ନୂଆଦିଲ୍ଲୀ: ଶୁକ୍ରବାର ଦିନ କରୋଲ ବାଗ୍ ସ୍ଥିତ ଗଫାର୍ ମାର୍କେଟର ଏକ ମୋବାଇଲ୍ ଆସେସୋରିଜ୍ ଦୋକାନରେ ଭୟାବହ ଅଗ୍ନିକାଣ୍ଡ ଘଟିବା ପରେ, ଚାମ୍ବର ଅଫ୍ ଟ୍ରେଡ୍ ଆଣ୍ଡ ଇଣ୍ଡଷ୍ଟ୍ରି ଦିଲ୍ଲୀ ସରକାରଙ୍କ ନିକଟରେ ଏକ ଦାବି ଉପସ୍ଥାପନ କରିଛି। ସଂସ୍ଥାଟି ଦାବି କରିଛି ଯେ, ଭାଇ ଦୂଜ ପର୍ଯ୍ୟନ୍ତ ରାଜଧାନୀର ୨୦ଟି ଭିଡ଼ଭାଡ଼ପୂର୍ଣ୍ଣ ବଜାରରେ ୨୪ ଘଣ୍ଟିଆ ଅଗ୍ନିଶମ ସେବା ମୁତୟନ କରାଯାଉ। ଏହା ସହିତ, ଏଭଳି ଅଗ୍ନିକାଣ୍ଡ ଯୋଗୁଁ କ୍ଷତିଗ୍ରସ୍ତ ହୋଇଥିବା ବ୍ୟବସାୟୀଙ୍କ ପାଇଁ ୧୦୦ କୋଟି ଟଙ୍କାର ଏକ ସହାୟତା ପାଣ୍ଠି ଯୋଗାଇ ଦେବାକୁ ମଧ୍ୟ ଦାବି କରାଯାଇଛି। ବ୍ୟବସାୟୀ ସଂଘ ପକ୍ଷରୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଲେଖାଯାଇଥିବା ଏକ ପତ୍ରରେ ବ୍ୟବସାୟୀ ଅଗ୍ନି ବିପର୍ଯ୍ୟୟ ପାଣ୍ଠି ଘୋଷଣା କରିବାକୁ ଦାବି କରାଯାଇଛି, ଯାହା ଦ୍ୱାରା ଅଗ୍ନିକାଣ୍ଡରେ କ୍ଷତିଗ୍ରସ୍ତ ହୋଇଥିବା ଛୋଟ ବ୍ୟବସାୟୀମାନଙ୍କୁ ଆର୍ôଥକ ସହାୟତା ମିଳିପାରିବ। ଉଲ୍ଲେଖଯୋଗ୍ୟ ଯେ, ଶୁକ୍ରବାର ଦିନ ଧନତେରସ୍ ସକାଳେ ଗଫାର୍ ମାର୍କେଟର ଚେନ୍ ୱାଲି ଗଳିରେ ଏହି ଅଗ୍ନିକାଣ୍ଡ ଘଟିଥିଲା। ଚାମ୍ବର ଅଫ୍ ଟ୍ରେଡ୍ ଆଣ୍ଡ ଇଣ୍ଡଷ୍ଟ୍ରି ଅନୁଯାୟୀ, ନିଆଁ ଲିଭାଇବା ପାଇଁ ୨୨ଟି ଅଗ୍ନିଶମ ଗାଡ଼ି ନିୟୋଜିତ କରାଯାଇଥିଲା। ତେବେ, ବଜାରକୁ ସଂଯୋଗ କରୁଥିବା ରାସ୍ତାଗୁଡ଼ିକ ସଂକୀର୍ଣ୍ଣ ହୋଇଥିବା ଏବଂ ପ୍ରବଳ ଭିଡ଼ ରହିଥିବାରୁ ଅଗ୍ନିଶମ ଗାଡ଼ିଗୁଡ଼ିକ ଘଟଣାସ୍ଥଳରେ ପହଞ୍ଚିବାରେ ବିଳମ୍ବ ହୋଇଥିଲା। ଦୀପାବଳିର ମାତ୍ର ଦୁଇ ଦିନ ପୂର୍ବରୁ ଘଟିଥିବା ଏହି ଘଟଣା, ପର୍ବପର୍ବାଣି ସମୟରେ ଭିଡ଼ଭାଡ଼ପୂର୍ଣ୍ଣ ବ୍ୟବସାୟିକ କ୍ଷେତ୍ରଗୁଡ଼ିକରେ ଅଗ୍ନି ନିରାପତ୍ତା ବ୍ୟବସ୍ଥାକୁ ନେଇ ବ୍ୟବସାୟୀଙ୍କ ମଧ୍ୟରେ ଚିନ୍ତା ବଢ଼ାଇ ଦେଇଛି। ସିଟିଆଇ ଅଧ୍ୟକ୍ଷ ବ୍ରିଜେଶ ଗୋୟଲ କହିଛନ୍ତି ଯେ, ପ୍ରତିବର୍ଷ ଦୀପାବଳି ସମୟରେ ଯେପରି ଭିଆଇପି ବ୍ୟକ୍ତିବିଶେଷଙ୍କ ଗମନାଗମନ ସମୟରେ ପୋଲିସ କର୍ମଚାରୀଙ୍କୁ ମୁତୟନ କରାଯାଏ, ସେହିପରି ଦୀପାବଳି ସମୟରେ ବଜାରଗୁଡ଼ିକରେ ଅଗ୍ନିଶମ ଗାଡ଼ି ମୁତୟନ ରହିବା ଉଚିତ। ଅଗ୍ନିଶମ ଗାଡ଼ି ଆସିବା ପର୍ଯ୍ୟନ୍ତ ଅପେକ୍ଷା ନକରି, ନିଆଁ ଲାଗିବା ମାତ୍ରେ ତାହାକୁ ଲିଭାଇ ଦେଲେ ବଜାରଗୁଡ଼ିକୁ ସୁରକ୍ଷିତ ରଖାଯାଇପାରିବ ବୋଲି ଗୋୟଲ କହିଛନ୍ତି। ସିଟିଆଇ ଦାବି କରିଛି ଯେ, ଦୀପାବଳି ଏବଂ ଭାଇ ଦୁଜ୍ ପର୍ଯ୍ୟନ୍ତ ଏହି ବଜାରଗୁଡ଼ିକରେ ଅନ୍ତତଃ ଗୋଟିଏ ରାସ୍ତା ଅଗ୍ନିଶମ ଗାଡ଼ି ଏବଂ ଆମ୍ବୁଲାନ୍ସ ପାଇଁ ଖାଲି ରଖାଯାଉ, ଯାଫଳରେ ଜରୁରୀକାଳୀନ ଗାଡ଼ିଗୁଡ଼ିକ ବିଳମ୍ବ ନକରି ପ୍ରଭାବିତ ସ୍ଥାନରେ ପହଞ୍ଚି ପାରିବେ। ଏହାର ଦ୍ୱିତୀୟ ଦାବି ସ୍ୱରୂପ, ବ୍ୟବସାୟୀ ସଂଗଠନଟି ଦିଲ୍ଲୀ ସରକାରଙ୍କୁ ୧୦୦ କୋଟି ଟଙ୍କାର ଏକ ବ୍ୟବସାୟୀ ଅଗ୍ନିକାଣ୍ଡ ବିପର୍ଯ୍ୟୟ ପାଣ୍ଠି ଗଠନ କରିବାକୁ ପ୍ରସ୍ତାବ ଦେଇଛି। ଏହି ପ୍ରସ୍ତାବିତ ବ୍ୟବସ୍ଥା ଅଧୀନରେ, ଅଗ୍ନିକାଣ୍ଡ ଦ୍ୱାରା ପ୍ରଭାବିତ ଛୋଟ ବ୍ୟବସାୟୀମାନଙ୍କୁ ସାତ ଦିନ ମଧ୍ୟରେ ୫ ଲକ୍ଷ ଟଙ୍କା ପର୍ଯ୍ୟନ୍ତ ଆର୍ôଥକ ସହାୟତା କିମ୍ବା ସୁଧମୁକ୍ତ ଋଣ ପ୍ରଦାନ କରାଯିବା ଉଚିତ୍। ସିଟିଆଇ ପରାମର୍ଶ ଦେଇଛି ଯେ, ଏହି ସହାୟତା ଏସଡିଏମ୍ (ଝଊଗ) ଙ୍କ ରିପୋର୍ଟ ଆଧାରରେ ପ୍ରଦାନ କରାଯାଉ; ଏଥିପାଇଁ ବ୍ୟବସାୟୀମାନଙ୍କୁ ଏଫ୍ଆଇଆର୍, ଅଗ୍ନିଶମ ବିଭାଗର ରିପୋର୍ଟ କିମ୍ବା ବୀମା ସମ୍ବନ୍ଧୀୟ କାଗଜପତ୍ର ପାଇଁ ଅପେକ୍ଷା କରିବାକୁ ପଡ଼ିବ ନାହିଁ। ଏହା ସହିତ, ଦୀପାବଳି ଭଳି ବ୍ୟବସାୟର ମୁଖ୍ୟ ସମୟରେ ଘଟୁଥିବା ଅଗ୍ନିକାଣ୍ଡ କ୍ଷେତ୍ରରେ ୪୮ ଘଣ୍ଟା ମଧ୍ୟରେ ରିଲିଫ୍ ବା ସହାୟତା ପ୍ରଦାନ କରିବାକୁ ମଧ୍ୟ ଦାବି କରାଯାଇଛି। ଗୋୟଲ କହିଛନ୍ତି ଯେ, ଦୋକାନ ପୋଡ଼ିଯିବା ଫଳରେ ବ୍ୟବସାୟୀମାନେ ପ୍ରାୟତଃ ନିଜର ସମସ୍ତ ଜୀବିକା ହରାଇ ବସନ୍ତି, ଯାହା ଫଳରେ ସେମାନଙ୍କ ପରିବାର, କର୍ମଚାରୀ ଏବଂ ଆର୍ôଥକ ଦେୟଗୁଡ଼ିକ ସଙ୍କଟରେ ପଡ଼ିଯାଏ।
About the Author
