ରାଞ୍ଚି: ଝାଡ଼ଖଣ୍ଡର ଚତରା ଜିଲ୍ଲାରେ ସୋମବାର ସନ୍ଧ୍ୟାରେ ଦିଲ୍ଲୀ ଅଭିମୁଖେ ଯାତ୍ରା କରୁଥିବା ଏକ ଏୟାର ଆମ୍ବୁଲାନ୍ସ ଦୁର୍ଘଟଣାଗ୍ରସ୍ତ ହେବା ଫଳରେ ସମସ୍ତ ୭ଜଣ ଯାତ୍ରୀଙ୍କ ମୃତ୍ୟୁ ଘଟିଛି। ରେଡବର୍ଡ ଏୟାରୱେଜ୍ ପ୍ରାଇଭେଟ୍ ଲିମିଟେଡ୍ ଦ୍ୱାରା ପରିଚାଳିତ ଏହି ଛୋଟ ବିମାନଟି ସନ୍ଧ୍ୟା ୭.୧୧ ରେ ରାଞ୍ଚି ବିମାନବନ୍ଦରରୁ ଉଡ଼ାଣ ଆରମ୍ଭ କରିବାର କିଛି ସମୟ ପରେ ସିମାରିଆ ନିକଟରେ ଖସି ପଡ଼ିଥିଲା। ଚତରା ଡେପୁଟି କମିଶନର କୀର୍ତ୍ତିଶ୍ରୀ ଜି କହିଛନ୍ତି, ବିମାନଟି ସନ୍ଧ୍ୟା ୭.୩୦ ସମୟରେ ନିଖୋଜ ହୋଇଯାଇଥିଲା। ସମ୍ଭବତଃ ଝଡ଼ବର୍ଷା ଯୋଗୁଁ ଏହି ଦୁର୍ଘଟଣା ଘଟିଥିଲା। ସମସ୍ତ ମୃତଦେହ ଉଦ୍ଧାର କରାଯାଇଛି। ମୃତକମାନେ ହେଲେ କ୍ୟାପଟେନ୍ ବିବେକ ବିକାଶ ଭଗତ, କ୍ୟାପଟେନ୍ ସଭରାଜଦୀପ ସିଂହ, ସଞ୍ଜୟ କୁମାର, ବିକାଶ କୁମାର ଗୁପ୍ତା, ସଚିନ୍ କୁମାର ମିଶ୍ର, ଅର୍ଚ୍ଚନା ଦେବୀ ଏବଂ ଧୁରୁ କୁମାର। ରାଞ୍ଚିର ଦେବକମଲ୍ ହସ୍ପିଟାଲର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅନନ୍ତ ସିହ୍ନା କହିଛନ୍ତି ଯେ, ହସ୍ପିଟାଲର ଜଣେ ରୋଗୀ ଏୟାର ଆମ୍ବୁଲାନ୍ସ ବ୍ୟବସ୍ଥା କରିଥିଲେ। ଲାତେହାର ଜିଲ୍ଲାର ଚାନ୍ଦୱାର ବାସିନ୍ଦା ସଂଜୟ କୁମାର (୪୧)ଙ୍କୁ ଫେବ୍ରୁଆରୀ ୧୬ ତାରିଖରେ ୬୫ ପ୍ରତିଶତ ପୋଡ଼ି ଆହତ ଅବସ୍ଥାରେ ହସ୍ପିଟାଲକୁ ଅଣାଯାଇଥିଲା। ତାଙ୍କୁ ହସ୍ପିଟାଲରେ ଚିକିତ୍ସା କରାଯାଉଥିଲା। ହେଲେ ରୋଗୀଙ୍କୁ ଅଧିକ ଚିକିତ୍ସା ନିମନ୍ତେ ଦିଲ୍ଲୀ ସ୍ଥାନାନ୍ତର ପାଇଁ ଏକ ଏୟାର ଆମ୍ବୁଲାନ୍ସ ବ୍ୟବସ୍ଥା କରାଯାଇଥିଲା। ସେହି ଅନୁଯାୟୀ ଅପରାହ୍ନ ପ୍ରାୟ ୪ଟା ୩୦ରେ ଦିଲ୍ଲୀ ପାଇଁ ରୋଗୀ ହସ୍ପିଟାଲ ଛାଡିଥିଲେ ବୋଲି ସେ କହିଛନ୍ତି।
About the Author
