ନୂଆଦିଲ୍ଲୀ : ଭାରତର ମହାନ କ୍ରିକେଟର ରାହୁଲ ଡ୍ରାଭିଡ୍ ଗୋଟିଏ ଟି-୨୦ ଲିଗରେ ଟିମ କିଣିଛନ୍ତି। ୟୁରୋପୀୟ ଟି୨୦ ପ୍ରିମିୟର ଲିଗରେ ଡବଲିନ୍ ଗାର୍ଡିଆନ୍ସର ମାଲିକ ବନିଛନ୍ତି ରାହୁଲ ଡ୍ରାଭିଡ୍। ଇଟିପିଏଲ୍ ମୋଟ ୬ଟି ଫ୍ରାଞ୍ଚାଇଜି ଭାଗ ନେବେ। ଏହାର ତାଲିକା ଗୋଟିଏ କାର୍ଯ୍ୟକ୍ରମରେ ଘୋଷଣା କରାଯାଇଛି। ଏହି କାର୍ଯ୍ୟକ୍ରମରେ ଟୁର୍ଣ୍ଣାମେଣ୍ଟ୍ ର ଫ୍ରାଞ୍ଚାଇଜି ମାଲିକମାନେ ଯୋଗ ଦେଇଥିଲେ। ରାହୁଲ ଡ୍ରାଭିଡ ଗୋଟିଏ ବିବୃତିରେ କହିଛନ୍ତି, ଇଟିପିଏଲ୍ ମୋତେ ଆକର୍ଷିତ କରିବାର କାରଣ ହେଉଛି ଏହାର ବୃହତ୍ତର ଉଦ୍ଦେଶ୍ୟ। ୟୁରୋପରେ କ୍ରିକେଟ୍ ବିକାଶ କରିବାର ସୁଯୋଗ, ଆୟର୍ଲ୍ୟାଣ୍ଡ ଓ ସମଗ୍ର ୟୁରୋପରେ ପ୍ରତିଭାକୁ ପ୍ରୋତ୍ସାହିତ କରିବା ଏବଂ ତୃଣମୂଳସ୍ତରରେ କ୍ରିକେଟର ଉନ୍ନତି ଆଣିବାରେ ଏହି ଲିଗ ସହାୟକ ହେବ। ତେଣୁ ମୁଁ ଇଟିପିଏଲ୍ ପ୍ରତି ଆକର୍ଷିତ ହୋଇଛି। ରାହୁଲ ଡ୍ରାଭିଡ ଟିମର ମାଲିକ ବନିଥିବା ବେଳେ ଭାରତୀୟ ଟିମର ପୂର୍ବତନ ଅଲ୍ ରାଉଣ୍ଡର ରବିଚନ୍ଦ୍ରନ ଅଶ୍ୱିନଙ୍କୁ ଗୁରୁଦାୟିତ୍ୱ ମିଳିଛି। ଅଶ୍ୱିନ୍ ଡବଲିନ୍ ଗାର୍ଡିଆନ୍ସର ଅଧିନାୟକ ହେବେ ବୋଲି ଜଣାପଡ଼ିଛି। ଲିଗରରେ ଡବଲିନ୍ ଗାର୍ଡିଆନ୍ସ ବ୍ୟବତୀତ ବେଲଫାଷ୍ଟ, ଏଡିନବର୍ଗ, ଗ୍ଲାସଗୋ, ରୋଟରଡାମ୍ ଓ ଆମଷ୍ଟରଡାମ୍ ଭଳି ଦଳ ଭାଗ ନେବେ। ଡ୍ରାଭିଡ୍ ଆହୁରି କହିଛନ୍ତି, ଡବଲିନରେ ପୂର୍ବରୁ ହିଁ କ୍ରିକେଟକୁ ଭଲ ପାଉଥିବା ଉତ୍ସାହୀ ଲୋକମାନେ ରହିଛନ୍ତି। ଏଠାରେ କ୍ରିକେଟର ବିକାଶ ହେବାର ଗୋଟିଏ ବଡ଼ ସମ୍ଭାବନା ରହିଛି। ପରବର୍ତ୍ତୀ ପିଢ଼ିର ଉନ୍ନତି ମୋ ପାଇଁ ସର୍ବଦା ଗୁରୁତ୍ୱପୂର୍ଣ୍ଣ ଥିଲା। ମୁଁ ବିଶ୍ୱାସ କରୁଛି ଯେ ଇଟିପିଏଲ୍ ଏହି ଯାତ୍ରାରେ ଏକ ଅର୍ଥପୂର୍ଣ୍ଣ ଭୂମିକା ଗ୍ରହଣ କରିପାରିବ। ଏହି କାର୍ଯ୍ୟକ୍ରମରେ ଗ୍ଲାସଗୋ ଫ୍ରାଞ୍ଚାଇଜିର ବିପୁଳ ଅଗ୍ରୱାଲ୍, ରୋଟରଡାମ୍ ଫ୍ରାଞ୍ଚାଇଜିର ଜଣ୍ଟି ରୋଡ୍ସ୍ ଓ ମଧୁକର ଶ୍ରୀଙ୍କ ସମେତ ଇଟିପିଏଲ୍ ସହ-ପ୍ରତିଷ୍ଠାତା ଅଭିଷେକ ବଚ୍ଚନ, ସୌରବ ବାନର୍ଜୀ, ପ୍ରିୟଙ୍କା କୌଲ ଓ ଧୀରଜ ମାଲହୋତ୍ରା ପ୍ରମୁଖ ଉପସ୍ଥିତ ଥିଲେ। ୟୁରୋପୀୟ କ୍ରିକେଟର ବରିଷ୍ଠ ନେତୃତ୍ୱମାନଙ୍କୁ ମଧ୍ୟ କାର୍ଯ୍ୟକ୍ରମରେ ଦେଖିବାକୁ ମିଳିଛି। କ୍ରିକେଟ୍ ଆୟର୍ଲ୍ୟାଣ୍ଡର ଚେୟାରମ୍ୟାନ୍ ବ୍ରାୟାନ୍ ମ୍ୟାକନିସ୍, ସିଇଓ ସାରା କିନ୍, କ୍ରିକେଟ୍ ନେଦରଲ୍ୟାଣ୍ଡସର ହାଇ ପରଫର୍ମାନ୍ସ ଡାଇରେକ୍ଟର ରୋଲାଣ୍ଡ ଲେଫେଭେର ଓ କ୍ରିକେଟ୍ ସ୍କଟଲ୍ୟାଣ୍ଡର ସିଇଓ ଟ୍ରୁଡି ଲିଣ୍ଡବ୍ଲେଡ୍ କାର୍ଯ୍ୟକ୍ରମରେ ଯୋଗ ଦେଇଥିଲେ। କ୍ରିକେଟ୍ ଆୟର୍ଲ୍ୟାଣ୍ଡ, କ୍ରିକେଟ୍ ସ୍କଟଲ୍ୟାଣ୍ଡ ଓ ରୟାଲ୍ ଡଚ୍ କ୍ରିକେଟ୍ ଆସୋସିଏସନ୍ ସହ ମିଳିତ ଭାବେ ଏହି ଲିଗର ଆୟୋଜନ କରାଯାଉଛି। ଏହି ଲିଗରେ ମିଚେଲ୍ ମାର୍ଶ, ଟିମ୍ ଡେଭିଡ୍, ମିଚେଲ୍ ସାର୍ଣ୍ଟର୍ନ ଲିୟାମ୍ ଲିଭିଙ୍ଗଷ୍ଟନ୍, ଗ୍ଲେନ୍ ମ୍ୟାକ୍ସୱେଲ୍, ଫାଫ୍ ଡୁ ପ୍ଲେସିସ୍, ହେନରିଚ କ୍ଲାସେନଙ୍କ ଭଳି ଅନ୍ତର୍ଜାତୀୟ ତାରକାମାନେ ଖେଳିବେ। ପ୍ରଥମ ସିଜନ୍ ଅଗଷ୍ଟ ୨୬ରୁ ସେପ୍େଟମ୍ବର ୨୦ ତାରିଖ ପର୍ଯ୍ୟନ୍ତ ଚାଲିବ ବୋଲି ଜଣାପଡ଼ିଛି। ଇଟିପିଏଲ୍ ଫ୍ରାଞ୍ଚାଇଜି ମାଲିକାନା: ଡବଲିନ୍- ରାହୁଲ ଡ୍ରାଭିଡ୍ ବେଲଫାଷ୍ଟ- ଗ୍ଲେନ୍ ମ୍ୟାକ୍ସୱେଲ୍ ଓ ରୋହନ୍ ଲୁଣ୍ଡ୍ ଏଡିନବର୍ଗ- କାଇଲ୍ ମିଲ୍ସ୍, ନାଥନ୍ ମ୍ୟାକ୍କୁଲମ୍ ଓ ରାଚେଲ୍ ୱାଇଜମ୍ୟାନ୍ ଗ୍ଲାସଗୋ- ବିପୁଳ ଅଗ୍ରୱାଲ୍ ଓ କ୍ରିସ୍ ଗେଲ୍ ଆମଷ୍ଟରଡାମ୍- ଷ୍ଟିଭ୍ ୱ, ଜେମି ଡ୍ୱାୟର୍ ଓ ଟିମ୍ ଥୋମାସ୍ ରୋଟରଡାମ୍- ଜଣ୍ଟି ରୋଡ୍ସ୍, ଫାଫ୍ ଡୁ ପ୍ଲେସିସ୍, ଗ୍ଲାସିନ୍ ଓ ସମୀର ଶାହ
About the Author
