କଳାହାଣ୍ଡି: କଳାହାଣ୍ଡି ଜିଲ୍ଲା ଜୁନାଗଡ଼ ବ୍ଲକ ଅନ୍ତର୍ଗତ କେନ୍ଦୁପାଟି ଗ୍ରାମପଞ୍ଚାୟତର କନ୍ଧ ବ୍ରାହ୍ମଣୀଗୁଡ଼ା ଗ୍ରାମର ବିକ୍ରମ ଜାନୀ (୩୫)ଙ୍କ ଘରେ ରବିବାର ବିଳମ୍ପିତ ରାତିରେ ଅଗ୍ନିକାଣ୍ଡ ଘଟିଥିବା ଜଣାପଡ଼ିଛି। ପରିବାରର ଅଭିଯୋଗ ଅନୁସାରେ, ରାତି ପ୍ରାୟ ୧୨ଟା ସମୟରେ ମୋବାଇଲ ଫୋନକୁ ଚାର୍ଜରେ ଲଗାଇ ପରିବାରର ସମସ୍ତ ସଦସ୍ୟ ଶୋଇ ପଡ଼ିଥିଲେ। ପ୍ରାୟ ରାତି ୩ଟା ବେଳେ ମୋବାଇଲ ଫୋନଟି ବିସ୍ଫୋରଣ ହୋଇଥିବାରୁ ଘରର ଏକ ପାର୍ଶ୍ୱରେ ନିଆଁ ଲାଗିଯାଇଥିଲା। କିଛି ସମୟ ପରେ ନିଦ ଭାଙ୍ଗିଯିବାରୁ ପରିବାରର ସମସ୍ତ ସଦସ୍ୟ ବହୁ କଷ୍ଟରେ ଘରୁ ବାହାରକୁ ବାହାରି ଆସିଥିଲେ।ପରେ ପାଖପଡ଼ୋଶୀଙ୍କୁ ଡାକି ପାଣି ମୋଟରର ସାହାଯ୍ୟରେ ଜଳୁଥିବା ନିଆଁକୁ ଆୟତ୍ତ କରାଯାଇଥିଲ ଯାଇଥିଲା। ଏହି ଅଗ୍ନିକାଣ୍ଡରେ ଘରୋଇ ବ୍ୟବହାର ସାମଗ୍ରୀ, ଚାଉଳ,କପଡ଼ା ଓ ଅନ୍ୟାନ୍ୟ ଜିନିଷପତ୍ର ପୋଡ଼ି ନଷ୍ଟ ହୋଇଯାଇଥିବା ଜଣାପଡ଼ିଛି। ଘଟଣାର ଖବର ପାଇ ସ୍ଥାନୀୟ ଆ.ଆଇ.ସି ଉତ୍ତମ କୁମାର ମାଝୀ ଘଟଣାସ୍ଥଳରେ ପହଞ୍ଚି ଆକଳନ କରିଥିଲେ। ବର୍ଷା ଦିନରେ ଅସୁବିଧାକୁ ଦୃଷ୍ଟିରେ ରଖି ପୀଡ଼ିତ ପରିବାରକୁ ଆର ଆଇ ଅଫିସରୁ ଜରି ଓ ପାଲ ନେବାକୁ ପରାମର୍ଶ ଦେଇଥିଲେ। ଏହି ଘଟଣା ସମ୍ପର୍କରେ ସ୍ଥାନୀୟ ସରପଞ୍ଚ ଚିନ୍ମୟୀ ସେଠୀଙ୍କ ପ୍ରତିକ୍ରିୟା ନିଆଯାଇଥିଲା। ସେ କହିଥିଲେ, ପୀଡ଼ିତ ପରିବାରର ନାମ ଯଦି ଆବାସ ଗୃହ ଯୋଜନା ତାଲିକାରେ ଥାଏ, ତେବେ ସେମାନଙ୍କୁ ଅଗ୍ରାଧିକାର ଭିତ୍ତିରେ ସହାୟତା ପ୍ରଦାନ ପାଇଁ ପ୍ରୟାସ କରାଯିବ। ତେବେ କ୍ଷତିଗ୍ରସ୍ତ ପରିବାରକୁ କେବେ ସରକାରୀ ସହାୟତା ମିଳୁଛି, ତାହ ଦେଖିବାକୁ ବାକି ରହିଲା ।
About the Author
