କଳାହାଣ୍ଡି: କଳାହାଣ୍ଡି ଜିଲ୍ଲା ବୋର୍ଡ଼ା ଫାଣ୍ଡି ଅନ୍ତର୍ଗତ କରଲାପିଠା ଗ୍ରାମରେ ଘଟିଥିବା ଏକ ବଡ଼ଧରଣର ଚୋରି ଘଟଣା ସମଗ୍ର ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି। ଗ୍ରାମର ପାର୍ଥବ ସାହୁଙ୍କ ଘରୁ ନଗଦ ପ୍ରାୟ ୨ ଲକ୍ଷ ୫୦ ହଜାର ଟଙ୍କା ସହ ୧୭ ଭରି ସୁନା ଓ ପ୍ରାୟ ୩୦ ଭରି ରୁପା ଅଳଙ୍କାର ଚୋରି ହୋଇଥିବା ନେଇ ପରିବାର ପକ୍ଷରୁ ଅଭିଯୋଗ ହୋଇଛି। ଅଭିଯୋଗ ଅନୁଯାୟୀ, ଗତକାଲି ବିଳମ୍ବିତ ରାତି ପ୍ରାୟ ୧ଟା ସମୟରେ ପାର୍ଥବ ସାହୁ ଓ ତାଙ୍କ ପରିବାର ଲୋକେ ଘରେ ଶୋଇଥିବା ବେଳେ ଦୁର୍ବୃତ୍ତମାନେ ସୁଯୋଗ ନେଇ ଘରେ ପ୍ରବେଶ କରିଥିଲେ। ପରେ ସେମାନେ ଆଲମିରା ଭାଙ୍ଗି ନଗଦ ଅଢ଼େଇ ଲକ୍ଷ ଟଙ୍କା, ୧୭ ଭରି ସୁନା ଓ ପ୍ରାୟ ୩୦ ଭରି ରୁପା ଅଳଙ୍କାର ନେଇ ଫେରାର ହୋଇଯାଇଥିବା ଅଭିଯୋଗ କରାଯାଇଛି।ଆଜି ସକାଳେ ପରିବାର ଲୋକେ ଉଠିବା ପରେ ଆଲମିରା ଭଙ୍ଗା ଥିବା ଏବଂ ଘରର ମୂଲ୍ୟବାନ ସାମଗ୍ରୀ ନଥିବା ଦେଖି ଚକିତ ହୋଇଥିଲେ। ପରେ ସ୍ଥାନୀୟ ବୋର୍ଡ଼ା ଫାଣ୍ଡି ପୋଲିସକୁ ଘଟଣା ସମ୍ପର୍କରେ ସୂଚନା ଦିଆଯାଇଥିଲା। ଖବର ଲେଖାଯିବା ସୁଦ୍ଧା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା କିମ୍ବା ଅଭିଯୋଗ ଉପରେ ଆଧିକାରିକ ପ୍ରତିକ୍ରିୟା ଦେଇଥିବା ସମ୍ପର୍କରେ ସୂଚନା ମିଳିନାହିଁ। ଶୋଇଥିବା ଅବସ୍ଥାରେ ଏଭଳି ସାହସିକ ଚୋରି ଘଟଣା ସ୍ଥାନୀୟ ଲୋକଙ୍କ ମଧ୍ୟରେ ଭୟ ଓ ଅସନ୍ତୋଷ ସୃଷ୍ଟି କରିଛି। ଅଞ୍ଚଳରେ ରାତ୍ରିକାଳୀନ ପାଟ୍ରୋଲିଂ ବଢ଼ାଇବା ସହ ଦୋଷୀଙ୍କୁ ଶୀଘ୍ର ଗିରଫ କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି।
About the Author
