ବାରିପଦା ; ବିଶିଷ୍ଟ ମାନବାଧିକାର କର୍ମୀ ତଥା ଗାନ୍ଧୀବାଦୀ ଚିନ୍ତାଧାରାର ଅନୁଗାମୀ ସଚ୍ଚିଦାନନ୍ଦ ସାହୁଙ୍କୁ ଅନ୍ୟାୟ ଭାବେ ଗିରଫ, ଅପମାନଜନକ ବ୍ୟବହାର ଓ ହଇରାଣ କରାଯାଇଥିବା ଅଭିଯୋଗ ସମ୍ପର୍କରେ ଜାତୀୟ ମାନବାଧିକାର ଆୟୋଗ ହସ୍ତକ୍ଷେପ କରିଥିବାର ଜଣାଯାଇଛି ।
ମାନବାଧିକାର ସଂଗଠନ ହ୍ୟୁମାନ ରାଇଟ୍ସ ଫ୍ରଣ୍ଟ ଇଣ୍ଡିଆ ପକ୍ଷରୁ ଦାଖଲ ଅଭିଯୋଗକୁ ବିଚାରକୁ ନେଇ ଆୟୋଗ,୧୪ ଅକ୍ଟୋବର ୨୦୨୬ ତାରିଖରେ ମୟୂରଭଞ୍ଜ ଜିଲ୍ଲାର ଆରକ୍ଷୀ ଅଧୀକ୍ଷକଙ୍କୁ ଘଟଣାର ତଦନ୍ତ କରି ଦୁଇ ସପ୍ତାହ ମଧ୍ୟରେ ଆକ୍ସନ ଟେକେନ୍ ରିପୋର୍ଟ (ଏଟିଆର୍) ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ଏହି ମାମଲାର ଏନ୍ଏଚ୍ଆର୍ସି କେସ୍ ନମ୍ବର ହେଉଛି ୧୧୦୪/୧୮/୯/୨୦୨୬।
ଏଚ୍ଆର୍ଏଫ୍ ଇଣ୍ଡିଆର ଅଧ୍ୟକ୍ଷ ମନୋଜ ଜେନା ଏହି ଅଭିଯୋଗ ଦାଖଲ କରିଥିଲେ। କରଞ୍ଜିଆ ଥାନା କେସ୍ ନମ୍ବର ୩୫୨/୨୦୨୬ ସହ ସମ୍ପୃକ୍ତ ଏହି ମାମଲାରେ ପୁଲିସ କ୍ଷମତାର ଅପବ୍ୟବହାର ଓ ଶ୍ରୀ ସାହୁଙ୍କ ମୌଳିକ ଅଧିକାରର ଉଲ୍ଲଂଘନ ହୋଇଥିବା ର ଅଭିଯୋଗ ହୋଇଛି।
ଏନ୍ଏଚ୍ଆର୍ସିଙ୍କ ପତ୍ରରେ ଉଲ୍ଲେଖ ଅନୁଯାୟୀ, ୨୯ ସେପ୍େଟମ୍ବର ୨୦୨୬ରେ ମୟୂରଭଞ୍ଜ ଜିଲ୍ଲା, କରଞ୍ଜିଆ ଷ୍ଟାଡିୟମ ନିକଟରେ ଜନାର୍ଦ୍ଦନ ବେହେରାଙ୍କ ଅଭିଯୋଗ ଆଧାରରେ ଏକ ଏଫ୍ଆଇଆର୍ ରୁଜୁ ହୋଇଥିଲା। ପ୍ରଶାସନିକ ସ୍ୱଚ୍ଛତା ସମ୍ପର୍କରେ ପ୍ରଶ୍ନ ଉଠାଇ ଶ୍ରୀ ସାହୁ ସାମାଜିକ ଗଣମାଧ୍ୟମରେ କିଛି ପୋଷ୍ଟ କରିଥିବା ଏବଂ ଏହାକୁ ନେଇ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିବା ଅଭିଯୋଗରେ ଦର୍ଶାଯାଇଛି।
ଏଥିରେ ଜାତିଭିତ୍ତିକ ମନ୍ତବ୍ୟ ଦିଆଯାଇଥିବା ଅଭିଯୋଗ ମଧ୍ୟ ରହିଛି। ଏଚ୍ଆର୍ଏଫ୍ ଇଣ୍ଡିଆର ଅଭିଯୋଗ ଅନୁଯାୟୀ, ଆବଶ୍ୟକ ପ୍ରମାଣର ଉପଯୁକ୍ତ ଯାଞ୍ଚ ନକରି ଶ୍ରୀ ସାହୁଙ୍କୁ ଗିରଫ କରାଯାଇଥିଲା ଏବଂ ଗିରଫ ସମୟରେ ଆଇନ ଅନୁଯାୟୀ ପାଳନ କରିବାକୁ ଥିବା ସୁରକ୍ଷାମୂଳକ ବ୍ୟବସ୍ଥା ଅନୁସରଣ କରାଯାଇନଥିଲା। ତାଙ୍କୁ ଅପମାନଜନକ ଭାବେ ହାତକଡ଼ି ପିନ୍ଧାଯାଇଥିବା ଏବଂ ଜଣେ ମାନବାଧିକାର କର୍ମୀଙ୍କୁ ଭୟଭୀତ କରିବା ପାଇଁ ଆଇନଗତ ପ୍ରକ୍ରିୟାର ଅପବ୍ୟବହାର ହୋଇଥିବା ମଧ୍ୟ ଅଭିଯୋଗ ହୋଇଛି।
ଅଭିଯୋଗର ସମୀକ୍ଷା ପରେ ଏନ୍ଏଚ୍ଆର୍ସି ଉଲ୍ଲେଖ କରିଛନ୍ତି ଯେ, ଏହି ଅଭିଯୋଗଗୁଡ଼ିକ ସତ୍ୟ ପ୍ରମାଣିତ ହେଲେ ମାନବାଧିକାର ଉଲ୍ଲଂଘନ ଓ ପୁଲିସ କ୍ଷମତାର ଅପବ୍ୟବହାର ସମ୍ପର୍କିତ ଗୁରୁତର ପ୍ରଶ୍ନ ଉଠିପାରେ। ଏହା ଭାରତୀୟ ସମ୍ବିଧାନର ଅନୁଚ୍ଛେଦ ୨୧ ଅନ୍ତର୍ଗତ ଜୀବନ ଓ ବ୍ୟକ୍ତିଗତ ସ୍ୱାଧୀନତାର ଅଧିକାର ସହ ଜଡ଼ିତ। ଏହାପରେ ଆୟୋଗ,ମୟୂରଭଞ୍ଜ ଏସ୍ପିଙ୍କୁ ଘଟଣାର ତଦନ୍ତ କରି ଯଥାଶୀଘ୍ର, ଅର୍ଥାତ୍ ଦୁଇ ସପ୍ତାହ ମଧ୍ୟରେ ରିପୋର୍ଟ ଦାଖଲ କରିବାକୁ କହିଛନ୍ତି। ଆୟୋଗଙ୍କ ପତ୍ର ପ୍ରାପ୍ତି ଦିନଠାରୁ ଦୁଇ ସପ୍ତାହ ମଧ୍ୟରେ ଆକ୍ସନ ଟେକେନ୍ ରିପୋର୍ଟ ପଠାଇବାକୁ ମଧ୍ୟ ନିର୍ଦ୍ଦେଶ ରହିଛି।
ଏହି ତଦନ୍ତରେ ଶ୍ରୀ ସାହୁଙ୍କ ଗିରଫର ପରିସ୍ଥିତି, ତାଙ୍କ ପ୍ରତି କରାଯାଇଥିବା ବ୍ୟବହାର, ଗିରଫ ସମ୍ପର୍କିତ ଆଇନଗତ ପ୍ରକ୍ରିୟାର ପାଳନ ଏବଂ ଏଚ୍ଆର୍ଏଫ୍ ଇଣ୍ଡିଆ ଉଠାଇଥିବା ଅନ୍ୟାନ୍ୟ ପ୍ରଶ୍ନର ଯାଞ୍ଚ ଗୁରୁତ୍ୱପୂର୍ଣ୍ଣ ହେବ। ଏଚ୍ଆର୍ଏଫ୍ ଇଣ୍ଡିଆ କହିଛି ଯେ, ସାଧାରଣ ପ୍ରଶାସନର ସ୍ୱଚ୍ଛତା ସମ୍ପର୍କରେ ପ୍ରଶ୍ନ ଉଠାଇବା ଓ ଜନସ୍ୱାର୍ଥ ପ୍ରସଙ୍ଗରେ ମତ ରଖିବା ପାଇଁ ମାନବାଧିକାର କର୍ମୀମାନେ ଆଇନସମ୍ମତ ସୁରକ୍ଷା ଓ ମର୍ଯ୍ୟାଦା ପାଇବା ଉଚିତ। ଏଥିସହ ଅଭିଯୋଗଗୁଡ଼ିକର ନିରପେକ୍ଷ, ସ୍ୱଚ୍ଛ ଓ ପ୍ରମାଣଭିତ୍ତିକ ତଦନ୍ତ ହେବା ଆବଶ୍ୟକ। ଯଦି କୌଣସି ଅନିୟମିତତା କିମ୍ବା ଅଧିକାର ଉଲ୍ଲଂଘନ ପ୍ରମାଣିତ ହୁଏ, ତେବେ ଆଇନ ଅନୁଯାୟୀ ଦାୟିତ୍ୱ ନିର୍ଦ୍ଧାରଣ କରାଯିବା ଉଚିତ। ଏନ୍ଏଚ୍ଆର୍ସିଙ୍କ ଏହି ନିର୍ଦ୍ଦେଶ ଅଭିଯୋଗର ଆନୁଷ୍ଠାନିକ ତଦନ୍ତ ପାଇଁ ଏକ ପଦକ୍ଷେପ। ତଦନ୍ତ ରିପୋର୍ଟ ଓ ଆକ୍ସନ ଟେକେନ୍ ରିପୋର୍ଟ ଆଧାରରେ ଘଟଣାର ପ୍ରକୃତ ତଥ୍ୟ ସ୍ପଷ୍ଟ ହେବା ସହ ଆଇନ ଅନୁଯାୟୀ ପରବର୍ତ୍ତୀ ପଦକ୍ଷେପ ନିର୍ଦ୍ଧାରଣ ହୋଇପାରିବ ବୋଲି କୁହାଯାଇଛି ।
About the Author
