ନୂଆଦିଲ୍ଲୀ: ସପ୍ତାହକୁ ୫ ଦିନ କାର୍ଯ୍ୟଦିବସ ତୁରନ୍ତ ଲାଗୁ କରିବା ଦାବିରେ ବ୍ୟାଙ୍କ ୟୁନିୟନର ସଂଯୁକ୍ତ ଫୋରମ(ୟୁଏଫବିୟୁ)ର ଆହ୍ୱାନ କ୍ରମେ ରାଷ୍ଟ୍ରାୟତ୍ତ ବ୍ୟାଙ୍କର ଲକ୍ଷଲକ୍ଷ ଅଧିକାରୀ ଓ କର୍ମଚାରୀ ମଙ୍ଗଳବାର ଦେଶବ୍ୟାପୀ ଧର୍ମଘଟ କରିଥିଲେ। ଏହା ଫଳରେ ବ୍ୟାଙ୍କ ସେବା ସଂପୂର୍ଣ୍ଣ ବ୍ୟାଘାତ ହୋଇଛି। ଜାନୁଆରୀ ୨୩ ତାରିଖରେ ୯ଟି ରାଷ୍ଟ୍ରାୟତ୍ତ ବ୍ୟାଙ୍କ ସଂଘର ପ୍ରତିନିଧି ଓ ମୁଖ୍ୟ ଶ୍ରମ କମିଶନରଙ୍କ ମଧ୍ୟରେ ହୋଇଥିବା ଆଲୋଚନା ବିଫଳ ହେବା ପରେ ଏହି ଧର୍ମଘଟ ଡାକରା ଦିଆଯାଇଥିଲା। ସରକାର ସଂଘର ଦାବି ପୂରଣ କରିବାରେ ଟାଳଟୁଳ ନୀତି ଅବଲମ୍ବନ କରୁଥିବାରୁ ଆନ୍ଦୋଳନ ପାଇଁ ସଂଘ ବାଧ୍ୟ ହୋଇଥିଲା ବୋଲି ସର୍ବଭାରତୀୟ ବ୍ୟାଙ୍କ କର୍ମଚାରୀ ସଂଘର ସାଧାରଣ ସଂପାଦକ ସି.ଏଚ.ଭେଙ୍କଟାଚଳମ୍ କହିଛନ୍ତି। ମଙ୍ଗଳବାର ଧର୍ମଘଟକୁ ମିଶାଇ ଲଗାତର ୫ଦିନ ଧରି ବ୍ୟାଙ୍କ ବନ୍ଦ ରହିଥିବାରୁ ଆର୍ଥିକ କାରବାର ବାଧାପ୍ରାପ୍ତ ହେବା ସହ ଗ୍ରାହକ ବହୁ ଅସୁବିଧାର ସମ୍ମୁଖୀନ ହୋଇଛନ୍ତି। ପୂର୍ବରୁ ଜାନୁଆରୀ ୨୩ ତାରିଖ ବସନ୍ତ ପଞ୍ଚମୀ, ଜାନୁଆରୀ ୨୪ ତାରିଖ ଚତୁର୍ଥ ଶନିବାର, ଜାନୁଆରୀ ୨୫ ରବିବାର ଏବଂ ଜାନୁଆରୀ ୨୬ ତାରିଖ ଗଣତନ୍ତ୍ର ଦିବସ ପାଇଁ ବ୍ୟାଙ୍କ ବନ୍ଦ ରହିଥିଲା।
ଦେଶବ୍ୟାପୀ ବ୍ୟାଙ୍କ ଧର୍ମଘଟ, ଆର୍ଥିକ କାରବାର ବାଧାପ୍ରାପ୍ତ
Leave a Reply