ଲୋକଙ୍କ ଆଖିରେ ଜଳାପୋଡ଼ା ଅନୁଭୂତ ହୋଇଥିଲା। ବିସ୍ଫୋରଣ ଘଟିବା ସମୟରେ ପ୍ରାୟ ୨୦ ଜଣ ଶ୍ରମିକ କାର୍ଯ୍ୟରତ ଥିଲେ ବୋଲି ଜଣାପଡ଼ିଛି।
କେତେଜଣ ଲୋକ ଭିତରେ ଫସି ରହିଛନ୍ତି, କେତେଜଣଙ୍କୁ ସୁରକ୍ଷିତ ଭାବେ ବାହାର କରାଯାଇଛି କିମ୍ବା କେତେଜଣଙ୍କୁ ଡାକ୍ତରଖାନା ନିଆଯାଇଛି, ସେ ନେଇ ସ୍ପଷ୍ଟ ସୂଚନା ନଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ ଉଦ୍ବେଗ ଦେଖାଦେଇଛି। ଭରୁଚର ବାସିନ୍ଦା ରାଜ ଅମରସିଂହ ନାଥୁବାଭା ଅଭିଯୋଗ କରିଛନ୍ତି ଯେ, ଏହି ଦୁର୍ଘଟଣାର ପ୍ରକୃତ ପରିମାଣ ସମ୍ପର୍କରେ ସୂଚନା ଦିଆଯାଇନାହିଁ। ସେ କହିଛନ୍ତି, ଦୁଇଟି କମ୍ପାନୀରେ ଅଗ୍ନିକାଣ୍ଡ ଘଟିଛି, କିନ୍ତୁ ପ୍ରକୃତ ସଂଖ୍ୟା ପ୍ରକାଶ କରାଯାଇନାହିଁ। ପରିସ୍ଥିତିକୁ ସମ୍ପୂର୍ଣ୍ଣ ରୂପେ ଚପାଇ ଦିଆଯାଇଛି। ନାଥୁବାଭା ଦାବି କରିଛନ୍ତି ଯେ ଘଟଣା ସମୟରେ ଭିତରେ ୧୭ ଜଣ ଲୋକ ଥିଲେ। କେତେଜଣ ସୁରକ୍ଷିତ ଭାବେ ବାହାରି ପାରିଛନ୍ତି ଏବଂ ମାଙ୍ଗ୍ରୋଲା ଭାରୁଚ ଜିଲ୍ଲାରେ ଶିଳ୍ପଗତ ସୁରକ୍ଷା ବ୍ୟବସ୍ଥା ଉପରେ ତଦନ୍ତ କରିବାକୁ ଦାବି କରିଛନ୍ତି। ବିସ୍ଫୋରଣ ପରେ ପୋଲିସ, ଅଗ୍ନିଶମ ବାହିନୀ ଏବଂ ଆମ୍ବୁଲାନ୍ସ ଦଳ ଘଟଣାସ୍ଥଳରେ ପହଞ୍ଚିଥିଲେ। ବିସ୍ଫୋରଣର କାରଣ କ’ଣ ଏବଂ ସୁରକ୍ଷା ବ୍ୟବସ୍ଥାରେ କୌଣସି ତ୍ରୁଟି ଯୋଗୁଁ ଏହି ଘଟଣା ଘଟିଛି କି ନାହିଁ, ତାହା ନିର୍ଦ୍ଧାରଣ କରିବା ପାଇଁ “ଡାଇରେକ୍ଟୋରେଟ୍ ଅଫ୍ ଇଣ୍ଡଷ୍ଟ୍ରିଆଲ୍ ସେଫ୍ଟି ଆଣ୍ଡ ହେଲ୍ଥ’ ବିଭାଗ ପକ୍ଷରୁ ତଦନ୍ତ ଆରମ୍ଭ କରାଯାଇଛି।
About the Author
