କରାଚି: ପାକିସ୍ତାନର ଅଶାନ୍ତ ବେଲୁଚିସ୍ତାନ ପ୍ରଦେଶରେ ରବିବାର ଦିନ କିଛି ଅଜ୍ଞାତ ସଶସ୍ତ୍ର ବ୍ୟକ୍ତି ଏକ ମାର୍ବଲ ଖଣି ଉପରେ ଆକ୍ରମଣ କରିବା ଫଳରେ ଅନ୍ତତଃ ୧୮ ଜଣ ଶ୍ରମିକ ଅପହୃତ ହୋଇଛନ୍ତି ଏବଂ ଜଣେ ବ୍ୟକ୍ତି ଆହତ ହୋଇଛନ୍ତି ବୋଲି ପୋଲିସ ସୂଚନା ଦେଇଛି। ଖୁଜଦାର ଜିଲ୍ଲାର ଦୁର୍ଗମ ନାଲ୍ ଅଞ୍ଚଳରେ ଏହି ଘଟଣା ଘଟିଛି। ସକାଳ ସମୟରେ ମୋଟରସାଇକେଲ ଓ ଅନ୍ୟାନ୍ୟ ଗାଡ଼ିରେ ଆସିଥିବା ସଶସ୍ତ୍ର ବ୍ୟକ୍ତିମାନେ ଖଣି ସ୍ଥାନରେ ପଶି ଆକ୍ରମଣ କରିଥିଲେ। କୌଣସି ବିଦ୍ରୋହୀ ଗୋଷ୍ଠୀ କିମ୍ବା ବ୍ୟକ୍ତି ଏହି ଆକ୍ରମଣ ପାଇଁ ନିଜକୁ ଦାୟୀ କରିନାହାନ୍ତି। ଯଦିଓ ପୋଲିସ ଏବଂ ପ୍ରାଦେଶିକ ସରକାର ଏପର୍ଯ୍ୟନ୍ତ ଏହି ଘଟଣାକୁ ଆନୁଷ୍ଠାନିକ ଭାବେ ନିଶ୍ଚିତ କରିନାହାନ୍ତି, ତଥାପି ନିଜ ନାମ ଗୋପନ ରଖିବା ସର୍ତ୍ତରେ ଦୁଇଜଣ ପୋଲିସ ଅଧିକାରୀ କହିଛନ୍ତି ଯେ ଆକ୍ରମଣକାରୀମାନେ ୧୮ ଜଣ ଶ୍ରମିକଙ୍କୁ ନେଇଯାଇଛନ୍ତି। ଜଣେ ପୋଲିସ ଅଧିକାରୀ କହିଛନ୍ତି, ସେମାନେ ବାଇକ୍ ଓ ଗାଡ଼ିରେ ଆସି ଗୁଳିଚାଳନା କରିଥିଲେ। ଏହାପରେ ସେଠାରେ ଉପସ୍ଥିତ ଥିବା ଶ୍ରମିକମାନଙ୍କୁ ଏକାଠି କରି ସେମାନଙ୍କ ମଧ୍ୟରୁ ୧୮ ଜଣଙ୍କୁ ଅପହରଣ କରି ଘଟଣାସ୍ଥଳରୁ ପଳାୟନ କରିଥିଲେ। ସେ ଆହୁରି ମଧ୍ୟ କହିଛନ୍ତି ଯେ, ଏହି ଆକ୍ରମଣରେ ଅନ୍ୟ ଜଣେ ଶ୍ରମିକ ଆହତ ହୋଇଛନ୍ତି। ଅପହୃତ ହୋଇଥିବା ଶ୍ରମିକମାନଙ୍କ ମଧ୍ୟରୁ ଅଧିକାଂଶ ନିକଟସ୍ଥ ଗ୍ରାମ ଓ ଅଞ୍ଚଳର ବାସିନ୍ଦା ଅଟନ୍ତି। ଏହା ପୂର୍ବରୁ ଶନିବାର ଦିନ ଅନ୍ୟ ଏକ ଘଟଣାରେ, କ୍ୱେଟା-କରାଚି ରାଜପଥରେ ମସ୍ତୁଙ୍ଗ ନିକଟରେ ସଶସ୍ତ୍ର ବ୍ୟକ୍ତିମାନେ ଏକ ବସ୍କୁ ଅଟକାଇ ୨୦ ଜଣ ପୋଲିସ ପ୍ରଶିକ୍ଷାର୍ଥୀ ଅଧିକାରୀଙ୍କୁ ଅପହରଣ କରିନେଇଥିଲେ। ଏହି ଅଧିକାରୀମାନେ କଲାତ ପୋଲିସ ଟ୍ରେନିଂ ସେଣ୍ଟରର ଥିଲେ। ସେମାନେ ବର୍ତ୍ତମାନ କେଉଁଠାରେ ଅଛନ୍ତି, ସେ ବିଷୟରେ କୌଣସି ସୂଚନା ମିଳିନାହିଁ। ଆଫଗାନିସ୍ତାନ ସୀମାକୁ ଲାଗି ରହିଥିବା ବେଲୁଚିସ୍ତାନ ପ୍ରଦେଶରେ, ଗତ କିଛି ବର୍ଷ ମଧ୍ୟରେ ସାଧାରଣ ନାଗରିକ ଏବଂ ସୁରକ୍ଷା ବାହିନୀ ଉପରେ ଆକ୍ରମଣ ତଥା ଅପହରଣ ଘଟଣା ବୃଦ୍ଧି ପାଇଛି।
About the Author
