ନୂଆଦିଲ୍ଲୀ: ଅକ୍ଟୋବର ୩ ତାରିଖରେ ଜନ୍ତର ମନ୍ତର ଠାରେ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ବିରୋଧରେ ଚାଲିଥିବା ଏକ ବିକ୍ଷୋଭ ସମୟରେ ପୋଲିସ କର୍ମଚାରୀଙ୍କ ଦ୍ୱାରା ଯୌନ ଉତ୍ପୀଡ଼ନର ଶିକାର ହୋଇଥିବା ନେଇ ତିନିଜଣ ମହିଳା ସାମ୍ବାଦିକ ଅଭିଯୋଗ କରିଛନ୍ତି। ଏହା ପରେ ଦିଲ୍ଲୀ ପୋଲିସ ଏକ ନିରପେକ୍ଷ ତଦନ୍ତ ପାଇଁ ଏହି ଅଭିଯୋଗଗୁଡ଼ିକୁ କ୍ରାଇମ ବ୍ରାଞ୍ଚକୁ ହସ୍ତାନ୍ତର କରିଛି ବୋଲି ରବିବାର ଦିନ ଜଣେ ଅଧିକାରୀ ସୂଚନା ଦେଇଛନ୍ତି। ଶନିବାର ଦିନ, ଜଣେ ମହିଳା ସାମ୍ବାଦିକ କହିଥିଲେ ଯେ ଜଣେ ଆସିଷ୍ଟାଣ୍ଟ କମିଶନର ଅଫ୍ ପୋଲିସ ତାଙ୍କ ସହ ଯୌନ ଦୁର୍ବ୍ୟବହାର କରିଥିଲେ। ଅଧିକାରୀ ଜଣକ କହିଛନ୍ତି ଯେ ବିକ୍ଷୋଭ ସମୟରେ ଘଟିଥିବା କଥିତ ଘଟଣାକୁ ନେଇ ନୂଆଦିଲ୍ଲୀ ଜିଲ୍ଲା ପୋଲିସ ନିକଟରେ ଅଭିଯୋଗ ଦାଖଲ କରାଯାଇଛି; ଉକ୍ତ ସମୟରେ ଆଇନଶୃଙ୍ଖଳା ରକ୍ଷା ପାଇଁ ପୋଲିସ କର୍ମଚାରୀଙ୍କୁ ମୁତୟନ କରାଯାଇଥିଲା। ଜିଲ୍ଲା ପୋଲିସ ଏକ ସ୍ୱଚ୍ଛ ଓ ନିରପେକ୍ଷ ତଦନ୍ତ ପାଇଁ ଅଭିଯୋଗଗୁଡ଼ିକୁ କ୍ରାଇମ ବ୍ରାଞ୍ଚକୁ ହସ୍ତାନ୍ତର କରିଛି ବୋଲି ଅଧିକାରୀ କହିଛନ୍ତି। କ୍ରାଇମ ବ୍ରାଞ୍ଚ ଏହି ଅଭିଯୋଗଗୁଡ଼ିକର ଯାଞ୍ଚ କରିବ ଏବଂ ତଦନ୍ତର ଅଂଶବିଶେଷ ଭାବରେ ଅଭିଯୋଗକାରୀ ଓ ଅନ୍ୟାନ୍ୟ ସମ୍ପୃକ୍ତ ବ୍ୟକ୍ତିଙ୍କ ବୟାନ ରେକର୍ଡ କରିବ ବୋଲି ଅଧିକାରୀ ସୂଚନା ଦେଇଛନ୍ତି। ଜଣେ ମହିଳା ସାମ୍ବାଦିକ କହିଛନ୍ତି ଯେ ଯେତେବେଳେ ସେ ବିକ୍ଷୋଭର ଖବର ସଂଗ୍ରହ କରୁଥିଲେ, ସେତେବେଳେ ଜଣେ ଏସିପି ତାଙ୍କ ସହ ଯୌନ ଦୁର୍ବ୍ୟବହାର କରିଥିଲେ। ସେ ଅଭିଯୋଗ କରିଛନ୍ତି, “ପୋଲିସ କର୍ମଚାରୀମାନେ ବିକ୍ଷୋଭକାରୀଙ୍କୁ ଅଟକ ରଖୁଥିଲେ ଏବଂ ସେଠାରେ କୌଣସି ମହିଳା ପୋଲିସ କର୍ମଚାରୀ ଉପସ୍ଥିତ ନଥିଲେ।’ମହିଳା ପୋଲିସ କର୍ମଚାରୀଙ୍କ ଅନୁପସ୍ଥିତି ସମ୍ପର୍କରେ ମୁଁ ଦିଲ୍ଲୀ ପୋଲିସର ଏସିପି ବିବେକ ଭଗତଙ୍କୁ ପଚାରିଥିଲି, ଯାହା ପରେ ସେ ମୋ ସହ ଯୌନ ଉତ୍ପୀଡ଼ନ କରିଥିଲେ ଏବଂ ମୋତେ ଠେଲି ଦେଇଥିଲେ ବୋଲି ସେ ଅଭିଯୋଗ କରିଛନ୍ତି। ସାମ୍ବାଦିକ ଜଣକ କହିଛନ୍ତି ଯେ ପରବର୍ତ୍ତୀ ସମୟରେ ସେ ଓ ଅନ୍ୟମାନେ ଏଫ୍ଆଇଆର୍ ଦାଖଲ କରିବା ପାଇଁ ଥାନାକୁ ଯାଇଥିଲେ, କିନ୍ତୁ ଅଭିଯୋଗ କରିଛନ୍ତି ଯେ ଏପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। ବିକ୍ଷୋଭ ପ୍ରଦର୍ଶନର ଖବର ସଂଗ୍ରହ କରୁଥିବା ସାମ୍ବାଦିକମାନଙ୍କ ପ୍ରତି ପୋଲିସର ଆଚରଣକୁ ନେଇ ପ୍ରେସ୍ କାଉନସିଲ୍ ଅଫ୍ ଇଣ୍ଡିଆ ଗଭୀର କ୍ଷୋଭ ପ୍ରକାଶ କରିଛି ଏବଂ ଦିଲ୍ଲୀ ପୋଲିସକୁ ଏହି ଅଭିଯୋଗ ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆହ୍ୱାନ ଦେଇଛି। ଏକ ବିବୃତ୍ତିରେ ସଂସ୍ଥା କହିଛି, ‘ଗଣତନ୍ତ୍ରରେ ଏଭଳି ଆଚରଣକୁ ସ୍ୱାଭାବିକ ବୋଲି ଗ୍ରହଣ କରାଯାଇପାରିବ ନାହିଁ। ସାମ୍ବାଦିକମାନଙ୍କୁ ଭୟମୁକ୍ତ ହୋଇ ସ୍ୱାଧୀନ ଭାବରେ କାର୍ଯ୍ୟ କରିବାକୁ ଏବଂ ବିଭିନ୍ନ ପ୍ରସଙ୍ଗ ଉଠାଇବା ପାଇଁ ଏକାଠି ହେଉଥିବା ଲୋକଙ୍କ ଘଟଣାବଳୀକୁ ଲିପିବଦ୍ଧ କରିବାକୁ ଅନୁମତି ମିଳିବା ଆବଶ୍ୟକ। ଜାତୀୟ ରାଜଧାନୀର ହୃଦ୍ସ୍ଥଳରେ ମଧ୍ୟ ଏଥିପାଇଁ ଅନୁମତି ନ ମିଳିବା ଭାରତରେ ଗଣମାଧ୍ୟମ ସ୍ୱାଧୀନତାର ଭବିଷ୍ୟତ ପାଇଁ ଶୁଭଙ୍କର ନୁହେଁ।” ଏଥିରେ ଆହୁରି ମଧ୍ୟ କୁହାଯାଇଛି ଯେ, ‘ଦିଲ୍ଲୀ ପୋଲିସକୁ ମହିଳା ସାମ୍ବାଦିକଙ୍କ ଅଭିଯୋଗ ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ହେବ ଏବଂ ସୁନିଶ୍ଚିତ କରିବାକୁ ହେବ ଯେ ଗଣମାଧ୍ୟମ ପ୍ରତିନିଧିମାନେ ଯେପରି ଆକ୍ରମଣ ଓ ଧମକର ସମ୍ମୁଖୀନ ନ ହୋଇ ନିଜର କାର୍ଯ୍ୟ ସମ୍ପାଦନ କରିପାରିବେ।”
About the Author
