ନୂଆଦିଲ୍ଲୀ: ସୁପ୍ରିମକୋର୍ଟ କହିଛନ୍ତି ଯେ ପିଲାମାନଙ୍କର, ସେମାନଙ୍କ ବୟସ ଯାହା ହେଉନା କାହିଁକି, ଇଣ୍ଟରନେଟ୍ ବ୍ୟବହାର କରିବାର ଏକ ମୌଳିକ ଅଧିକାର ରହିଛି। କୋର୍ଟ ଚେତାବନୀ ଦେଇଛନ୍ତି ଯେ ଅନଲାଇନ୍ ସୁରକ୍ଷା ନାମରେ ଇଣ୍ଟରନେଟ୍ ଉପରେ ସମ୍ପୂର୍ଣ୍ଣ କଟକଣା ଲଗାଇବା ଦ୍ୱାରା ସେମାନଙ୍କ ସାମ୍ବିଧାନିକ ସ୍ୱାଧୀନତା ଅଯଥା ଭାବେ ସଙ୍କୁଚିତ ହୋଇପାରେ। ବିଚାରପତି ଜେ.ବି. ପାର୍ଡିୱାଲା ଏବଂ କେ.ଭି. ଚନ୍ଦ୍ରନଙ୍କ ଖଣ୍ଡପୀଠ, ଅକ୍ଟୋବର ୧୫ ତାରିଖର ଏକ ଆଦେଶରେ ଦର୍ଶାଇଛନ୍ତି ଯେ ଇଣ୍ଟରନେଟ୍ ବ୍ୟବହାର କରିବାର ଅଧିକାର ସମ୍ବିଧାନର ଧାରା ୨୧ ଅଧୀନରେ ସୁରକ୍ଷିତ। ଏହା ସମ୍ବିଧାନର ଧାରା ୧୯(୧)(କ) ସହିତ ଜଡ଼ିତ, ଯାହା ବାକ୍ ଓ ଅଭିବ୍ୟକ୍ତିର ସ୍ୱାଧୀନତା ପ୍ରଦାନ କରିଥାଏ। ଅନଲାଇନ୍ ପ୍ଲାଟଫର୍ମଗୁଡ଼ିକରୁ ପିଲାମାନଙ୍କ ଯୌନ ଶୋଷଣ ଓ ଦୁର୍ବ୍ୟବହାର ସମ୍ବନ୍ଧୀୟ ବିଷୟବସ୍ତୁ ଚିହ୍ନଟ କରିବା ଏବଂ ହଟାଇବା ପାଇଁ ପଦକ୍ଷେପ ନେବା ସମୟରେ କୋର୍ଟ ଏହି ମତାମତ ଦେଇଛନ୍ତି। ଡିଜିଟାଲ୍ ବିପଦରୁ ପିଲାମାନଙ୍କୁ ସୁରକ୍ଷା ଦେବା ପାଇଁ ସୋସିଆଲ୍ ମିଡିଆ ବ୍ୟବହାର ଉପରେ କଟକଣା ଲଗାଇବା ପ୍ରସ୍ତାବକୁ ନେଇ ଚାଲିଥିବା ବ୍ୟାପକ ଆଲୋଚନା ଉପରେ ମଧ୍ୟ କୋର୍ଟ ଧ୍ୟାନ ଦେଇଛନ୍ତି। ଖଣ୍ଡପୀଠ ଗୁରୁତ୍ୱାରୋପ କରିଛନ୍ତି ଯେ ଅନଲାଇନ୍ କ୍ଷତିରୁ ପିଲାମାନଙ୍କୁ ସୁରକ୍ଷା ଦେବା ପାଇଁ ସେମାନଙ୍କୁ ଇଣ୍ଟରନେଟ୍ ବ୍ୟବହାରରୁ ବଞ୍ଚିତ କରାଯାଇପାରିବ ନାହିଁ। କାରଣ, ଶିକ୍ଷା, ଚିନ୍ତାଧାରାର ଆଦାନପ୍ରଦାନ ଏବଂ ସାମାଜିକ ମିଳାମିଶା ପାଇଁ ଇଣ୍ଟରନେଟ୍ ଏକ ଅବିଚ୍ଛେଦ୍ୟ ଅଙ୍ଗ ପାଲଟିଛି। କୋର୍ଟ ଦର୍ଶାଇଛନ୍ତି ଯେ ବୟସ୍କମାନଙ୍କ ପରି ପିଲାମାନଙ୍କର ମଧ୍ୟ ସାମ୍ବିଧାନିକ ସୁରକ୍ଷା ପାଇବାର ଅଧିକାର ରହିଛି ଏବଂ ସେମାନଙ୍କ ସ୍ୱାଧୀନତାକୁ ଅଯଥା ସଙ୍କୁଚିତ ନକରି ସେମାନଙ୍କ ସୁରକ୍ଷା ନିଶ୍ଚିତ କରାଯିବା ଆବଶ୍ୟକ। କୋର୍ଟ ଉଲ୍ଲେଖ କରିଛନ୍ତି ଯେ ବିଶେଷକରି ଦୂରଦୂରାନ୍ତର ଅଞ୍ଚଳରେ ରହୁଥିବା ପିଲାମାନଙ୍କ ପାଇଁଇଣ୍ଟରନେଟ୍ ଶିକ୍ଷା ଏବଂ ସୂଚନାର ଏକ ଗୁରୁତ୍ୱପୂର୍ଣ୍ଣ ଉତ୍ସ ଭାବରେ କାର୍ଯ୍ୟ କରେ।
About the Author
