ପୁରୁଷୋତ୍ତମପୁର: ସାରା ଓଡ଼ିଶାରେ ପ୍ରଥମ ଥର କରି ଗଞ୍ଜାମ ଜିଲାର ପ୍ରସିଦ୍ଧ ଶକ୍ତିପୀଠ ମା’ ତାରାତାରିଣୀଙ୍କ ପୀଠରୁ ମଙ୍ଗଳବାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ‘ମୁଖ୍ୟମନ୍ତ୍ରୀ କନ୍ୟା ବିବାହ ଯୋଜନାର’ ଶୁଭାରମ୍ଭ କରିଛନ୍ତି । ପଣ୍ଡିତ ବ୍ରାହ୍ମଣଙ୍କ ବେଦ ମନ୍ତ୍ରରେ ବିବାହ ମଣ୍ଡପ ରେ ଦଳ, ଦଳ ହୋଇ ବରକନ୍ୟ ବସି ଏହି ଗଣ ବିବାହକରୁଥିବାର ନିଆରା ମଜା ସମସ୍ତ ଦର୍ଶକ ଙ୍କୁ ଅଭିଭୂତ କରିଥିଲା । ସମ୍ପୂର୍ଣ୍ଣ ବୈଦିକ ହିନ୍ଦୁ ରୀତିନୀତି ଅନୁସାରେ ହାତଗଣ୍ଠି, ମୁକୁଟ ବନ୍ଧନ, କନ୍ୟା ମଥାରେ ସିନ୍ଦୂରଲଗା ବିଧାନ ଓ ହୋମଠାରୁ ଆରମ୍ଭ କରି କଉଡ଼ି ଖେଳ ପର୍ଯ୍ୟନ୍ତ ସମସ୍ତ ବିବାହ କାର୍ଯ୍ୟ ସମ୍ପନ୍ନ କରାଯାଇଥିଲା । ମୋଟ ୨୦୧ଜଣ ବରଙ୍କୁ ଶ୍ରୀ ମାଝୀ କନ୍ୟାଦାନ କରିଥିଲେ । ଏହା ସହିତ ବରକନ୍ୟାଙ୍କୁ ଆଶୀର୍ବାଦ ପ୍ରଦାନ କରିବହୁତ ଖୁସିବ୍ୟକ୍ତ କରିଛନ୍ତି । ସରକାରଙ୍କ ଏହି ନୂତନ ଜନହିତକର ଯୋଜନା ଯୋଗୁଁ ଗରିବ ଶ୍ରେଣୀର ବହୁ ଅବିବାହିତ କନ୍ୟା ଉପକୃତ ହେବେ। ବିଧବାମାନଙ୍କୁ ପୁନଃ ବିବାହ କରାଇବା ସହ ଝିଅମାନଙ୍କୁ ଦାମ୍ପତ୍ୟ ବନ୍ଧନରେ ବାନ୍ଧି ସେମାନଙ୍କ ମନରୁ କଷ୍ଟ ଦୂର କରିବା ସାମାଜିକ ସ୍ୱୀକୃତି ଦେବା ଏହି ଯୋଜନାର ମୂଳଲକ୍ଷ୍ୟ ବୋଲି ମୁଖ୍ୟମନ୍ତ୍ରୀ କହିଛନ୍ତି । ଏହି ଯୋଜନାରେ ସରକାରଙ୍କ ପକ୍ଷରୁ ମୋଟ ୬୦ ହଜାର ଟଙ୍କା ସହାୟତା ପ୍ରଦାନକରା ଯାଉଥିଲା ବେଳେ ଏହି ଟଙ୍କାରୁ ୪୫ ହଜାର ଟଙ୍କା କନ୍ୟାଙ୍କ ବ୍ୟାଙ୍କ ଖାତାକୁ ପଠାଯାଉଥିଲା ଓ ବାକି ୧୫ ହଜାର ଟଙ୍କା ବିବାହ କାର୍ଯ୍ୟକରୁଥିବା ସଂସ୍ଥାକୁ ଦିଆଯାଉଥିବାର ମୁଖ୍ୟମନ୍ତ୍ରୀ କହିଛନ୍ତି । ଏହାପରେ ଓଡ଼ିଶାର ଅନ୍ୟ ଜିଲ୍ଲାରେ ଏପରି କାର୍ଯ୍ୟକ୍ରମ କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି। ମୁଖ୍ୟମନ୍ତ୍ରୀଙ୍କ ସମେତ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ଉପସ୍ଥିତ ରହି ବଡ଼ ଭଉଣୀର ଦାୟିତ୍ୱ ନିର୍ବାହ କରିଛନ୍ତି । ଏହାସହ ପରିବହନ ମନ୍ତ୍ରୀ ବିଭୂତିଭୂଷଣ ଜେନା, ମତ୍ସ୍ୟ ଓ ପଶୁ ସମ୍ପଦ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ, ଆସିକା ଏମ୍ପି ଅନିତା ପ୍ରିୟଦର୍ଶିନୀ, ବ୍ରହ୍ମପୁର ସାଂସଦ ଡ. ପ୍ରଦୀପ ପାଣିଗ୍ରାହୀ, କବିସୂର୍ଯ୍ୟନଗର ବିଧାୟକ ପ୍ରତାପ ଚନ୍ଦ୍ର ନାୟକ, ଖଲ୍ଲିକୋଟ ବିଧାୟକ ପୂର୍ଣ୍ଣଚନ୍ଦ୍ର ସେଠୀ, ଛତ୍ରପୁର ବିଧାୟକ କୃଷ୍ଣଚନ୍ଦ୍ର ନାୟକ, ଦିଗପହଣ୍ଡି ବିଧାୟକ ସିଦ୍ଧାନ୍ତ ମହାପାତ୍ର, ଆସିକା ବିଧାୟକ ସରୋଜ ପାଢୀ,ବ୍ରହ୍ମପୁର ବିଧାୟକ କେ. ଅନିଲ, ଗଞ୍ଜାମ ଜିଲାପାଳ ଭି. କୀର୍ତ୍ତି ଭାସନଙ୍କ ସହ ବିଭାଗୀୟ ଅଧିକାରୀଗଣ ଉପସ୍ଥିତ ଥିଲେ।
ତାରାତାରିଣୀ ପୀଠରୁ ଆରମ୍ଭ ହେଲା ‘ମୁଖ୍ୟମନ୍ତ୍ରୀ କନ୍ୟା ଯୋଜନା’ କାର୍ଯ୍ୟକ୍ରମ; ୨୦୧ ବରଙ୍କୁ ମୁଖ୍ୟମନ୍ତ୍ରୀ କଲେ କନ୍ୟାଦାନ
Leave a Reply