ନୂଆଦିଲ୍ଲୀ: ଆମେରିକା-ଇସ୍ରାଏଲ ଏବଂ ଇରାନ ମଧ୍ୟରେ ଜାରି ରହିଥିବା ଯୁଦ୍ଧ ୧୧ ଦିନରେ ପହଞ୍ଚିଛି । ଆକ୍ରମଣ-ପ୍ରତିଆକ୍ରମଣ ଜାରି ରହିଛି । ଇରାନକୁ ପୁଣି ଡରେଇଛନ୍ତି ଆମେରିକା ରାଷ୍ଟ୍ରପତି । ହୋର୍ମୁଜ ଜଳପଥରେ ତୈଳ ଯୋଗାଣରେ ବାଧା ଦେଲେ ପରିଣାମ ଭୟାବହ ହେବ । ଯେତିକି ଆକ୍ରମଣ କରିଛୁ ତାହାର ୨୦ ଗୁଣା ଅଧିକ ଆକ୍ରମଣ କରିବୁ । ମୃତ୍ୟୁ, ନିଆଁ ଓ କ୍ରୋଧ ସେମାନଙ୍କ ଉପରେ ରାଜତ୍ୱ କରିବ ବୋଲି ଇରାନକୁ କଡ଼ା ଚେତାବନୀ ଦେଇ କହିଛନ୍ତି ଡୋନାଲ୍ଡ ଟ୍ରମ୍ପ୍ । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନକୁ ଧମକ ଦେଇ ସୋସିଆଲ ମିଡିଆ ଟ୍ରୁଥରେ କହିଛନ୍ତି ଯେ, ଯଦି ହୋର୍ମୁଜ୍ ପ୍ରଣାଳୀରେ ତେଲ ପ୍ରବାହ ବନ୍ଦ କରେ, ତେବେ ଏପରି ଆକ୍ରମଣ ହେବ ଯେ ଇରାନ ଏକ ରାଷ୍ଟ୍ର ଭାବରେ ଠିଆ ହୋଇପାରିବ ନାହିଁ । ସେମାନଙ୍କ ଉପରେ ମୃତ୍ୟୁ, ନିଆଁ ଏବଂ କ୍ରୋଧ ଛାଇଯିବ। ପୂର୍ବ ଅପେକ୍ଷା ୨୦ ଗୁଣା ଅଧିକ ଶକ୍ତିଶାଳୀ ଆକ୍ରମଣ କରିବୁ । ଲକ୍ଷ୍ୟସ୍ଥଳକୁ ଧ୍ୱଂସ କରିଦେବୁ। ଯାହା ଇରାନକୁ ପୁଣି ଏକ ରାଷ୍ଟ୍ର ଭାବରେ ଠିଆ ହେବାକୁ ଅସମର୍ଥ କରିବ। ଇରାନ ଉପରେ ମୃତ୍ୟୁ, ଅଗ୍ନି ଏବଂ କ୍ରୋଧ ରାଜୁତି କରିବ । ମୁଁ ଆଶା କରୁଛି ଏବଂ ପ୍ରାର୍ଥନା କରୁଛି ଯେ ଏହା ନ ଘଟୁ ! ଚୀନ୍ ଏବଂ ହର୍ମୁଜ୍ ପ୍ରଣାଳୀର ବହୁଳ ବ୍ୟବହାର କରୁଥିବା ସମସ୍ତ ଦେଶ ପାଇଁ ଆମେରିକାର ଏକ ଉପହାର । ” ଟ୍ରମ୍ପ ଆହୁରି କହିଛନ୍ତି, ଇରାନ ବିରୁଦ୍ଧରେ ଅନେକ ବିଜୟ ହୋଇଛି, କିନ୍ତୁ ଏହା ଯଥେଷ୍ଟ ନୁହେଁ । ଏହି ଅଭିଯାନ ସମାପ୍ତ ହେବା ପରେ ବିଶ୍ୱ ଏକ ସୁରକ୍ଷିତ ସ୍ଥାନ ହେବ, ଏବଂ ଏହା ବହୁତ ଶୀଘ୍ର ସମାପ୍ତ ହେବ । ଯଦି ଆମେ ଭିତରକୁ ଯାଇ ନଥାନ୍ତୁ, ତେବେ ସେମାନେ ଆମ ପଛରେ ଆସିଥାନ୍ତେ । ସେମାନେ ଗୋଟିଏ ସପ୍ତାହ ମଧ୍ୟରେ ଆମ ଉପରେ ଆକ୍ରମଣ କରିବାକୁ ୧୦୦ ପ୍ରତିଶତ ପ୍ରସ୍ତୁତ ଥିଲେ । କେହି ଭାବି ନ ଥିଲେ ସେମାନଙ୍କ ପାଖରେ ତା’ଠାରୁ ଅଧିକ କ୍ଷେପଣାସ୍ତ୍ର ଥିଲା, ଏବଂ ସେମାନେ ଆମ ଉପରେ ଆକ୍ରମଣ କରିବାକୁ ଯାଉଥିଲେ । ସେମାନେ ସମଗ୍ର ମଧ୍ୟପ୍ରାଚ୍ୟ ଏବଂ ଇସ୍ରାଏଲ ଉପରେ ଆକ୍ରମଣ କରିବାକୁ ଯାଉଥିଲେ । ଯଦି ସେମାନଙ୍କ ପାଖରେ ପରମାଣୁ ଅସ୍ତ୍ର ଥାଆନ୍ତା, ତେବେ ସେମାନେ ସେଗୁଡ଼ିକୁ ଇସ୍ରାଏଲ ଉପରେ ବ୍ୟବହାର କରିଥାଆନ୍ତେ। ” ମଧ୍ୟପ୍ରାଚ୍ୟ ଯୁଦ୍ଧ ଦିନକୁ ଦିନ ତୀବ୍ର ହେଉଛି । ଇରାନର ରିଭୋଲ୍ୟୁସନାରୀ ଗାର୍ଡ ମଧ୍ୟ ଡୋନାଲ୍ଡ ଟ୍ରମ୍ପଙ୍କ ବୟାନର ଜବାବ ଦେଇଛି । ଆଇଆରଜିସି କହିଛି ଯେ ଯୁଦ୍ଧର ଫଳାଫଳ ଇରାନ ନିଷ୍ପତ୍ତି ନେବ ଏବଂ ଯଦି ଆମେରିକୀୟ ଏବଂ ଇସ୍ରାଏଲୀ ଆକ୍ରମଣ ଜାରି ରହେ ତେବେ ତେହେରାନ ଏହି ଅଞ୍ଚଳକୁ ଗୋଟିଏ ଲିଟର ବି ତେଲ ରପ୍ତାନୀ କରିବାକୁ ଦେବ ନାହିଁ । ଆଞ୍ଚଳିକ ଗତିଶୀଳତା ଏବଂ ଭବିଷ୍ୟତ ବର୍ତ୍ତମାନ ଆମର ସଶସ୍ତ୍ର ବାହିନୀ ହାତରେ । ଆମେରିକୀୟ ସୈନ୍ୟ ଯୁଦ୍ଧ ଶେଷ କରିବେ ନାହିଁ । ଇରାନ ପୂର୍ବରୁ କହିଛି ଯେ ଏହା ଆମେରିକା ନିକଟରେ ଆତ୍ମସମର୍ପଣ କରିବ ନାହିଁ । ଏକ ଦୀର୍ଘ ଲମ୍ବା ଯୁଦ୍ଧ ପାଇଁ ପ୍ରସ୍ତୁତ । ଇରାନ ତାର ନୂଆ ସର୍ବୋଚ୍ଚ ନେତାଙ୍କ ନିର୍ବାଚନ ସହିତ ମିଶି ଇସ୍ରାଏଲ ଏବଂ ଆମେରିକୀୟ ସାମିରକ ଘାଟି ଉପରେ ନୂଆ ଆକ୍ରମଣ ଆରମ୍ଭ କରିଛି । ଏହି ଆକ୍ରମଣରେ ଖୋରମଶହର, ଫତାହ ଏବଂ ଖୈବର ହାଇପରସୋନିକ ଏବଂ ବାଲାଷ୍ଟିକ ମିସାଇଲ ସହିତ ଡ୍ରୋନ ମାଡ କରାଯାଇଛି । ୟୁଏଇ ଅଧିକାରୀଙ୍କ ରିପୋର୍ଟ ଅନୁଯାୟୀ ରାଜଧାନୀ ଆବୁଧାବିରେ ଏୟାରଷ୍ଟ୍ରାଇକକୁ ରୋକି ଦିଆଯାଇଛି କିନ୍ତୁ ୨ଟି ଅଲଗା ଅଲଗା ସ୍ଥାନରେ ଭଗ୍ନାବଶେଷ ପଡିଛି । ଯେଉଁଥିରେ ୨ ଜଣ ଆହତ ହୋଇଛନ୍ତି । ଇରାନୀ କ୍ଷେପଣାସ୍ତ୍ର ଖସାଇଥିବା ତୁର୍କୀ ଦାବି କରିଛି । ହେଲେ ଇରାନ ବୈଦେଶିକ ମନ୍ତ୍ରଣାଳୟ ଏହାକୁ ଅସ୍ୱୀକାର କରିଛନ୍ତି । ମଧ୍ୟପ୍ରାଚ୍ୟ ଯୁଦ୍ଧ ଘନଘଟା ଭିତରେ ବିଶ୍ୱକୁ ତୈଳ ଯୋଗାଣ ପ୍ରଭାବିତ କରିଛି । ଇରାନ ଅଧିକାରୀ ଚେତାବନୀ ଦେଇଛନ୍ତି ଯେ, ଯଦି ଆମେରିକା ଏହା ଶକ୍ତି ଭିତ୍ତିଭୂମି ଉପରେ ଆକ୍ରମଣ ଜାରି ରଖେ ତେହେ ପରିସ୍ଥିତି ଆହୁରି ଖରାପ ହେବ । ଖାତମ ଅଲ- ଆନବିୟା କେନ୍ଦ୍ରୀୟ ମୁଖ୍ୟାଳୟ ମୁଖପାତ୍ର କହିଛନ୍ତି, ଇରାନ ଏପର୍ଯ୍ୟନ୍ତ ଆଞ୍ଚଳିକ ତୈଳ ଏବଂ ଇନ୍ଧନ ପ୍ରତିଷ୍ଠାନକୁ ଟାର୍ଗେଟ କରିନାହିଁ । କିନ୍ତୁ ଯଦି ଆକ୍ରମଣ ଜାରି ରହେ ତେବେ ଏହାର ପୁନର୍ବିଚାର କରିପାରେ । ସେ ଚେତାବନୀ ଦେଇଛନ୍ତି, ଯଦି ଶକ୍ତିଭିତ୍ତିଭୂମିକୁ ଟାର୍ଗେଟ କରାଯାଏ ତେବେ ତୈଳ ମୂଲ୍ୟ ବ୍ୟାରେଲ ପିଛା ୨୦୦ ଡଲାର ପହଞ୍ଚିପାରେ ।
About the Author
