ଭୁବନେଶ୍ୱର: ରାଜ୍ୟସଭା ନିର୍ବାଚନରେ କ୍ରସ୍ ଭୋଟିଂ କରିଥିବା ୬ଜଣ ବିଜେଡି ବିଧାୟକଙ୍କ ଉପରେ ଦଳ ସୁପ୍ରିମୋ ନବୀନ ପଟ୍ଟନାୟକ ନେଇଛନ୍ତି କଡ଼ା କାର୍ଯ୍ୟାନୁଷ୍ଠାନ। ଶନିବାର ସେମାନଙ୍କୁ ଦଳର ନିଲମ୍ବନ କରାଯାଇଛି। ନିଲମ୍ବିତ ବିଧାୟକମାନେ ଚକ୍ରମଣି କହଁର (ବାଲିଗୁଡ଼ା), ନବ କିଶୋର ମଲ୍ଲିକ (ଜୟଦେବ), ସୌଭିକ୍ ବିଶ୍ୱାଲ୍ (ଚୌଦ୍ୱାର-କଟକ), ସୁବାସିନୀ ଜେନା (ବସ୍ତା), ରମାକାନ୍ତ ଭୋଇ (ତିର୍ତୋଲ), ଏବଂ ଦେବୀ ରଞ୍ଜନ ତ୍ରିପାଠୀ (ବାଙ୍କି)। ଦଳବିରୋଧୀ କାର୍ଯ୍ୟକଳାପ ଓ ରାଜ୍ୟସଭା ନିର୍ବାଚନରେ କ୍ରସ ଭୋଟିଂ କାରଣରୁ ସେମାନଙ୍କୁ ଦଳରୁ ନିଲମ୍ବନ କରାଯାଇଥିବା ଚିଠିରେ ଉଲ୍ଲେଖ କରାଯାଇଛି। ଗତ ୧୭ ତାରିଖରେ ଦଳର ମୁଖ୍ୟ ସଚେତକ ପ୍ରମିଳା ମଲ୍ଲିକ ଏହି ୬ଜଣ ବିଧାୟକଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଥିଲେ। ଗତକାଲି ସେମାନେ ଏହାର ଜବାବ ରଖିଥିଲେ। ସେମାନଙ୍କ ଜବାବର ତର୍ଜମା କରାଯାଇ ଏପରି କାର୍ଯ୍ୟାନୁଷ୍ଠାନ ନିଆଯାଇଛି। ରାଜ୍ୟସଭା ନିର୍ବାଚନରେ ବିଜେଡି ଡା. ଦତ୍ତେଶ୍ୱର ହୋତାଙ୍କୁ ଚତୁର୍ଥ ଆସନ ପାଇଁ ପ୍ରାର୍ଥୀ କରିଥିଲା। ଡ. ହୋତାଙ୍କୁ ଭୋଟ ଦେବା ପାଇଁ ସମସ୍ତ ବିଜେଡି ବିଧାୟକଙ୍କୁ ହ୍ୱିପ୍ ଜାରି ହୋଇଥିଲା। ହେଲେ ଏହାକୁ ଅମାନ୍ୟ କରିଥିଲେ ଏହି ୬ ବିଧାୟକ। ଫଳରେ ବିଜେପି ସମର୍ôଥତ ସ୍ୱାଧୀନ ପ୍ରାର୍ଥୀ ଦିଲୀପ ରାୟ ବିଜୟୀ ହୋଇଥିଲେ। ସୂଚନାଯୋଗ୍ୟ ପୂର୍ବରୁ କ୍ରସ୍ ଭୋଟିଂ ଅଭିଯୋଗରେ ୩ କଂଗ୍ରେସ ବିଧାୟକ ରମେଶ ଜେନା, ସୋଫିଆ ଫିର୍ଦ୍ଦୋସ୍ ଓ ଦାଶରଥି ଗମାଙ୍ଗୋ ଦଳରୁ ନିଲମ୍ବିତ ହୋଇଥିଲେ।
About the Author
