ନୂଆଦିଲ୍ଲୀ: ଏୟାର ମାର୍ଶଲ ଆଶୁତୋଷ ଦୀକ୍ଷିତ ଭାରତୀୟ ବାୟୁସେନାର ନୂତନ ମୁଖ୍ୟ ଭାବରେ ନିଯୁକ୍ତ ହୋଇଛନ୍ତି। ତାଙ୍କ ପାଖରେ ପ୍ରାୟ ଚାରି ଦଶନ୍ଧିର ସେବା ଅଭିଜ୍ଞତା ରହିବା ସହ ବିଭିନ୍ନ ପ୍ରକାରର ଯୁଦ୍ଧ ବିମାନ, ପରିବହନ ବିମାନ ଏବଂ ତାଲିମ ବିମାନ ଉଡ଼ାଇବାର ବ୍ୟାପକ ଦକ୍ଷତା ରହିଛି। ୨୦୨୬ ମସିହା ଅକ୍ଟୋବର ୮ ତାରିଖରେ ଆୟୋଜିତ ହେବାକୁ ଥିବା ଭାରତୀୟ ବାୟୁସେନାର ୯୪ତମ ପ୍ରତିଷ୍ଠା ଦିବସର ଗୋଟିଏ ଦିନ ପୂର୍ବରୁ ତାଙ୍କର ଏହି ନିଯୁକ୍ତି ହୋଇଛି। ଏୟାର ମାର୍ଶଲ ଦୀକ୍ଷିତ ବର୍ତ୍ତମାନର ଏୟାର ଚିଫ୍ ମାର୍ଶଲ ଅମର ପ୍ରୀତ ସିଂହଙ୍କ ସ୍ଥାନ ଗ୍ରହଣ କରିବେ। ଏହି ନିଯୁକ୍ତି ୩୧ ଅକ୍ଟୋବର ୨୦୨୬ ଅପରାହ୍ନରୁ ଲାଗୁ ହେବ ଏବଂ ତାଙ୍କ କାର୍ଯ୍ୟକାଳ ୩୧ ଡିସେମ୍ବର ୨୦୨୮ ପର୍ଯ୍ୟନ୍ତ ରହିବ। ଏୟାର ମାର୍ଶଲ ଦୀକ୍ଷିତ ସ୍ୱଦେଶୀ ଜ୍ଞାନକୌଶଳରେ ନିର୍ମିତ ଲାଇଟ୍ କମ୍ବାଟ୍ ଏୟାରକ୍ରାଫ୍ଟ “ତେଜସ୍’, ମିରାଜ-୨୦୦୦, ବିଭିନ୍ନ ମିଗ୍ ସଂସ୍କରଣ, ଜାଗୁଆର, ହକ୍, ଏଚପିଟି-୩୨, ଏଏନ-୩୨, ଆଭ୍ରୋ, କିରଣ ଏବଂ ଆଇଏଲ-୭୮ ଭଳି ଅନେକ ଗୁରୁତ୍ୱପୂର୍ଣ୍ଣ ବିମାନ ଉଡ଼ାଇଛନ୍ତି। ନିଜର ଉଲ୍ଲେଖନୀୟ କାର୍ଯ୍ୟକାଳ ମଧ୍ୟରେ ସେ ୩,୫୦୦ ଘଣ୍ଟାରୁ ଅଧିକ ସମୟ ଧରି ବିମାନ ଉଡ଼ାଇବାର ଅଭିଜ୍ଞତା ମଧ୍ୟ ହାସଲ କରିଛନ୍ତି। ଏୟାର ମାର୍ଶଲ ଦୀକ୍ଷିତ ଜଣେ ପରୀକ୍ଷାମୂଳକ ଉଡ଼ାଣ ପାଇଲଟ୍ ତଥା ଜଣେ ପ୍ରଶିକ୍ଷିତ ଉଡ଼ାଣ ପ୍ରଶିକ୍ଷକ ଅଟନ୍ତି। ବିଭିନ୍ନ ପ୍ରକାରର ବିମାନ ପରିଚାଳନାରେ ତାଙ୍କର ଅଭିଜ୍ଞତା ତାଙ୍କୁ ଭାରତୀୟ ବାୟୁସେନାରେ ବ୍ୟାପକ କାର୍ଯ୍ୟକ୍ଷମ ଓ ବୈଷୟିକ ଜ୍ଞାନ ପ୍ରଦାନ କରିଛି। ସେ ୬ ଡିସେମ୍ବର ୧୯୮୬ରେ ଭାରତୀୟ ବାୟୁସେନାରଯୁଦ୍ଧ ବିମାନ ବିଭାଗରେ ଯୋଗ ଦେଇଥିଲେ। ନିଜ କାର୍ଯ୍ୟକାଳ ମଧ୍ୟରେ ସେ ଅନେକ ଗୁରୁତ୍ୱପୂର୍ଣ୍ଣ ସାମରିକ ଅଭିଯାନ ଏବଂ ଅଭ୍ୟାସ ସହିତ ଜଡ଼ିତ ରହିଆସିଛନ୍ତି। ତାଙ୍କର କାର୍ଯ୍ୟକ୍ଷମ ଅଭିଜ୍ଞତା ମଧ୍ୟରେ “ଅପରେସନ୍ ସଫେଦ୍ ସାଗର’, “ଅପରେସନ୍ ରକ୍ଷକ’, “କୋପ୍ ଇଣ୍ଡିଆ’ ଏବଂ “ଅପରେସନ୍ ସିନ୍ଦୂର’ ଅନ୍ତର୍ଭୁକ୍ତ। ଭାରତୀୟ ବାୟୁସେନା ମଧ୍ୟରେ ଦେଶୀୟ “ଏଲ୍ସିଏ ତେଜସ୍’ ଏବଂ ଅନ୍ୟାନ୍ୟ ଭାରତୀୟ ବିମାନ ଚଳାଚଳ କାର୍ଯ୍ୟକ୍ରମକୁ ପ୍ରୋତ୍ସାହିତ କରିବା ଦିଗରେ ଏୟାର୍ ମାର୍ଶଲ୍ ଦୀକ୍ଷିତଙ୍କ ପ୍ରୟାସ ବେଶ୍ ଜଣାଶୁଣା। ପ୍ରତିରକ୍ଷା କ୍ଷେତ୍ରରେ ଦେଶ “ଆତ୍ମନିର୍ଭର ଭାରତ’ ଅଭିଯାନକୁ ଆଗକୁ ବଢ଼ାଉଥିବା ବେଳେ, ଭାରତର ଦେଶୀୟ ବିମାନ ଚଳାଚଳ ବ୍ୟବସ୍ଥା ସହ ଜଡ଼ିତ ତାଙ୍କର ଅଭିଜ୍ଞତା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବିବେଚନା କରାଯାଏ। ଭାରତୀୟ ବାୟୁସେନାର ନୂତନ ମୁଖ୍ୟ ଭାବରେ, ସେ ଦେଶୀୟ କ୍ଷମତା ଏବଂ ଭାରତୀୟ ବିମାନ ଚଳାଚଳ ପ୍ରକଳ୍ପଗୁଡ଼ିକ ଉପରେ ଗୁରୁତ୍ୱକୁ ଆହୁରି ସୁଦୃଢ଼ କରିବେ ବୋଲି ଆଶା କରାଯାଉଛି।
About the Author
