ନୂଆଦିଲ୍ଲୀ: ବୁଧବାର ଲୋକସଭାରେ ବାଚସ୍ପତି ଓମ୍ ବିର୍ଲାଙ୍କୁ ବହିଷ୍କାର କରିବା ପାଇଁ ବିରୋଧୀଙ୍କ ଅନାସ୍ଥା ପ୍ରସ୍ତାବକୁ ପ୍ରତ୍ୟାଖ୍ୟାନ କରାଯାଇଛି। ଗୃହରେ ପ୍ରବଳ ସ୍ଲୋଗାନ ଏବଂ ବିରୋଧ ମଧ୍ୟରେ ସଂକଳ୍ପକୁ ସ୍ୱର ଭୋଟରେ ପରାଜିତ କରାଯାଇଛି। ଭୋଟ ପରେ ଗୃହକାର୍ଯ୍ୟକୁ ଦିନ ପାଇଁ ମୁଲତବୀ ରଖାଯାଇଛି। ଆସନ୍ତାକାଲି ପୂର୍ବାହ୍ନ ୧୧ଟାରେ ଗୃହ ପୁନର୍ବାର ବସିବ ବୋଲି ସ୍ଥିର କରାଯାଇଛି। ବାଚସ୍ପତି ଗୃହର ନିରପେକ୍ଷ କାର୍ଯ୍ୟକାରିତା ସୁନିଶ୍ଚିତ କରିବାରେ ବିଫଳ ହୋଇଥିବା ଅଭିଯୋଗ କରି ବିରୋଧୀ ଦଳଗୁଡ଼ିକ ଦ୍ୱାରା ଏହି ପ୍ରସ୍ତାବ ଆଗତ କରାଯାଇଥିଲା। ବିତର୍କ ସମୟରେ ସରକାର ଏହି ଅଭିଯୋଗକୁ ଦୃଢ଼ ଭାବରେ ପ୍ରତ୍ୟାଖ୍ୟାନ କରିଛନ୍ତି। କେନ୍ଦ୍ର ଗୃହମନ୍ତ୍ରୀ ଅମିତ ଶାହ ବିତର୍କର ଜବାବ ଦେବା ସମୟରେ ବିରୋଧୀଙ୍କ ଉପରେ ତୀବ୍ର ଆକ୍ରମଣ କରିଛନ୍ତି। ସଂକଳ୍ପକୁ ସଂସଦୀୟ ରାଜନୀତିରେ ଏକ ଗଭୀର ଦୁଃଖଦ ପଦକ୍ଷେପ ବୋଲି ସେ ବର୍ଣ୍ଣନା କରିଛନ୍ତି। ଶାହ କହିଛନ୍ତି ଯେ ବାଚସ୍ପତି ଗୃହର ଜଣେ ନିରପେକ୍ଷ ସଂରକ୍ଷକ ଭାବରେ କାର୍ଯ୍ୟ କରନ୍ତି, ଶାସକ ପକ୍ଷ ଏବଂ ବିରୋଧୀ ଉଭୟଙ୍କୁ ପ୍ରତିନିଧିତ୍ୱ କରନ୍ତି। ଏହି ଗୃହର ପ୍ରତିଷ୍ଠିତ ଇତିହାସ ଅନୁଯାୟୀ, ଏହାର କାର୍ଯ୍ୟ ପାରସ୍ପରିକ ବିଶ୍ୱାସ ଆଧାରରେ ପରିଚାଳିତ ହୁଏ। ବାଚସ୍ପତି ଶାସକ ଦଳ ଏବଂ ବିରୋଧୀ ଦଳ ଉଭୟଙ୍କ ପ୍ରତିନିଧିତ୍ୱ କରି ଜଣେ ନିରପେକ୍ଷ ସଂରକ୍ଷକ ଭାବରେ କାର୍ଯ୍ୟ କରନ୍ତି। ବାଚସ୍ପତିଙ୍କୁ ବହିଷ୍କାର ପାଇଁ ଏକ ପ୍ରସ୍ତାବ ଆସିବା ସଂସଦୀୟ ରାଜନୀତି ପାଇଁ ଦୁର୍ଭାଗ୍ୟଜନକ ବୋଲି ସେ କହିଛନ୍ତି। ଭାରତର ସଂସଦୀୟ ଇତିହାସରେ ଲୋକସଭା ବାଚସ୍ପତିଙ୍କ ବିରୁଦ୍ଧରେ ଏପରି ପ୍ରସ୍ତାବ ଅତ୍ୟନ୍ତ ବିରଳ ବୋଲି ଶାହ କହିଛନ୍ତି। ପ୍ରାୟ ଚାରି ଦଶନ୍ଧି ପରେ ବର୍ତ୍ତମାନ ଏ ପରି ପ୍ରସ୍ତାବ ଆସିଛି। ସେ ଏହା ମଧ୍ୟ ଦର୍ଶାଇଛନ୍ତି ଯେ ବିଜେପି ଦୀର୍ଘ ବର୍ଷ ଧରି ବିରୋଧୀ ଦଳରେ ରହିଆସିଛି, କିନ୍ତୁ ବାଚସ୍ପତିଙ୍କ ବିରୁଦ୍ଧରେ କେବେ ବି ଅନାସ୍ଥା ପ୍ରସ୍ତାବ ଆଣିନାହିଁ। ଦଳର ଇଚ୍ଛା ନୁହେଁ, ନିୟମ ଅନୁସାରେ ଗୃହ ଚାଲିବ। ସେ ଏହା ମଧ୍ୟ କହିଛନ୍ତି ଯେ ବାଚସ୍ପତିଙ୍କ ସାଧୁତା ଉପରେ ପ୍ରଶ୍ନ ଉଠାଇବା ସଂସଦୀୟ ପ୍ରତିଷ୍ଠାନଗୁଡ଼ିକର ବିଶ୍ୱସନୀୟତା ଉପରେ ସନ୍ଦେହ ସୃଷ୍ଟି କରିବା ସହିତ ସମାନ। ସରକାରଙ୍କୁ ବିରୋଧ କରିବା ପାଇଁ, ଆପଣ ବାଚସ୍ପତିଙ୍କ ଉପରେ ପ୍ରଶ୍ନ ଉଠାଉଛନ୍ତି, ଯିଏ ଗଣତନ୍ତ୍ରର ମର୍ଯ୍ୟାଦାର ପ୍ରତୀକ। ଶାହ ଆହୁରି ମଧ୍ୟ କହିଛନ୍ତି ଯେ ବାଚସ୍ପତିଙ୍କ ପାଖରେ ଅଣସଂସଦୀୟ ମନ୍ତବ୍ୟକୁ ଉଚ୍ଛେଦ କରିବାର ଏବଂ ସଂସଦୀୟ ନିୟମ ଢାଞ୍ଚା ମଧ୍ୟରେ ବିତର୍କ ସୁନିଶ୍ଚିତ କରିବାର ଅଧିକାର ଅଛି।
About the Author
