ନୂଆଦିଲ୍ଲୀ: ଓଡ଼ିଶା ସମେତ ମହାରାଷ୍ଟ୍ର, ତେଲଙ୍ଗାନା, ତାମିଲନାଡ଼ୁ, ଛତିଶଗଡ଼, ପଶ୍ଚିମବଙ୍ଗ, ଆସାମ, ହରିୟାଣା, ହିମାଚଳପ୍ରଦେଶ ଓ ବିହାର ରାଜ୍ୟର ୩୭ଟି ରାଜ୍ୟସଭା ଆସନ ପାଇଁ ଆସନ୍ତା ମାର୍ଚ୍ଚ ୧୬ ତାରିଖରେ ଦ୍ୱିବାର୍ଷିକ ନିର୍ବାଚନ ଅନୁଷ୍ଠିତ ହେବ। ଏ ନେଇ ବୁଧବାର ଦିନ ନିର୍ବାଚନ କମିଶନ ସୂଚନା ଦେଇଛନ୍ତି। ଯେଉଁ ୩୭ଟି ଆସନ ଖାଲି ରହିଛି, ସେଥିମଧ୍ୟରୁ ମହାରାଷ୍ଟ୍ରର ୭ଟି, ଓଡ଼ିଶାର ୪ଟି, ତେଲଙ୍ଗାନାର ୨ଟି, ତାମିଲନାଡ଼ୁର ୬ଟି, ଛତିଶଗଡ଼ର ୨ଟି, ପଶ୍ଚିମବଙ୍ଗର ୫ଟି, ଆସାମର ୩ଟି, ହରିୟାଣାର ୨ଟି, ହିମାଚଳପ୍ରଦେଶର ଗୋଟିଏ ଓ ବିହାରର ୫ଟି ଆସନ ରହିଛି। ଏହି ଆସନଗୁଡ଼ିକ ଏପ୍ରିଲ ୨ରୁ ୯ ତାରିଖ ମଧ୍ୟରେ ଖାଲିପଡ଼ୁଛି। ଏ ନେଇ ଫେବ୍ରୁଆରୀ ୨୬ ତାରିଖରେ ବିଜ୍ଞପ୍ତି ପ୍ରକାଶ ପାଇବ। ମାର୍ଚ୍ଚ ୫ ତାରିଖ ନାମାଙ୍କନପତ୍ର ଦାଖଲର ଶେଷ ଦିନ ରଖାଯାଇଛି। ସେହିପରି ମାର୍ଚ୍ଚ ୬ ତାରିଖରେ ପ୍ରାର୍ଥିପତ୍ର ଯାଞ୍ଚ କରାଯିବ। ମାର୍ଚ୍ଚ ୯ ତାରିଖ ନାମାଙ୍କନ ପ୍ରତ୍ୟାହାରର ଶେଷ ଦିନ ରଖାଯାଇଛି। ମାର୍ଚ୍ଚ ୧୬ ତାରିଖ ଦିନ ସକାଳ ୯ଟାରୁ ଅପରାହ୍ଣ ୪ ମଧ୍ୟରେ ଭୋଟ ହେବ। ସେଦିନ ଅପରାହ୍ଣ ୫ଟା ସମୟରେ ଭୋଟ ଗଣତି ହେବ ବୋଲି ଜଣାପଡ଼ିଛି। ମାର୍ଚ୍ଚ ୨୦ ତାରିଖ ମଧ୍ୟରେ ସଂପୂର୍ଣ୍ଣ ନିର୍ବାଚନ ପ୍ରକ୍ରିୟା ଶେଷ ହେବ। ଯେଉଁ ସାଂସଦମାନଙ୍କ କାର୍ଯ୍ୟକାଳ ପୂରୁଛି, ସେମାନଙ୍କ ମଧ୍ୟରେ ରହିଛନ୍ତି ଏନ୍ସିପି-ଏସପିର ଶରଦ ପାୱାର, କଂଗ୍ରେସର ଅଭିଷେକ ସିଂଘଭି, ଟିଏମସିର ସକେତ ଗୋଖଲେ, ଆରପିଆଇ-ଏ ର ରାମଦାସ ଅଠୱାଲେ, ଏଆଇଏଡିଏମକେର ଏମ. ଥାମ୍ବିଦୁରାଇ ଓ ଡିଏମକେର ତିରୁଚି ଶିବା।
About the Author
