ନୂଆଦିଲ୍ଲୀ: ବରିଷ୍ଠ କଂଗ୍ରେସ ନେତ୍ରୀ ତଥା ରାଜ୍ୟସଭା ସାଂସଦ ସୋନିଆ ଗାନ୍ଧୀଙ୍କୁ ଛାତି ଜନିତ ସମସ୍ୟା ଯୋଗୁଁ ନୂଆଦିଲ୍ଲୀର ସାର ଗଙ୍ଗାରାମ ହସ୍ପିଟାଲରେ ଭର୍ତ୍ତି କରାଯାଇଛି। ସେ ବର୍ତ୍ତମାନ ଏକ ଡାକ୍ତରୀ ଦଳର ତତ୍ତ୍ୱାବଧାନରେ ଅଛନ୍ତି। ଡାକ୍ତର ଅନୁପ ବାସୁ ତାଙ୍କ ଚିକିତ୍ସା ତଦାରଖ କରୁଛନ୍ତି। ପ୍ରିୟଙ୍କା ଗାନ୍ଧୀ ତାଙ୍କ ମାଆଙ୍କ ପାଖରେ ରହି ଦେଖାଶୁଣା କରୁଛନ୍ତି। ଡାକ୍ତରଙ୍କ କହିବା ଅନୁଯାୟୀ ସୋନିଆ ଗାନ୍ଧୀଙ୍କ ଅବସ୍ଥା ବର୍ତ୍ତମାନ ସ୍ଥିର ରହିଛି। ଜାନୁଆରୀରେ ମଧ୍ୟ ପୂର୍ବତନ କଂଗ୍ରେସ ମୁଖ୍ୟଙ୍କୁ ସାର୍ ଗଙ୍ଗାରାମ ହସ୍ପିଟାଲରେ ଭର୍ତ୍ତି କରାଯାଇଥିଲା। ହସ୍ପିଟାଲର ଅଧ୍ୟକ୍ଷ ଡାକ୍ତର ଅଜୟ ସ୍ୱରୂପଙ୍କ କହିବା ଅନୁଯାୟୀ ସୋନିଆ ଶ୍ୱାସକ୍ରିୟାରେ ସମସ୍ୟା ଅନୁଭବ କରୁଥିଲେ। ଡାକ୍ତରୀ ମୂଲ୍ୟାଙ୍କନରୁ ଜଣାପଡିଛି ଯେ ତାଙ୍କର ବ୍ରୋଙ୍କିଆଲ୍ ଆସ୍ଥମା ସାମାନ୍ୟ ବଢ଼ିଯାଇଛି । ଥଣ୍ଡା ପାଗ ଏବଂ ପରିବେଶ ପ୍ରଦୂଷଣ ଯୋଗୁଁ ଏହା ହୋଇଥିବା ଅନୁମାନ କରାଯାଉଛି। ସୋନିଆ ଗତ କିଛି ମାସ ମଧ୍ୟରେ ଅନେକ ସ୍ୱାସ୍ଥ୍ୟ ସମ୍ପର୍କିତ ସମସ୍ୟାକୁ ସାମନା କରିଛନ୍ତି। ଗତ ବର୍ଷ ୭୯ ବର୍ଷୀୟ ସୋନିଆ ପେଟ ସଂକ୍ରମଣ ଯୋଗୁଁ ଦିଲ୍ଲୀର ସାର୍ ଗଙ୍ଗା ରାମ ହସ୍ପିଟାଲରେ ଭର୍ତ୍ତି ହୋଇଥିଲେ। ସେ ଜୁନ୍ ୧୫ରୁ ହସ୍ପିଟାଲରେ ରହିଥିଲେ ଏବଂ ୪ଦିନ ପରେ ଜୁନ୍ ୧୯ ରେ ତାଙ୍କୁ ଡିସଚାର୍ଜ କରାଯାଇଥିଲା। ପୂର୍ବରୁ ଜୁନ୍ ୭ ତାରିଖରେ ଗାନ୍ଧୀ ନିୟମିତ ସ୍ୱାସ୍ଥ୍ୟ ପରୀକ୍ଷା ପାଇଁ ହିମାଚଳ ପ୍ରଦେଶର ସିମଲାରେ ଥିବା ଇନ୍ଦିରା ଗାନ୍ଧୀ ମେଡିକାଲ କଲେଜ ଏବଂ ହସ୍ପିଟାଲକୁ ମଧ୍ୟ ଯାଇଥିଲେ। ୨୦୨୨ ସେପ୍ଟେମ୍ବର ମାସରେ ଗାନ୍ଧୀ ଏକ ଡାକ୍ତରୀ ପରୀକ୍ଷା ପାଇଁ ଆମେରିକା ଯାତ୍ରା କରିଥିଲେ ଯାହା କୋଭିଡ୍ ୧୯ ମହାମାରୀ ଯୋଗୁଁ ପୂର୍ବରୁ ସ୍ଥଗିତ ରଖାଯାଇଥିଲା। ଏହି ଯାତ୍ରା ସମୟରେ ରାହୁଲ ଗାନ୍ଧୀ ମଧ୍ୟ ସାମିଲ ଥିଲେ।
About the Author
