ନୂଆଦିଲ୍ଲୀ: ଭାରତରେ ତୈଳ ସଂକଟ ଏଡ଼ାଇବା ପାଇଁ ଉଦ୍ୟମ ଜାରି ରହିଛି। ପଶ୍ଚିମ ଏସିଆ ସଂଘର୍ଷ ମଧ୍ୟରେ ଭାରତକୁ ମିଳିଛି ବଡ଼ ଆଶ୍ୱସ୍ତି। ଭାରତ ଗୁରୁତ୍ୱପୂର୍ଣ୍ଣ ଜଳପଥ ଦେଇ ଅଶୋଧିତ ତୈଳ ଏବଂ ପ୍ରାକୃତିକ ଗ୍ୟାସ୍ ପରିବହନର ସୁରକ୍ଷିତ ଗତିବିଧି ସୁନିଶ୍ଚିତ କରିବାକୁ ଚାହୁଁଥିବାରୁ ଇରାନ ଭାରତ-ପତାକାଯୁକ୍ତ ଟ୍ୟାଙ୍କରକୁ ହର୍ମୁଜ୍ ପ୍ରଣାଳୀ ଦେଇ ଯିବାକୁ ଅନୁମତି ଦେଇଛି। ଦୁଇ ଦେଶ ମଧ୍ୟରେ କୂଟନୈତିକ ଆଲୋଚନା ପରେ ଏହା ସମ୍ଭବ ହୋଇଛି। ଆମେରିକା, ୟୁରୋପ ଏବଂ ଇସ୍ରାଏଲ ସହିତ ଜଡିତ ଜାହାଜଗୁଡ଼ିକ ଜାରି ରହିଥିବା ଆଞ୍ଚଳିକ ସଂଘର୍ଷ ମଧ୍ୟରେ ପ୍ରତିବନ୍ଧକର ସମ୍ମୁଖୀନ ହେବା ବେଳେ ଭାରତୀୟ ପତାକାଯୁକ୍ତ ଟ୍ୟାଙ୍କର ପୁଷ୍ପକ ଏବଂ ପରିମଲ ସୁରକ୍ଷିତ ଭାବରେ ପ୍ରଣାଳୀ ଦେଇ ଯିବାକୁ ସକ୍ଷମ ହୋଇଛି। ବୈଦେଶିକ ମନ୍ତ୍ରୀ ଡକ୍ଟର ଏସ୍. ଜୟଶଙ୍କର ମଙ୍ଗଳବାର ବିଳମ୍ବିତ ରାତିରେ ଇରାନର ବୈଦେଶିକ ମନ୍ତ୍ରୀ ଆବାସ ଆରାଘଚିଙ୍କ ସହ କଥାବାର୍ତ୍ତା କରିବା ସମୟରେ ହର୍ମୁଜ୍ ଦେଇ ଟ୍ୟାଙ୍କରର ସୁରକ୍ଷିତ ଗମନ ଏକ ପ୍ରମୁଖ ପ୍ରସଙ୍ଗ ଥିଲା । ଇରାନ୍ ସଂଘର୍ଷ ଆରମ୍ଭ ହେବା ପରଠାରୁ ଦୁଇ ନେତାଙ୍କ ମଧ୍ୟରେ ତୃତୀୟ ଆଲୋଚନା ଥିଲା। ପୂର୍ବରୁ କେନ୍ଦ୍ରମନ୍ତ୍ରୀ ବିଶ୍ୱ ସୁରକ୍ଷା ଏବଂ ଶକ୍ତି ବଜାର ଉପରେ ସଙ୍କଟର ପ୍ରଭାବ ବିଷୟରେ ଆଲୋଚନା କରିବା ପାଇଁ ରୁଷର ବୈଦେଶିକ ମନ୍ତ୍ରୀ ସେର୍ଗେଇ ଲାଭରୋଭ, ଫ୍ରାନ୍ସର ବୈଦେଶିକ ମନ୍ତ୍ରୀ ଜିନ୍-ନୋଏଲ୍ ବାରୋଟ୍ ଏବଂ ୟୁରୋପୀୟ ସଂଘର ବୈଦେଶିକ ନୀତି ମୁଖ୍ୟ କାଜା କାଲାସଙ୍କ ସମେତ ଅନେକ ନେତାଙ୍କ ସହ ଟେଲିଫୋନ୍ ମାଧ୍ୟମରେ ଆଲୋଚନା କରିଥିଲେ।
About the Author
