ପୁରୀ: ଚୋର- ପୋଲିସ ଖେଳ ଆମେ ସମସ୍ତେ ହୁଏତ ଟିଭି ପରଦାରେ ଦେଖିଛେ । ଚୋରକୁ ଧରିବାକୁ ପୋଲିସ ସବୁ ଉଦ୍ୟମ କରୁଥାଏ । ତ’ ପୁଣି କେତେବେଳେ ପୋଲିସକୁ ଚକମା ଦେଇ ଖସିଯାଏ ଚୋର । ହେଲେ ସୋମବାର ପୁରୀ ସଦର ମୁଖ୍ୟ ଚିକିତ୍ସାଳୟ ପରିସରରେ ଏଭଳି ଫିଲ୍ମ ଷ୍ଟାଇଲର ରୋଚକ ଦୃଶ୍ୟ ଦେଖିବାକୁ ମିଳିଛି । ସୂଚନା ଅନୁସାରେ, ପୁରୀ ସଦର ଥାନା ପୋଲିସ କୌଣସି ଏକ ମାମଲାରେ ଦୁଇ ଅଭିଯୁକ୍ତଙ୍କୁ ଡାକ୍ତରୀ ମାଇନା ପାଇଁ ସଦର ମୁଖ୍ୟ ଚିକିତ୍ସାଳୟକୁ ଆଣିଥିଲା। ତେବେ ପୋଲିସ ଭ୍ୟାନରେ ଆସିଥିବା ଦୁଇ ଅଭିଯୁକ୍ତଙ୍କ ମଧ୍ୟରୁ ଜଣଙ୍କୁ ଚିକିତ୍ସା ପାଇଁ ନିଆଯାଇଥିବା ବେଳେ, ଅନ୍ୟ ଜଣେ ଅଭିଯୁକ୍ତ ସୁଯୋଗ ଦେଖି ପୋଲିସ କବଳରୁ ଲୁଚି ହସ୍ପିଟାଲ ବାହାରକୁ ଦୌଡ଼ି ପଳାଇଥିଲା।ଏହା ଜାଣି ଅଭିଯୁକ୍ତଙ୍କୁ ଧରିବାକୁ ସଦର ଥାନା ପୋଲିସ କର୍ମଚାରୀ ତୁରନ୍ତ ଆକ୍ସନକୁ ଆସିଥିଲା । ଆଉ ଉପସ୍ଥିତ ବୁଦ୍ଧି ଖଟାଇ ଖସି ଯାଇଥିବା ଅଭିଯୁକ୍ତକୁ ପୁଣି ଥରେ କାବୁ କରିନେଇଥିଲେ ଦୁଇ ପୋଲିସ କର୍ମଚାରୀ ।ଏହାପରେ ପୋଲିସ କହିଥିଲେ “ଓଃ ହୋ ଦେହରୁ ଝାଳ ବୁହାଇଦେଲା,ଆଜି ଚାକିରିଟା ଚାଲି ଯାଇଥାନ୍ତା’ ।ଏହି ଘଟଣା ସ୍ଥାନୀୟ ଅଞ୍ଚଳରେ ବେଶ୍ ଚର୍ଚ୍ଚାର କାରଣ ପାଲଟିଛି।
About the Author
