ନୂଆଦିଲ୍ଲୀ: ଦିଲ୍ଲୀ ପୋଲିସର ସ୍ପେଶାଲ୍ ସେଲ୍ ତାମିଲନାଡୁରୁ ୮ ଜଣ ସନ୍ଦିଗ୍ଧ ଆତଙ୍କବାଦୀଙ୍କୁ ଗିରଫ କରି ଏକ ବଡ଼ ଧରଣର ଆତଙ୍କବାଦୀ ଷଡ଼ଯନ୍ତ୍ର ପଣ୍ଡ କରିବାରେ ସକ୍ଷମ ହୋଇଛି। ଗିରଫ ସନ୍ଦିଗ୍ଧଙ୍କ ମଧ୍ୟରେ ଜଣେ ବାଂଲାଦେଶୀ ନାଗରିକ ରହିଛି। ପାକିସ୍ତାନର ଆଇଏସଆଇ ଏବଂ ବାଂଲାଦେଶୀ ଆତଙ୍କବାଦୀ ଗୋଷ୍ଠୀଙ୍କ ନିଦ୍ଦେର୍ଦଶରେ ସମସ୍ତେ ଭାରତରେ ଏକ ବଡ଼ ଆକ୍ରମଣ ଯୋଜନା କରୁଥିଲେ ବୋଲି ପୋଲିସ କହିଛି। ତାମିଲନାଡ଼ୁ ତିରୁପ୍ପୁରର ବିଭିନ୍ନ ପୋଷାକ ୟୁନିଟ୍ରୁ ସେମାନଙ୍କୁ ଗିରଫ କରାଯାଇଛି। ସନ୍ଦିଗ୍ଧଙ୍କୁ ଟ୍ରେନ୍ ଯୋଗେ ଦିଲ୍ଲୀ ଅଣାଯାଇଥିଲା। କର୍ତ୍ତୃପକ୍ଷ ସେମାନଙ୍କଠାରୁ ୮ଟି ମୋବାଇଲ୍ ଫୋନ୍ ଏବଂ ୧୬ଟି ସିମ୍ କାର୍ଡ ଜବତ କରିଛନ୍ତି। ସନ୍ଦିଗ୍ଧଙ୍କ ମଧ୍ୟରେ ପଶ୍ଚିମବଙ୍ଗରୁ ୨ଜଣ, ଉଥୁକୁଲିରୁ ୨ ଜଣ, ପଲ୍ଲାଦମ୍ରୁ ୩ ଜଣ ଏବଂ ତିରୁମୁରୁଗାନପୁଣ୍ଡିରୁ ଜଣେ ସନ୍ଦିଗ୍ଧକୁ ଗିରଫ କରାଯାଇଛି। ସନ୍ଦିଗ୍ଧମାନେ ସେମାନଙ୍କର ପରିଚୟ ଲୁଚାଇବା ପାଇଁ ନକଲି ଆଧାର କାର୍ଡ ବ୍ୟବହାର କରୁଥିଲେ। ପୋଷାକ ଶିଳ୍ପରେ କାମ କରିବା ବାହାନାରେ ସେମାନେ ଆତଙ୍କବାଦୀ ନେଟୱାର୍କ ବିସ୍ତାର କରୁଥିଲେ ବୋଲି ଅଭିଯୋଗ ହୋଇଛି। ପୋଲିସ କହିଛି ଯେ ସନ୍ଦିଗ୍ଧମାନେ ପାକିସ୍ତାନ-ଭିତ୍ତିକ ଆତଙ୍କବାଦୀ ସଂଗଠନଗୁଡ଼ିକୁ ସମର୍ଥନ କରି ସୋସିଆଲ ମିଡିଆରେ ବିଷୟବସ୍ତୁ ପୋଷ୍ଟ କରୁଥିଲେ ଏବଂ ସ୍ଥାନୀୟ ଯୁବକମାନଙ୍କୁ ପ୍ରଭାବିତ କରିବାକୁ ଚେଷ୍ଟା କରୁଥିଲେ। ଡିଭାଇସଗୁଡ଼ିକରୁ ମିଳିଥିବା ତଥ୍ୟରୁ ଅନେକ ବିଦେଶୀ ହ୍ୟାଣ୍ଡଲରଙ୍କ ସହିତ ସମ୍ପର୍କ ପ୍ରକାଶ ପାଇଛି। ସନ୍ଦିଗ୍ଧମାନେ ସୀମା ପାରରୁ ଆର୍ଥିକ ସହାୟତା ପାଉଥିଲେ। ତଦନ୍ତ ବେଳେ ଜଣାପଡ଼ିଛ ଯେ ସେମାନେ ଦିଲ୍ଲୀରେ “ମୁକ୍ତ କାଶ୍ମୀର’ ପୋଷ୍ଟର ଏବଂ ଅନ୍ୟାନ୍ୟ ସନ୍ଦେହଜନକ କାର୍ଯ୍ୟ ସହିତ ଜଡିତ କାର୍ଯ୍ୟକଳାପରେ ସାମିଲ ଥିଲେ।
About the Author
