ବାଲିଚନ୍ଦ୍ରପୁର: ଗତ କାଲି ବିଳମ୍ବିତ ରାତିରେ ଜଣକ ଚାଳ ଘରେ ଜଣେ ଯୁବକ କୌଣସି କାରଣରୁ ନିଆଁ ଲଗାଇ ଛୁ ମାରିଥିଲା । ତେବେ ଏହି ଅଗ୍ନିକାଣ୍ଡରେ ଗୋଟିଏ ବଖରା ଚାଳ ଘର ସହିତ ତିନୋଟି ଛେଳି ଜୀବନ୍ତ ଦଗ୍ଧ ହୋଇ ଯାଇଥିଲେ । ଏଥି ସହିତ ସେହି ଘର ଭିତରେ ଥିବା ସମସ୍ତ ଆସବାବପତ୍ର ପୋଡି ପାଉଁଶ ହୋଇଯାଇଥିବା ବେଳେ ଗୋଟିଏ ସ୍କୁଟରର କିଛି ଅଂଶ ପୋଡି ଯାଇଥିଲା । ତେବେ ନିଆଁ ବ୍ୟାପିବା ପରେ ଘର ଲୋକେ ଆସି ଦେଖିଲା ବେଳକୁ ଜଣେ ଯୁବକ ସେଠାରୁ ଦୌଡ଼ି ପଳେଇ ଯାଉଥିଲା । ଯୁବକର ମୋବାଇଲ ସେଠାରେ ପଡି ଯିବା ପରେ ପରିବାର ଲୋକେ ତାହାକୁ ସଂଗ୍ରହ କରିଥିଲେ । ଏଭଳି ଏକ ଘଟଣା ବାଲିଚନ୍ଦ୍ରପୁର ଥାନା ଅନ୍ତର୍ଗତ ନଳିପୁର ଗ୍ରାମର ପଠାନ ମାହାଲା ଗ୍ରାମରେ ଘଟିଥିଲା । ସୂଚନା ମୁତାବକ ଏହି ଗ୍ରାମର ଜଲାଲ ଖାଁଙ୍କ ଚାଳ ଘରେ ସେହି ଗ୍ରାମର ଫୁରକାନ ଖାଁ ଗତ କାଲି ରାତିରେ ନିଆଁ ଲଗାଇ ଦେଇଥିବା ନେଇ ଆଜି ତାଙ୍କ ପତ୍ନୀ ମମତାଜ ବିବି ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ଆଧାରରେ ଥାନା କେଶ ନମ୍ବର ୧୧୫/୨୬ରେ ଏକ ମାମଲା ରୁଜୁ କରାଯାଇଛି । ତେବେ ପୋଲିସ ଘଟଣା ସ୍ଥଳକୁ ଯାଇ ଯୁବକର ମୋବାଇଲ ଜବତ ପୂର୍ବକ ଘଟଣା ସମ୍ପର୍କରେ ଅଧିକ ତଦନ୍ତ ଜାରି ରଖିଥିବା ନେଇ ପୋଲିସ ଏସଆଇ ହରିଶ୍ଚନ୍ଦ୍ର ସିଂହ ସୂଚନା ଦେଇଛନ୍ତି
About the Author
