କୋଲକାତା: ପାଇଲଟଙ୍କ ଉପସ୍ଥିତବୁଦ୍ଧି ଯୋଗୁଁ ୨୩୬ ଯାତ୍ରୀଙ୍କୁ ନେଇ କାଠମାଣ୍ଡୁରୁ ଇସ୍ତାନବୁଲ ଯାଉଥିବା ତୁର୍କୀ ଏୟାରଲାଇନ୍ସର ଏକ ବିମାନ ସମ୍ଭାବ୍ୟ ଦୁର୍ଘଟଣାରୁ ଅଳ୍ପକେ ରକ୍ଷା ପାଇଯାଇଛି। ବିମାନର ଡାହାଣ ପଟ ଇଞ୍ଚିନରେ ନିଆଁ ଲାଗିଥିବା ଦେଖି ବୁଧବାର ଅପରାହ୍ଣରେ ଏହାର ପାଇଲଟ କୋଲକାତାର ନେତାଜୀ ସୁଭାଷ ଚନ୍ଦ୍ର ବୋଷ ଅନ୍ତର୍ଜାତୀୟ ବିମାନ ବନ୍ଦରରେ ବିମାନଟିକୁ ସଂପୂର୍ଣ୍ଣ ଜରୁରି ଅବତରଣ କରାଇଛନ୍ତି। ଟିଏଚୱାଇ-୭୨୭ ବିମାନରେ ୨୨୫ ଯାତ୍ରୀଙ୍କ ସହ ୧୧ଜଣ ବିମାନ କର୍ମଚାରୀ ରହିଥିଲେ। ବିମାନଟି ନେପାଳର ତ୍ରିଭୁବନ ଅନ୍ତର୍ଜାତୀୟ ବିମାନ ବନ୍ଦରରୁ ଅପରାହ୍ଣ ୧ଟା ୨୯ ମିନିଟରେ ଉଡ଼ାଣ ଭରିବା ପରେ ଜଣେ କର୍ମଚାରୀ ଡାହାଣ ପାଶ୍ୱର୍ ଇଞ୍ଜିନରେ ନିଆଁ ଧରିଥିବା ଦେଖିବାକୁ ପାଇଥିଲେ। ନେପାଳର ବେସାମରିକ ବିମାନ ଚଳାଚଳ କର୍ତ୍ତୃପକ୍ଷର ଉପମୁଖପାତ୍ର ଜ୍ଞାନେନ୍ଦ୍ର ଭୁଲ୍ଙ୍କ ସୂଚନା ଅନୁସାରେ ବିମାନର ପାଇଲଟ ତୁରନ୍ତ ଏ ସଂପର୍କରେ କାଠମାଣ୍ଡୁ ଟାୱାରକୁ ଅବଗତ କରିଥିଲେ। ଏହା ସହ ସଂପୃକ୍ତ ଇଂଜିନଟିକୁ ବନ୍ଦ କରିଦେଇଥିଲେ। ଜରୁରୀ ଅବତରଣ ପରେ କୋଲକାତାରେ ବିମାନର ଯାଞ୍ଚ ଚାଲୁ ରହିଛି।
କୋଲକାତାରେ ଜରୁରୀ ଅବତରଣ କଲା ତୁର୍କୀର ବିମାନ
Leave a Reply