ନୂଆଦିଲ୍ଲୀ: ସୋମବାର ଦେଶ ପାଳିଛି ୭୭ତମ ସାଧାରଣତନ୍ତ୍ର ଦିବସ। ନୂଆଦିଲ୍ଲୀର କର୍ତ୍ତବ୍ୟପଥଠାରେ ଆୟୋଜିତ ମୁଖ୍ୟ ଉତ୍ସବରେ ଦେଶର ସାଂସ୍କୃତିକ ବିବିଧତା, ବିକାଶ ଯାତ୍ରା ଓ ସାମରିକ ଶକ୍ତିର ବିଶାଳ ପ୍ରଦର୍ଶନ କରାଯାଇଛି। ଚଳିତ ବର୍ଷ ଗଣତନ୍ତ୍ର ଦିବସର ବିଷୟବସ୍ତୁ ଥିଲା ‘ବନ୍ଦେ ମାତରମ୍’ର ୧୫୦ ବର୍ଷ ପୂର୍ତ୍ତି । ଏହାଛଡ଼ା ଭାରତୀୟ ସେନାର ଅପରେସନ ସିନ୍ଦୂରର ବିଷୟବସ୍ତୁ ପ୍ରଦର୍ଶନ କରାଯାଇଥିଲା। ରାଷ୍ଟ୍ରପତି ଦ୍ରୌପଦୀ ମୁର୍ମୁ ଜାତୀୟ ପତାକା ଉତ୍ତୋଳନ ସହ ମିଳିତ ପ୍ୟାରେଡରେ ଅଭିିବାଦନ ଗ୍ରହଣ କରିଥିଲେ। ଚଳିତ ବର୍ଷ ଜନରାଜ୍ୟ ଦିବସରେ ୟୁରୋପିଆନ କାଉନସିଲର ସଭାପତି ଆଣ୍ଟୋନିଓ କୋଷ୍ଟା, ୟୁରୋପିଆନ କମିଶନ ଉରସୁଲା ବନ ଦେର ଲେଏନ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ସହ ବହୁ କେନ୍ଦ୍ରମନ୍ତ୍ରୀ, ଦେଶର ଶୀର୍ଷ ସେନା ଅଧିକାରୀ, ରାଜନେତା, ବିଦେଶ ରାଷ୍ଟ୍ରଦୂତ, ବରିଷ୍ଠ ଅଧିକାରୀ ଉପସ୍ଥିତ ଥିଲେ।
ଉତ୍ସବରେ ବ୍ରହ୍ମୋଶ, ଆକାଶ କ୍ଷେପଣାସ୍ତ୍ର, ରକେଟ୍ ଉତ୍କ୍ଷେପକ ସୂର୍ଯ୍ୟାସ୍ତ୍ର, ଅର୍ଜୁନ ଟ୍ୟାଙ୍କ ପ୍ରଦର୍ଶିତ ହୋଇଥିଲା। ୨,୫୦୦ ସାଂସ୍କୃତିକ କଳାକାର, ଶାସ୍ତ୍ରୀୟ ନୃତ୍ୟଶିଳ୍ପୀ, ବ୍ୟାଣ୍ଡ ‘ବିବିଧତା ମଧ୍ୟରେ ଏକତା’ ଥିମ୍ ଉପରେ ନିଜର କଳା ପ୍ରଦର୍ଶନ କରିଥିଲେ। ବିଭିନ୍ନ ରାଜ୍ୟର ରଂଗାରଂଗ କାର୍ଯ୍ୟକ୍ରମ ସହ ପ୍ରଜ୍ଞାପନ ମେଢ଼ ପ୍ରଦର୍ଶନ କରାଯାଇଥିଲା।
Leave a Reply